მატჩისშემდგომი მიმოხილვა: "შეჩემა"

    რა გამახსენდა და ოთარ ყარალაშვილის წითელი წიგნი, გადაშენებულ ცხოველებზე გვიყვებოდა, უაღრესად საინტერესო ცხოვრებით რომ იცხოვრეს. თავისთავად დაუვიწყარი წიგნი იყო, ჰოდა, ერთი გადაშენებული ცხოველი სამუდამოდ ჩამებეჭდა გონებაში - ექვსფეხა შეჩემა. როგორც მახსოვს შეჩემა მთაში ბინადრობდა, ოჯახში პატრიარქალური იერარქია ჰქონდათ და სწრაფად მრავლდებოდნენ. დადიოდნენ შეჩემები გუნდად, კლანურად, იერარქიულად, მაგრამ მაინც გადაშენდნენ და მხოლოდ ოთარის წითელ წიგნში დაიდეს ბინა. 

რაზე გამახსენდა... იამალები ჰგვანან საოცრად. უფრო სწორად, ნამდვილად არ ვიცი ექვსფეხა შეჩემა როგორ გამოიყურებოდა თავის დროზე, ან ოთარს როგორი წარმოედგინა, მაგრამ მე მგონია, რომ იამალების მსგავსი რაღაც უნდა ყოფილიყო. მამა მატჩის წინ რაღაცას ხარშავს და იმუქრება, მე აქ მოვხარშავ და ჩემი შვილი მოედანზეო, დედა ქირავდება, ბებია მიმალვაშია. ასე ხომ გადაშენდებით იამალებო?! 

მართალია ლამინეს მატჩის წინ ჟურნალისტებმა გაუჩალიჩეს, მისი სიტყვები ისე მიჭრეს-მოჭრეს რომ "ბერნაბეუ" თავიდანვე სტვენით შეხვდა, მაგრამ ჩვენ ხომ ვიცით, რომ ვერ არის ეს ბიჭი თავის ჭკუაზე. იცავენ და ამართლებენ, 18 წლისა ბრძენი ხომ ვერ იქნებაო, ყველა 18 წლისა ეგეთიაო, არა ძმებო, ინიესტა არ ყოფილა ასეთი, არც მესი, არც ჩავი, არც პუიოლი, პიკე ცოტას წაუშტერებდა, მაგრამ "მანჩესტერში" ფერგიმ დააჭკვიანა. მოკლედ, ვინც გრძელი გზა განვლო, იმას სიყრმიდანვე ეტყობოდა, რომ ნიჭთან ერთად ღირსებაც გააჩნდა, ლამინე იამალს კი ზემოდან უყვარს ყურება, ივან დე ლა პენია რომ დახვედროდა გუნდში ლილიპუტს დაარქმევდა და სარკმელში პანღურით გააძვრენდა. 

დაიდგამდა მერე გვირგვინს თავზე, როგორც ლებრონ ჯეიმსი. 

ეჰ, მაგისთვის ჯერ ძალიან ადრეა ლამინე. ჩვენო ბრილიანტო, ჩვენო ჰიპშტერო ძმაო. 

როგორ ითამაშა და როგორც პიკგადავლილმა რონალდინიომ, მთელი ღამის ნაგულავები რომ ფეხზე ვეღარ იდგა, ვეღარ დარბოდა, მცველებთან ჭიდაობდა, აღარც იცინოდა, მხოლოდ ადგილზე შეეძლო თამაში, ბურთის შენარჩუნება და გენიალური პასები. მაგას ჰგავდა, ერთი-ორი ლამინემაც ლამაზად ამოსცხო, ერთი-ორჯერ კარგად დატრიალდა, მაგრამ ამ ასაკში რომ ასე ბებერვით თამაშობს, ესე იგი, დიდი პრობლემა აქვს. ჯერ კიდევ წინა სეზონში, სულ რამდენიმე თვის წინ ქარივით დაქროდა, ახლა სისწრაფის ხარჯზე დრიბლინგზეც არ წასულა, თითქოს იცოდა რომ სისწრაფით ვერავის აჯობებდა. 

