ბოლო სეზონი, როდესაც ბარსელონა ჩემპიონთა ლიგის ჯგუფში ჩარჩა

"ბარსელონა" ჩემპიონთა ლიგის ჯგუფში ჩარჩენასთან ძალიან ახლოსაა. მართალია, კატალონიელები მხოლოდ საკუთარ თავზე არიან დამოკიდებულნი, მაგრამ მიდი და მოუგე მიუნხენში "ბაიერნს", რომლის საუკეთესო ბომბარდირსაც რაღაც-რაღაცების დამტკიცების სურვილი აქვს.

თუ "ბარსამ" ჩემპიონთა ლიგის ჯგუფური ეტაპი ვერ დაძლია, ეს იქნება პირველი შემთხვევა ბოლო 21 წლის განმავლობაში. უკანასკნელად კატალონიელები ჯგუფში 2020/21 წლების სეზონში ჩარჩნენ.

21 წლის წინ ლორენსო სერა ფერერის გუნდი ჯგუფში "მილანთან", "ლიდსთან" და "ბეშიქთაშთან" ერთად მოხვდა. დასაწყისი იდეალური იყო - დაუვიწყარი საღამო "კამპ ნოუზე", მაგარი ფეხბურთი და "ლიდსთან" 4-0 მოგება.

მეორე ტურში კი სრულიად საპირისპირო სურათი ვიხილეთ - 0-3 წაგება თურქეთში "ბეშიქთაშთან".

მე-3 ტურში "ბლაუგრანას" სიტუაცია დამძიმდა - საკუთარ კედლებში "მილანთან" 0-2 წაგება.

შემდეგ იყო რივალდოს ჯადოქრობა "სან სიროზე", მაგრამ ბრაზილიელის სამი გოლი მხოლოდ ქულისთვის გამოდგა საკმარისი - 3-3.

მე-5 ტურში "ბარსამ" "ლიდსის" მფრინავ მეკარესთან, პოლ რობინსონთან ვერაფერი გააწყო და 90-ე წუთზე რივალდოს მიერ გატანილი გამათანაბრებელი გოლით მომდევნო ეტაპზე გასვლის შანსი შეინარჩუნა.

ბოლო ტურში კატალონიელების წინაშე ასეთი ამოცანა იყო - "კამპ ნოუზე" "ბეშიქთაში" უნდა დაგვემარცხებინა, პარალელურ მატჩში კი "მილანს" "ლიდსისთვის" ასევე საკუთარ კედლებში მოეგო. "ბარსამ" თურქული კლუბი 5-0 გაანადგურა. "მილანი" აგებდა და მართალია, გაათანაბრა, მაგრამ "ბარსელონას" ეს არ ეყო. არადა, "სან სიროზე" ანდრეი შევჩენკომ თერთმეტმეტრიანი ვერ გამოიყენა.