ჰანსი ფლიკის დილემა რაიოსთან მატჩის წინ

"ბარსელონას" მთავარი მწვრთნელი ჰანსი ფლიკი ესპანეთის ჩემპიონატის მე-3 ტურის მატჩში "რაიო ვალიეკანოსთან" სტუმრად გასამართი დაპირისპირების წინ დიდი დილემის წინაშე დგას.

ფლიკმა სეზონის დასაწყისში მიანიშნა, რომ ხანგრძლივი სეზონის გათვალისწინებით, სტაბილურობის შესანარჩუნებლად, როტაცია ხშირად იქნება. კითხვის ნიშნებს ბადებს ცენტრალური თავდამსხმელის პოზიცია, რადგან რობერტ ლევანდოვსკის პირდაპირი შემცვლელი არ ჰყავს, თუმცა აშკარაა, რომ მწვრთნელი გუნდში მეორე 9-იანად ფერან ტორესს მიიჩნევს. გერმანელმა სპეციალისტმა ამ თვის დასაწყისში ლევანდოვსკისთან საუბრისას ცხადყო, რომ მას სასტარტოში ადგილის დასამკვიდრებლად ტორესთან ბრძოლა მოუწევდა, განსაკუთრებით ამ უკანასკნელის ფორმის გათვალისწინებით.

Mundo Deportivo-ს თუ დავუჯერებთ, "რაიოსთან" შეხვედრის წინ ჰანსი სწორედ ამ დილემის წინაშე დგას - ძირითად შემადგენლობაში ტორესი ათამაშოს, რომელიც შესანიშნავ ფორმაშია თუ ლევანდოვსკი, რომელმაც ტრავმა მოირჩინა და სრულ მზადყოფნაშია.

ლევანდოვსკის დაზიანების გამო ფერანმა სეზონის პირველი ორივე ოფიციალური მატჩი სასტარტოში დაიწყო და გოლი ორივე თამაშში გაიტანა. რობერტის დაბრუნებისთანავე მისი სათადარიგოზე დატოვება, განსაკუთრებით იმის გათვალისწინებით, თუ რამდენად კარგად გამოიყურებოდა წინასასეზონო მზადებაზე, ასევე არასამართლიანი იქნებოდა.

MD მიიჩნევს, რომ შეტევაში იამალთან და რაფინიასთან ერთად, სავარაუდოდ, კვლავ ტორესი ითამაშებს.