საქმე იმაში არ არის, რომ მატჩი ჩააგდო. ყველას ჩაუგდია. უფრო დიდებსაც. უარესადაც უთამაშიათ. საქმე იმაშია, რომ არა სწორი ავტორიტეტები ჰყავს, ეს კიდევ დამღუპველია. უყურა მესის, უყურა რონალდუს, და მიბაძა ნეიმარს. 

პირველი ტაიმი - მბაპე ხაფანგს დაუძვრა

მოგებას არ ველოდი. "მადრიდი" უკეთეს ფორმაშია, მხოლოდ რუდიგერი აკლდათ, მბაპეს აწყვეტილი აქვს, "ბარსა" მაღლა აწეული დაცვით თამაშობს და რა თქმა უნდა, გოლებს გაუშვებდნენ. საერთოდ, ძალიან მაგარი თამაში იყო, პირველი ტაიმი კი თავიდან ბოლომდე "მადრიდისა" იყო. "ბარსას" გაუმართლა რომ მეტი გოლი არ მიიღო, მბაპეს გამაშის ძაფი ჩარჩა თამაშგარეში. ამასაც ველოდით, მბაპეს შეჩერების ერთადერთი გზა ცენტრალური ხაზის ხაფანგი იყო, მაგრამ ყოველ ჯერზე ხომ ვერ გამოვა? ისწავლა უკვე ჭკუა, შეიჭრა სიღრმიდან და გახსნა კიდეც ანგარიში. 

"ბარსა" თამაშობდა ფეხბურთს, რომელსაც სჭირდებოდა ლევანდოვსკი, ესე იგი, ფორვარდი, რომელიც ზურგით მყოფი დაიჭერდა ბურთს, ფერანზე სულ ასეთი პასი მიდიოდა, ის ვერაფერს ახერხებდა და შეტევაც კვდებოდა. ფაქტობრივად არაფერი გაუკეთებია, ერთი-ორ უღიმღამო კარში დარტყმას თუ არ ჩავთვლით. ეს ის თამაში არ იყო, სადაც ფერანი გამოადგებოდა გუნდს, მაგრამ რა გინდა რომ ქნა? დანაკლისი ძალიან დიდი იყო. 

იმის კვალობაზე რომ რაშფორდს ვალვერდესთან უწევდა თამაში ყველაზე კარგი შთაბეჭდილება მან დატოვა. საგოლე პასიც მიითვალა. სწორად თამაშობდა, ხშირად აკეთებდა აჩქარებებს და ხშირად ამწვავებდა თამაშსაც. დაცვაში "მადრიდს" ჰქონდა შეცდომები, უხეშიც, უპატიებელიც, "ბარსამ" კი მხოლოდ ერთხელ ისარგებლა. ასე რომ, ყველაზე მეტი შენიშვნა შემტევებთან მექნებოდა. 

ფერმინმა შეაგდო და ჰქონდა შანსი საუკეთესოც გამხდარიყო ამ შეხვედრაში, მაგრამ, მაგრამ... მივუბრუნდებით მაგას. 

ბელინგემმა თეთრები ისევ წინ გაიყვანა. ალბათ კარიერის ყველაზე მარტივი გოლი შეაგდო. კუბარსი-გარსიას დუეტი შეიძლება ყველაზე ტექნიკურია ლა ლიგაში, ალბათ ბურთიც საუკეთესოდ ამოაქვთ, მაგრამ მცველს პირველ რიგში, დაცვა უნდა შეეძლოს. ამ მხრივ კი ვერ არიან ინიგოს დონეზე. გვაკლია ის გაქცეული კაცი, მაგრად გვაკლია. 

