დე ლიხტი "ბარსელონას" ელის - "იუვენტუსს" ბარტერი სურს

გასული წლის ზაფხულში ნათელი იყო, რომ "ბარსელონა" მატიას დე ლიხტის შეძენას ლამობდა. მიუხედავად დიდი სურვილისა, ნიდერლანდელი "ბლაუგრანაში 2 მიზეზით არ აღმოჩნდა.

1. გარანტია არ ჰქონდა, რომ იმ კლუბში ბევრი სათამაშო დრო ექნებოდა, სადაც ჟერარ პიკე, კლემან ლანგლე და სამუელ უმტიტი თამაშობდნენ.

2. "ლურჯ-ბროწეულისფერები" ფეხბურთელის მიერ მოთხოვნილ მაღალ ხელფას ვერ დააკმაყოფილებდნენ (12 მილიონი სეზონის განმავლობაში, + ბონუსები).

ამჟამად სიტუაცია რადიკალურად შეიცვალა - ჟოზეპ მარია ბართომეუ სამუელ უმტიტის გაყიდვას შეეცდება, ლანგლემ დიდი როლი დაკარგა, პიკე კი უკვე 33 წლისაა.

20 წლის მცველის "კამპ ნოუზე" გადაბარგებაში, შესაძლოა, დიდი როლი არტურ მელომ ითამაშოს. Mundo Deportivo-ს ინფორმაციით, "იუვენტუსი" ბრაზილიელის ხელში ჩაგდებას ბარტერით აპირებს - "ბარსელონამ" მირლემ პიანიჩის, ფედერიკო ბერნანდესკის, როდრიგო ბენტაკურისა და დე ლიხტის კანდიდატებს შორის არჩევანი უნდა გააკეთოს.

თავის მხრივ, ხსენებული წყარო დასძენს, რომ თავად ფეხბურთელი "ბებერი ქალბატონის" რიგებში თავს კომფორტულად გრძნობს, თუმცა "ბარსას" ინტერესის შემთხვევაში, მოლაპარაკებებზე წასვლას არ გამორიცხავს.

აქვე უნდა ვახსენოთ, რომ Marca-ს ცნობებით, კიკე სეტიენი არტურ მელოს გაყიდვას არ აპირებდა, რადგან ვეტერანების, არტურო ვიდალისა და ივან რაკიტიჩის "კამპ ნოუდან" სავარაუდო გადაბარგება კატალონიურ კლუბს გარკვეულ პრობლემებს შეუქმნის.