ბარსელონა-სელტა | ურთიერთშეხვედრების ისტორია

ხვალ ესპანეთის ჩემპიონატის 36-ე ტურის მატჩები იმართება. "ბარსელონა" უმოტივაციო "სელტას" მასპინძლობს.

თვალი გადავავლოთ ამ გუნდების ურთიერთშეხვედრების ისტორიას.

"ბარსელონასა" და "სელტას" აქამდე ერთმანეთთან 127-ჯერ უთამაშიათ. "ბლაუგრანას" 69 მოგება, 31 ფრე და 27 მარცხი დაუგროვდა. კატალონიელებმა გაიტანეს 278 და გაუშვეს 147 გოლი.

ბოლო დროს ამ გუნდების შეხვედრები უხვგოლიანობით გამოირჩეოდა. უკანასკნელ 15 მატჩში მინიმუმ 2 გოლი გადიოდა, ხოლო ბოლო 5 შეხვედრაში მინიმუმ 3 გოლი. უგოლო შეხვედრა კი "ბარსელონასა" და "სელტას" 1999 წლის შემდეგ არ ჩაუტარებიათ.

"ბარსელონას" "სელტას" დამარცხება ბოლო დროს უჭირს. კატალონიელებს ორმატჩიანი მოუგებელი სერია აქვთ. გასულ სეზონში "სელტამ" "კამპ ნოუზე" 2-1 მოიგო, მიმდინარე სეზონში კი "ბარსა" სტუმრად 3-0 იგებდა, მაგრამ თამაში 3-3 დასრულდა.

აღსანიშნავია, რომ "ბარსელონას" "სელტასთან" ზედიზედ 2 მოგება 2014 წლის შემდეგ არ ჰქონია, მას შემდეგ კი გუნდებმა 17 შეხვედრა გამართეს.

ამ გუნდებს შორის "კამპ ნოუზე" გამართული 63 შეხვედრიდან 47 მასპინძლებმა მოიგეს, 4 სტუმრებმა, ხოლო 12 ფრედ დასრულდა. უკვე ხსენებულ გასული სეზონის წაგებამდე "ბარსას" ბოლო 6 თამაშში 5 მოგება და 1 ფრედ ჰქონდა.