ნიუკასლი-ბარსელონა - ჰანსი ფლიკის მატჩისწინა პრესკონფერენცია
- თამაშის დრო: ხუთშაბათი, 18 სექტემბერი, 23:00
დღეს "ბარსელონა" ჩემპიონთა ლიგის 2025/26 წლების გათამაშების პირველ მატჩს გამართავს. კატალონიური კლუბი "ნიუკასლს" ესტუმრება.
"ბლაუგრანას" მთავარმა მწვრთნელმა ჰანსი ფლიკმა "ნიუკასლთან" დაპირისპირების წინ გამართულ პრესკონფერენციაზე ჟურნალისტების არაერთ საინტერესო კითხვას უპასუხა.
კარგი სტარტი ყოველთვის მნიშვნელოვანია, მაგრამ ვიცით, რომ იოლი მატჩი არ გვექნება. უმაღლეს დონეზე უნდა ვითამაშოთ.
"ნიუკასლს", ალბათ, პრემიერ ლიგაში საუკეთესო ატმოსფერო აქვს. ძალიან ინტენსიურ, ძლიერ გუნდს ველი. ედი ჰაუ შესანიშნავი მწვრთნელია. ისინი ამ გუნდს წლების განმავლობაში აკომპლექტებდნენ. "კაჭკაჭების" ხელმძღვანელობამ ფანტასიკურად იმუშავა.
ძალიან დადებითად შევაფასებდი იმას, რაც "ვალენსიას" წინააღმდეგ ვნახეთ. ყველა ასპექტში კარგად ვთამაშობთ. ხვალ ამ თავდაჯერებულობით თამაში მნიშვნელოვანია. ბურთი უნდა შევინარჩუნოთ და სივრცეები გამოვიყენოთ. ადვილი მატჩი არ იქნება. "ნიუკასლი" ძალიან ძლიერია.
ახალგაზრდა გუნდი ვართ, მაგრამ ეს იმას არ ნიშნავს, რომ ასეთი მატჩების მოსაგებად გამოცდილება გვაკლია. ეს გასულ სეზონში ვაჩვენეთ.
იამალის არყოფნა? ჩვენ რაშფორდი გვყავს და ის აქ სწორედ ამიტომაა - იმ შემთხვევაში, თუ რომელიმე თავდამსხმელი ვერ ითამაშებს. მარკუსმა კვირას აჩვენა, რამდენად კარგი ფეხბურთელია და იმედი მაქვს, ამას ინგლისში ისევ გააკეთებს.
რაფინია ჩვენი ერთ-ერთი წამყვანი ფეხბურთელია.
შემადგენლობა? ხვალ ვნახოთ. ვარჯიშის ჩატარება და 8 საათი ძილი მჭირდება იქამდე, სანამ გადავწყვეტ, ვინ ითამაშებს.
ნიკ ვოლტემადე? მას კარგად არ ვიცნობდი. ვოლტემადეს რამდენიმე თამაშს ვუყურე და მისი პროგრესით გაკვირვებული დავრჩი. ვნახოთ, როგორ განვითარდება. მას დიდი პოტენციალი აქვს. მიხარია, რომ გერმანიას შესანიშნავი თავდამსხმელი ჰყავს.
არაუხოს გამოყენება "ნიუკასლის" ფიზიკურად ძლიერ თავდამსხმელებთან გასამკლავებლად? შესანიშნავი გუნდი გვყავს. გარსიამ და კუბარსიმაც კარგად ითამაშეს. ეს შესაძლებელია, მაგრამ ვნახოთ.
რაშფორდს თვალს "მანჩესტერ იუნაიტედში" დებიუტიდან ვადევნებ. მას აქვს სისწრაფე, ერთი-ერთზე თამაშისა და გოლის გატანის უნარი. რაც მისგან ამ პირველ კვირებში ვნახე, ძალიან კარგია. მარკუსს დიდი პოტენციალი აქვს, რასაც, დარწმუნებული ვარ, გამოავლენს.
მომხმარებლებს, რომლებიც იმყოფებიან ჯგუფში სტუმარი, ამ მასალაზე კომენტარის დამატების უფლება არ აქვთ.
კომენტარები [ 7 ]