ჰანსი ფლიკი ნოა დარვიხის ბარსელონაში დარჩენის მომხრეა

18 წლის ნოა დარვიხის მომავალი "ბარსელონაში" გაურკვეველია. ახალგაზრდული გუნდის, "ბარსა ატლეტიკის", სეგუნდა ფედერასიონში დაქვეითების შემდეგ, დარვიხი რთული არჩევანის წინაშეა - მიიღოს გერმანული კლუბების შემოთავაზებები, მათ შორის, "შტუტგარტისა" და "ბაიერისგან", ან დარჩეს "ბარსელონაში", სადაც მთავარი გუნდის შემადგენლობაში ადგილი ჯერ კიდევ გარანტირებული არ აქვს, მიუხედავად ჰანსი ფლიკის მხრიდან გამოხატული ინტერესისა.

გერმანელი ნახევარმცველი რამდენიმე კლუბის დაკვირვების ქვეშ იმყოფება. "შტუტგარტი", ლევერკუზენის "ბაიერი" და "მანჩესტერ სიტიც" კი ინტერესდებიან მისი გადაბირებით. დარვიხმა "ბარსელონასთან" კონტრაქტი 2023 წელს გააფორმა - 3-წლიანი ხელშეკრულება + 2 წლით გაგრძელების ვარიანტით, რაც უეფას რეგულაციითაა გათვალისწინებული 18 წლამდე ფეხბურთელებისთვის. მისი კონტრაქტი 1 მილიარდი ევროს გამოსასყიდ პუნქტს მოიცავს. ამ ეტაპზე დარვიხი ყურადღებას U-19-ის ევროპის ჩემპიონატზე ამახვილებს.

წინა მწვრთნელების, ალბერტ სანჩესისა და სერჟი მილას დროს, დარვიხს შანსი იშვიათად ეძლეოდა, თუმცა ჰანსი ფლიკმა მასზე ღიად გამოთქვა ინტერესი. გერმანელმა სპეციალისტმა დარვიხი ლა ლიგის მატჩებისთვის, "სელტასა" და "ვალიადოლიდის" წინააღმდეგ, მთავარ გუნდში გამოიძახა, თუმცა ახალგაზრდა ფეხბურთელს მოედანზე დებიუტი არ ჰქონია. კლუბის სანდო წყაროებმა Mundo Deportivo-ს აცნობეს, რომ ფლიკი აფასებს დარვიხის პოტენციალს, თუმცა აღნიშნავს, რომ "ბარსელონას" ნახევარდაცვაში კონკურენცია ძალიან მაღალია.