გამპერის თასის სპოტიფაი კამპ ნოუზე ჩატარება თითქმის გამორიცხულია

რაც დრო გადის, უფრო და უფრო რთული წარმოსადგენია, რომ "ბარსელონამ" 2025 წლის გამპერის თასის გათამაშებას "სპოტიფაი კამპ ნოუზე" უმასპინძლოს.

გამპერის თასის წლევანდელი თამაში 10 აგვისტოს გაიმართება. ცნობილია მეტოქეც - იტალიური "კომო", რომელსაც "ბარსას" ყოფილი ფეხბურთელი სესკ ფაბრეგასი წვრთნის. თუმცა ჯერ კიდევ უცნობია, თუ რომელ სტადიონზე გაიმართება შეხვედრა.

განახლებულ სტადიონზე თამაშების ჩასატარებლად "ბარსელონას" ქალაქის მერიისგან ნებართვა სჭირდება. ეს მხოლოდ იმ შემთხვევაში მოხდება, თუ არენის პირველი და მეორე იარუსების მშენებლობა დასრულებული იქნება. ამჟამად პირველ ორ იარუსზე სამუშაოები გრძელდება, რაც იმას ნიშნავს, რომ ამ ეტაპზე "ბლაუგრანა" საჭირო ნებართვას ვერ მიიღებს.

COPE-ს ცნობით, თითქმის შეუძლებელია, რომ კატალონიურმა კლუბმა ნებართვა დროულად მიიღოს და 10 აგვისტოს "სპოტიფაი კამპ ნოუზე" თამაშის უფლება მოიპოვოს.

ამჟამად "ბარსელონას" მთავარი საზრუნავი სტადიონის სექტემბრის შუა რიცხვებისთვის მზადყოფნაში მოყვანაა. სწორედ ამ დროს გამართავს "ბლაუგრანა" ლა ლიგის პირველ საშინაო შეხვედრას "ვალენსიასთან".