"ბარსელონამ" სატრანსფერო ბიუჯეტს 38 მილიონით გადააჭარბა

მადრიდული Marca-ს ინფორმაციით, "ბარსელონამ" "ლივერპულიდან" ფილიპე კოუტინიო უკანასკნელი თანხების მობილიზაციით შეიძინა.

გასულ ზაფხულში ცნობილი იყო, რომ "ბარსელონას", მიმდინარე სეზონში, ტრანსფერებისთვის, 60 მილიონი ევრო ჰქონდა გამოყოფილი. ამას ემატებოდა ფეხბურთელების გაყიდვიდან შემოსული თანხა.

კატალონიურმა კლუბმა, ნეიმარისა და კრისტიან ტელიოს გაყიდვით, 226 მილიონი ევრო გამოიმუშავა, რაც იმას ნიშნავს, რომ სატრანსფერო ბიუჯეტმა 286 მილიონი ევრო შეადგინა.

კოუტინიოს ტრანსფერის გათვალისწინებით, "ბარსელონამ", მიმდინარე სეზონში, უკვე 312 მილიონი ევრო დახარჯა. ამას დავუმატოთ იერი მინას ტრანსფერი, რომელშიც კატალონიელები 12 მილიონ ევროს გადაიხდიან. გამოდის, რომ "ბარსა" 324 მილიონს ევროს დახარჯავს, რაც დასაშვებზე 38 მილიონი ევროთი მეტია.

"ბარსელონას" სხვაობის ანაზღაურება ფეხბურთელების გაყიდვით მოუწევს. წასვლის კანდიდატები ანდრე გომეში, არდა თურანი, ხავიერ მასკერანო, ალეიშ ვიდალი და ჟერარ დეულოფეუ არიან.

"ბარსელონას" ფინანსურ პრობლემებს ისიც ამძაფრებს, რომ იკლო მუზეუმიდან და "კამპ ნოუს" ბილეთების გაყიდვიდან შემოსულმა თანხებმა, ხოლო ახალი სპონსორების მოძიება კატალონიაში შექმნილი პოლიტიკური ვითარების გამო ჭირს.