ბარსელონა ლა ლიგაში გალიდერდა

მიუხედავად იმისა, რომ მიმდინარე სეზონში "ბარსელონა" თავისი საუკეთესო ფორმისგან შორსაა, ჰანსი ფლიკის გუნდმა ლა ლიგაში გალიდერება მაინც მოახერხა. ამის მიზეზი კი ისაა, რომ ბოლო დროს კიდევ უფრო ცუდ ფორმაშია "ბლაუგრანას" მთავარი კონკურენტი "რეალ მადრიდი".

ესპანეთის მოქმედმა ჩემპიონმა, "ბარსელონამ" ლა ლიგაში ზედიზედ 4 თამაში მოიგო, "რეალ მადრიდმა" კი ბოლო 3 შეხვედრა ფრედ დაასრულა. შედეგად ჰანსი ფლიკის გუნდმა 3 ტურის წინ არსებული ხუთქულიანი ჩამორჩენა აღმოფხვრა და წინ ერთი ქულით გავიდა.

14 ტურის შემდეგ გათამაშებას "ბარსელონა" 34 ქულით ლიდერობს. "რეალ მადრიდი" 33 ქულით მეორეა. "ბლანკოსს" ერთი ქულით ჩამორჩება გიორგი მიქაუტაძის "ვილიარეალი", ხოლო "ბარსას" მომდევნო მეტოქეს, "ატლეტიკოს" 31 ქულა აქვს.