The Athletic: სიმშვიდის გარანტია - დეკუსა და ფლიკის ალიანსი

                   The Athletic-ი სტატიას აქვეყნებს ბარსაში დამკვიდრებული სიმშვიდის შესახებ. როგორც აღმოჩნდა გაოცებას იწვევს ეს სწრაფად მიღწეული სიმშვიდე იმ კლუბში, რომელიც სულ მცირე ხნის წინ გაკოტრების ზღვარზე იყო. ახლა კი განახლებულ "კამპ ნოუზე" თამაშობენ, ევროპის ერთ-ერთი საუკეთესო კლუბია და ყველაფერი კარგად მიდის. წარმატების მიზეზად დეკუსა და ფლიკის თანამშრომლობას ასახელებენ, ჰოდა, ვნახოთ აბა რა და როგორ მოხდა. 

თარგმანს უცვლელად გთავაზობთ. 

ყველაფერი 2024 წლის მაისში ლონდონში მოგზაურობით დაიწყო.

„ბარსელონას“ სპორტის დირექტორი დეკუ და მისი ყოფილი თანაგუნდელი ბოიან კრკიჩი, (რომელიც ახლახან კლუბის აღმასრულებელ სტრუქტურაში დასაქმდა) დიდ ბრიტანეთში გაემგზავრნენ. დეკუს ჰანსი ფლიკთან შეხვედრა ჰქონდა დაგეგმილი, რათა განეხილათ მისი შესაძლო დანიშვნა „ბარსელონას“ მთავარ მწვრთნელად. შეხვედრა ლონდონის ცენტრში მდებარე ერთ-ერთ სასტუმროში გაიმართა და გერმანელმა სპეციალისტმა მათზე მყისიერი შთაბეჭდილება მოახდინა.

დეკუ და ბოიანი გაოცებულნი დარჩნენ, თუ რამდენად დეტალურად იცნობდა ფლიკი „ბარსელონას“ ფეხბურთელებს - არა მხოლოდ პირველ გუნდს, არამედ სარეზერვო შემადგენლობასა და 19-წლამდელებსაც. მან უკვე იცოდა ვინ გამოადგებოდა პერსპექტივაში, ვის გაუხსნიდა გზას პირველი გუნდისკენ. 

ფლიკი, რომელიც წინა წლის სექტემბერში გერმანიის ნაკრებიდან გათავისუფლების შემდეგ უმუშევარი იყო, აცხადებდა, რომ „ბარსელონას“ დიდი გადახალისების გარეშე შეეძლო ტიტულებისთვის ბრძოლა. „ბარსელონას“ გაწვრთნა მისი ოცნება იყო, თუმცა არსებობდა ერთი გართულება - გუნდს უკვე ჰყავდა მთავარი მწვრთნელი. ჩავი ამ პოზიციაზე კვლავ მუშაობდა, ყოველ შემთხვევაში, იმ დროისთვის. იანვარში წასვლის გადაწყვეტილება მიიღო, თქვა რომ სეზონის ბოლოს კლუბს დატოვებდა. გუნდი რთულ პერიოდში იყო, ეს განცხადება კლუბის ხელმძღვანელობისთვის მოულოდნელი აღმოჩნდა. აპრილში ჩავიმ გადაწყვეტილება შეცვალა: პრეზიდენტ ჟოან ლაპორტასთან საუბრის შემდეგ შეთანხმდნენ, რომ ის გუნდში დარჩებოდა. მიუხედავად ამისა, ცუდი შედეგების გამო შიდა დაძაბულობა კვლავ არსებობდა.

როდესაც დეკუ და ბოიანი ლონდონში გაემგზავრნენ, კლუბს უკვე გადაწყვეტილი ჰქონდა ჩავის გათავისუფლება, თუმცა თავად ჩავისთვის ეს არავის უთქვამს. ლონდონში ვიზიტის ამბავი იმავე დღეს კატალონიურმა მედიამ გაავრცელა, რამაც ჩავი შოკში ჩააგდო. მან კლუბის მაღალჩინოსნებთან დაკავშირება სცადა, მაგრამ პასუხი არ მიუღია. რამდენიმესაათიანი გაურკვევლობის შემდეგ ჩავი თავად ფლიკს დაუკავშირდა. ერთმანეთი მაშინ გაიცნეს, როცა ჩავი „ალ-სადის“ მთავარი მწვრთნელი იყო, ხოლო ფლიკი გერმანიის ნაკრების. 

ჩავის გარემოცვის ინფორმაციით, ფლიკმა უარყო, რომ „ბარსელონასთან“ მოლაპარაკებები ჰქონდა. ორი დღის შემდეგ ესპანელი გაათავისუფლეს. მას შემდეგ ბევრი რამ შეიცვალა. ორი მწვრთნელი მოგვიანებით მეგობრულად შეხვდა ერთმანეთს. 2024 წლის ოქტომბერში ფლიკი უკვე „ბარსელონაში“ მუშაობის დროს ჩავის დაუკავშირდა, რათა ურთიერთობა გაერკვიათ. ჩავიმ იგი საკუთარ სახლში მიიწვია და უთანხმოება დასრულდა. ამავდროულად, ფლიკის მოსვლას კლუბში იშვიათი სტაბილურობისა და ოპტიმიზმის პერიოდი მოჰყვა. ამ პროცესში გადამწყვეტი იყო მისი მჭიდრო ურთიერთობა დეკუსთან.

