შჩესნიმ სასტარტოში ადგილი ტერ შტეგენს თავად დაუთმო

ესპანეთის თასის 1/16-ფინალში "გვადალახარასა" და "ბარსელონას" შორის გასამართი მატჩის (0-2) წინ უცნაური რამ მოხდა.

თამაშის წინა დღეებში ვრცელდებოდა ინფორმაცია, რომ "ბარსელონას" კარს პოლონელი ვოიცეხ შჩესნი დაიცავდა, თუმცა სასტარტო შემადგენლობაში ტრავმიდან ცოტა ხნის წინ დაბრუნებული გუნდის პირველი კაპიტანი მარკ-ანდრე ტერ შტეგენი ვიხილეთ.

Sport-ის ჟურნალისტის, კარლოს მონფორტის ცნობით თავდაპირველი ცნობები სიმართლე იყო და ჰანსი ფლიკი კარში მართლაც ვოიცეხ შჩესნის დაყენებას აპირებდა, თუმცა თავად პოლონელმა გამოთქვა სურვილი, ტერ შტეგენს ეთამაშა. შჩესნის აზრით, ვინაიდან ტერ შტეგენი გუნდის პირველი კაპიტანია და თანაც ტრავმა ცოტა ხნის წინ მოირჩინა, მან თამაში დაიმსახურა.

კატალონიური წყაროს ცნობით შჩესნის ამ საქციელით ჰანსი ფლიკიც და კლუბის ხელმძღვანელობაც ძალიან კმაყოფილი დარჩა.

მარკ-ანდრე ტერ შტეგენი მოედანზე 18 მაისის შემდეგ პირველად ვიხილეთ. ცნობილია, რომ ჟოან გარსიასა და ვოიცეხ შჩესნის შემდეგ ის გუნდის მესამე მეკარედ მიიჩნევა, რის გამოც გერმანელის იანვარში გუნდიდან წასვლა გამორიცხული არაა.