43 წელია, ელჩე ბარსელონას გოლს ვერ უტანს

ზეგ "ბარსელონა" ლა ლიგის მორიგ შეხვედრას გამართავს. კატალონიური გუნდი "ელჩეს" უმასპინძლებს.

ჩავის გუნდს სამმატჩიანი მოუგებელი სერია აქვს. ამ წარუმატებელი სვლის შესაჩერებლად "ელჩე" საუკეთესო ვარიანტია და არა მხოლოდ იმიტომ, რომ ვალენსიელები მიმდინარე გათამაშების აუტსაიდერთა შორის შედიან. საქმე ისაა, რომ დიდი ხანია, "ელჩეს" "ბარსელონას" წინააღმდეგ თამაში ძალიან უჭირს.

"ელჩეს" "კამპ ნოუზე" არასდროს მოუგია. ამ გუნდებს შორის ბარსელონაში გამართული 26 დაპირისპირებიდან 19 მასპინძლებმა მოიგეს, ხოლო 7 ფრედ დასრულდა.

ვალენსიელებმა "ბარსა" ბოლო 1974 წელს დაამარცხეს. ეს ის დროა, იოჰან კრუიფი "ბლაუგრანაში" რომ თამაშობს. მას შემდეგ გუნდებმა 19 შეხვედრა ჩაატარეს, რომელთაგან 4 უგოლოდ დასრულდა, ხოლო 15 "ბარსამ" მოიგო, მათ შორის უკანასკნელი 6.

მოგებას ვინ ჩივის, "ელჩე" "ბარსელონას" კარში გოლის გატანასაც კი ვერ ახერხებს. ამ გუნდმა კატალონიელთა კარი ბოლოს 43 წლის წინ, 1978 წელს აიღო და ის მატჩიც 1-5 დათმო.