მეორე ტაიმი - ფერმინი და შესნი 

საუკეთესო "ბარსადან" ულაპარაკოდ შესნი იყო. არავის მსოფლიოში ასეთი დონის მესამე მეკარე არ ჰყავს. პირველ ტაიმშიც მოიგერია კარგი ბურთები, აუღო მბაპეს, ვინის, მერე კიდევ პენალტი მოიგერია, კარგად დარტყმული პენალტი, გამოიცნო, კარგად გაიშალა და რაც მთავარია ხელიც გაამაგრა. "მადრიდმა" თამაში აქ დაასრულა, "რეალმაც" და მბაპემაც. ამ პენალტიდან მოყოლებული თამაში "ბარსამ" აიღო. თითქოს რაღაც მაგრად მოხვდა თავში მთელ "ბერნაბეუს". მეგონა კიდეც იქნებ ფრისკენ მიდის ეს თამაში-მეთქი, მაგრამ... ოჰ, ფერმინ ლოპეს. გათავისუფლდა მეურვისგან როგორც თავის დროზე სერჟი რობერტო მარსელოსგან, გარბის სამი-ორზე, აუცილებლად უნდა გამოიყენოს ზედმეტი კაცი, აუცილებლად რომელიმე მცველი უნდა დაიჭირონ უპირატესობით, ფერმინი უახლოვდება საჯარიმოს, იკითხება პასი რაშფორდზე და, ბიჭო... რა ხდება, რა ჯანდაბაა, შენ რაღა დაგემართა?! კარში დაარტყა. ასეთ დროს საყვედურს მხოლოდ ერთ შემთხვევაში გადაურჩები, თუ ბურთს ბადეში გაახვევ, ფერმინს ბევრი დააკლდა გოლამდე. რამდენიმე წუთით ადრე, ასევე, პასი შეეძლო იამალზე და იქაც დარტყმა არჩია, იქაც შეცდა, იქაც პასი სჯობდა. ვიფიქრე იქნებ ახლა მიხვდეს-მეთქი და ჰა, ისევ ვერაფერს მიხვდა. არადა, ჭკვიანი ბიჭია, მისგან არ ველოდი ასეთ გადაწყვეტილებას. 

ჩემთვის აქ მორჩა ეს მატჩი. 

ვიღაცისთვის ცოტა მოგვიანებით მორჩა, როცა კუნდემ იამალის პასი ვერ შეიმაგრა, 100%-იანი მომენტი ქარს გაატანა. იქნებ საერთოდ დარტყმა სჯობდა?! მერე კიდევ არაუხო გამოუშვეს მოედანზე, შეტევაშიც გაიქცა, სასაცილო რაღაცებიც აკეთა, გოლი ამჯერად ვერ შეაგდო. დრიბლინგის კეთებას ერჩია მეკარესთან ახლოს ყოფილიყო და მაღალ ბურთზე ებრძოლა. 

იყო მერე გაწევ-გამოწევა. იქედან ნერვებდაგლეჯილი ვინი იქაჩებოდა, ჯერ ჩაბის დააფარა ყველაფერი, მერე გასახდელში წიხლებით გაიქცა, მერე ამობრუნდა და ენა არ გაუჩერებია, ლამინემ სადღაც დაიბარა, მამაჩემი რომ დაჭრეს იმ ხალხს დაგაყენებო იმუქრებოდა, ვინის პირზე ხელი ააფარეს, მერე სახეზეც ააფარეს, ამ სახის გამო საერთოდ წითელი არ მოგცენო და ასე ტკბილად დაიშალნენ. 

ფლიკის განახევრებულმა "ბარსამ" მეორე ტაიმი ასე თუ ისე, ნორმალურად ითამაშა. სეზონი გრძელია. ამ მატჩით არაფერი დამთავრებულა. იამალიც ხომ ვიცით რომ ახალი დაბრუნებულია მოედანზე, შევა ისევ ფორმაში, დაიწყებს ისევ გატანას. გრძელვადიან პერსპექტივაში კარგს ვერაფერს ვხედავ, მაგრამ ხვალ და ზეგ ისევ გაიბრწყინებს. 

წინ რა გველის 

"ბარსას" დრაივი აკლდა, რაფინიას მოაქვს ეს დრაივი. ბრაზილიელი კიდევ ერთი თვე ვერ დაბრუნდება. ასე თვალსა და ხელს შუა უმნიშვნელოვანეს ფეხბურთელად იქცა. ყველაზე ადრე დანი ოლმო უნდა მობრუნდეს. ჰოდა, დაველოდოთ. "ელჩესთან" პედრი არ იქნება. თავი ვერ შეიმაგრა და წავიდა ქაცვებით ჩუამენისკენ.

კარგია, დაისვენებს. თუ ვინმეს დასვენება სჭირდება, პირველ რიგში, სწორედ პედრის.