ფრენკი დე იონგი მხოლოდ ერთ მატჩს გამოტოვებს

"ბარსელონას" ნიდერლანდელი ნახევარმცველი ფრენკი დე იონგი ესპანეთის სუპერ თასის ფინალში (3-2) მიღებული წითელი ბარათის გამო მხოლოდ ერთ შეხვედრას გამოტოვებს და ისიც იმ თამაშს, რომელშიც ჰანსი ფლიკს ის, შესაძლოა, ისედაც დაესვენებინა.

"რეალ მადრიდთან" გამართული მორიგი საჩემპიონო თამაშის მიწურულს ფრენკი დე იონგმა ვინისიუს ჟუნიორთან იუხეშა, რის გამოც პირდაპირ წითელი ბარათი მიიღო. შეხვედრის მთავარმა არბიტრმა, მუნუერა მონტერომ მატჩისშემდგომ ანგარიშში დე იონგისთვის პირდაპირ წითელი ბარათის ჩვენების მიზეზი ჩაწერა. მთავარი მსაჯის თქმით ნიდერლანდელი მოედნიდან ბურთზე ბრძოლის დროს ზედმეტი ძალისხმევის გამოჩენისთვის გააძევა. ვინაიდან ანგარიშში ნახსენებია, რომ დე იონგი ბურთისთვის იბრძოდა, ასევე იმის გამო, რომ მის უხეშობას მოწინააღმდეგის ტრავმა არ მოჰყოლია, Mundo Deportivo-ს ცნობით ფრენკი მხოლოდ ერთ თამაშს გამოტოვებს.

რადგან საქმე პირდაპირ წითელ ბარათთან გვაქვს, დისკვალიფიკაცია სხვა ტურნირებზეც გადადის და დე იონგი 15 იანვარს ესპანეთის თასზე სანტანდერის "რასინგის" წინააღმდეგ ვერ ითამაშებს. ის გუნდს 18 იანვარს "რეალ სოსიედადთან" გასამართი გასვლითი მატჩისთვის დაუბრუნდება.