ვინ არის პედრისთვის ლევანდოვსკის იდეალური ჩამნაცვლებელი

პედრის მიაჩნია, რომ "ბარსელონამ" რობერტ ლევანდოვსკის გრძელვადიანი ჩამნაცვლებელი უნდა მოძებნოს, - ამის შესახებ ინფორმაცია GOAL-მა გამოაქვეყნა.

როგორც ვკითხულობთ, ახალგაზრდა ესპანელი ნახევარმცველისთვის ოპტიმალური ვარიანტი ერლინგ ჰოლანდის შეძენაა, რომელსაც "მანჩესტერ სიტის" მაისურით ყველა ტურნირზე, 75 თამაშში 71 გოლი და 14 საგოლე გადაცემა აქვს მითვლილი. ცხადია, ამ სტატისტიკით ნორვეგიელი თავდამსხმელი პოლონელს ერთიორად აღემატება, რადგან ლევანდოვსკი 2023/2024 წლების სეზონში თავისივე სტანდარტების დაკმაყოფილებას ვერ ახერხებს, რის გამოც მას არაერთი გულშემატკივარი ობიექტურად აკრიტიკებს.

ირკვევა, რომ ერლინგ ჰოლანდის შეძენის სურვილი პედრიმ Twitch-ის პირდაპირ ეთერში დააფიქსირა, როდესაც მას ჰკითხეს თუ ვინ იქნებოდა "ბარსელონასთვის" ლევანდოვსკის იდეალური ჩამნაცვლებელი. ამ კითხვაზე პედრიმ თქვა, რომ 19-22 წლის ასაკში ულაპარაკოდ ლიონელ მესის აირჩევდა, მაგრამ დღევანდელ რეალობაში ერლინგ ჰოლანდი მისთვის უკონკურენტო ვარიანტს წარმოადგენს.