„ძალიან ბედნიერი ვარ, რომ ამ კლუბში, დეკუსთან და მის გუნდთან ერთად ვმუშაობ,“ განაცხადა ფლიკმა დეკემბერში. „დეკუ საქმეს შესანიშნავად უძღვება და ჩვენ ძალიან კარგი ურთიერთობა გვაქვს.“

დეკუც ანალოგიურად აფასებდა ფლიკს: „ის ჩვენს მუშაობას ამარტივებს. გამოცდილია, იცის, როგორ ფუნქციონირებს დიდი კლუბი და ყოველდღიურობაში სიმშვიდეს ინარჩუნებს.“

2023 წლის აგვისტოში დანიშვნის შემდეგ დეკუ „კამპ ნოუზე“ ერთ-ერთ ყველაზე გავლენიან ფიგურად იქცა. 48 წლის ყოფილი ფეხბურთელი ლაპორტას 2021 წლის საპრეზიდენტო კამპანიაში მხარს უჭერდა და იმავე წლის მარტში კლუბში რეკრუტირების მრჩევლად მივიდა. მოგვიანებით, ოფიციალურ როლში გადასვლისას, მას საკუთარი სააგენტოს D20 Sports-ის დახურვა მოუწია.

დეკუსა და ფლიკის ურთიერთობა დაფუძნებულია ნდობაზე და საერთო სტრატეგიულ ხედვაზე. მაგალითად, იანვარში ფლიკი ცენტრალური მცველის დამატებას ითხოვდა, თუმცა ბაზრის შესწავლის შემდეგ დეკუმ ჩათვალა, რომ უკეთესი ვარიანტი არ არსებობდა და ალტერნატივად ჟოაო კანსელუ შესთავაზა. ფლიკმა ფართო სურათი გაითვალისწინა და გადაწყვეტილებას დაეთანხმა.

2024 წლის ზაფხულში დეკუ მზად იყო რაფინიასა და ინიგო მარტინესის გასაშვებად, თუმცა ფლიკმა მათი დარჩენა მოითხოვა და საბოლოოდ ისინი გუნდის ლიდერებად იქცნენ. სხვა დროს დეკუმ დანი ოლმოს ტრანსფერი პრიორიტეტად მიიჩნია, რაც ილქაი გიუნდოგანის როლს ამცირებდა. ფლიკმა გადაწყვეტილება მიიღო და გიუნდოგანს გულწრფელად ესაუბრა. გერმანელმა ნახევარმცველმა საბოლოოდ „მანჩესტერ სიტიში“ დაბრუნება არჩია.

მსგავსი სიტუაცია შეიქმნა მარკ-ანდრე ტერ შტეგენთან დაკავშირებით. ფლიკმა მას პირდაპირ განუცხადა, რომ ჟოან გარსია გუნდის პირველი მეკარე იქნებოდა. მოგვიანებით ტერ შტეგენის იჯარით გადასვლა დაჩქარდა. ჩავის პერიოდში დეკუსთან ასეთი ჰარმონია არ არსებობდა. განსხვავებული ხედვები და ინფორმაციის გაჟონვა ურთიერთობას ართულებდა.

კლუბში გადაწყვეტილებების მიღებისას ისინი სხვადასხვა დღის წესრიგით მოქმედებდნენ. დეკუს არ მოსწონდა, რომ ჩავის გუნდი მედიაში აქტიურად ავრცელებდა საკუთარ სატრანსფერო პრიორიტეტებს, რაც მის გრძელვადიან ხედვასთან შეუთავსებელი იყო. თავის მხრივ, ჩავის არც ის მოეწონა, რომ მატეუ ალემანი სპორტის დირექტორის პოსტიდან წავიდა, მისგან უსიტყვო მხარდაჭერა ჰქონდა. 

„შეუძლებელი იყო წარმატების მიღწევა ასეთ შიდა გარემოში,“ - ამბობს ბარსას შიდა წყარო, „ეს იყო ერთ-ერთი გადამწყვეტი ფაქტორი, რის გამოც 2024 წელს ჩავი გაუშვეს და ფლიკი მოიყვანეს.“

ყველაფერი იდეალურად არ არის. ბარსელონას ფინანსური მდგომარეობა კვლავ სერიოზული დაბრკოლებაა, რადგან კლუბი ლა ლიგის მიერ დაწესებულ სახელფასო ლიმიტს აღემატება, სეზონის დაწყებამდე ყველა პირველი გუნდის ფეხბურთელის რეგისტრაცია რთულ პროცესად იქცა. თუმცა, განსხვავებით ჩავიის პერიოდისგან, ფლიკის ბარსას ჯერჯერობით სერიოზული სპორტული კრიზისი არ განუცდია.

დეკუსა და ფლიკის ურთიერთობის შემხედვარე იქმნება შთაბეჭდილება, რომ ნებისმიერი კრიზისი მშვიდად და ცივი გონებით შეიძლება მოგვარდეს, რაც ადრე ვერ ხერხდებოდა შიდა დაპირისპირების გამო.  და ეს ყველაფერი ტიტულებზეც აისახება. გასულ წელს ბარსამ სამი ტიტული მოიგო, წელს სუპერ თასი უკვე მათია, ლა ლიგას ლიდერობენ, კოპაზე ნახევარფინალში არიან, ჩემპიონთა ლიგაზე კი ყველაფერი წინ არის.