მზადება ზამთრის სატრანსფერო ფანჯრისთვის

ჩავი ერნანდესი კატარში გასამართ მსოფლიო ჩემპიონატზე განსაკუთრებული სტუმარი იქნება. კატალონიელი სპეციალისტი მუნდიალზე ჯგუფური ეტაპის ბოლო ტურზე ჩავა, თუმცა მანამდე მას მნიშვნელოვანი საქმე აქვს.

კატალონიური სპორტული გამოცემების, Sport-ისა და Mundo Deportivo-ს დღევანდელი ნომრების მთავარი განსახილველი თემა იანვრის სატრანსფერო ფანჯარაა.

ადგილობრივი მედიის ცნობით ჩავი კატარში წასვლამდე კლუბის სპორტულ დირექტორს, მატეუ ალემანისა და სპორტულ მრჩეველს, ჟორდი კრუიფს შეხვდება. შეხვედრის თემა იანვრის სატრანსფერო ფანჯარა იქნება.

“ბარსელონას” იანვარში სატრანსფერო ბაზარზე გასვლა ჩვეულებრივ, შეზღუდვის გარეშე შეუძლია. შესაძლოა, ამისთვის მემფის დეპაის გაყიდვა გახდეს საჭირო, მაგრამ კლუბს სხვა შეზღუდვა არ ექნება. ზაფხულში კი ტრანსფერები დიდი რისკის ქვეშაა – ხავიერ ტებასის თქმით “ბარსას” სახელფასო ხარჯის დაახლოებით 200 მილიონი ევროთი შემცირება მართებს და თუ ეს ვერ მოახერხა, ზაფხულში კლუბზე 4:1 წესი ამოქმედდება. ეს წესი ნიშნავს, რომ ტრანსფერებში შეგიძლია შენი შემოსავლის მხოლოდ ერთი მეოთხედი დახარჯო, ეს კი ძალიან პრობლემური შეზღუდვაა.

ვინაიდან “ბარსას” გარანტია არ აქვს, რომ ზაფხულამდე სახელფასო ხარჯს შეამცირებს, ზამთარში ტრანსფერების მოსწრება აუცილებელია.

კლუბში შეთანხმდნენ, რომ პრიორიტეტული მარჯვენა მცველია. Sport-ის ცნობით ამ პოზიციაზე ფავორიტები ფოიტი და პავარი არიან, მათ ალტერნატივებად კი სინგო, დალო და ფრიმპონგი განიხილებიან.

პრიორიტეტებში მეორე ადგილზე მოდის ცენტრალური ნახევარმცველი, რომელსაც თამაში საყრდენადაც შეუძლია.