რეალ მადრიდმა სოსიედადთან წააგო - ბარსელონა წინ 14 ქულით გაიჭრა და შანსი აქვს, ჩემპიონი ესპანიოლის სტადიონზე გახდეს

"რეალ მადრიდმა" სან სებასტიანში "რეალ სოსიედადთან" ტაკეფუსა კუბოსა და ანდერ ბარენეჩეას გოლებით 0-2 წააგო.

ეს ნიშნავს, რომ "ბარსელონა" წინ 14 ქულით გაიჭრა და შემდეგი მატჩის მოგების შემთხვევაში, ესპანეთის ჩემპიონი ოფიციალურად გახდება (თუმცა, თუ კარლო ანჩელოტის გუნდი "ხეტაფესთან" ქულებს დაკარგავს, "ბლაუგრანა" ჩემპიონობას ისედაც გაიფორმებს).

ყველაზე საინტერესო ისაა, რომ "ბარსას" მომდევნო შეხვედრა "ესპანიოლის" წინააღმდეგ გასვლაზე აქვს და შესაბამისად, კატალონიურმა გრანდმა ისტორიული შანსი მიიღო, ჩემპიონი მოსისხლე მტრის სტადიონზე გახდეს. 

33 ტურის შემდეგ ჩავის გუნდის ანგარიშზე 82 ქულაა, "ლოს ბლანკოსს" კი 68 ქულა აქვს - შესაბამისად, კიდევ 3 ქულის დამატების შემთხვევაში "ბარსელონა" "რეალ მადრიდისთვის" მიუწვდომელი გახდება.

"რეალ მადრიდი" "ხეტაფეს" 13 მაისს ეთამაშება, "ბარსელონა" "ესპანიოლს" კი 14 მაისს დაუპირისპირდება.