ოფიციალურად: მუსა ვაგე "ნიცაში" გადავიდა

"ბარსელონას" 21 წლის მარჯვენა მცველი მუსა ვაგე, სეზონის ბოლომდე, ფრანგულ "ნიცაში" ითამაშებს. ტრანსფერი რამდენიმე წუთის წინ გაოფიციალურდა.

"ბლაუგრანას" მიერ გავრცელებული ოფიციალური განცხადების თანახმად, ვაგე "ნიცაში" იჯარით ითამაშებს. სეზონის ბოლოს, ფრანგებს მისი 10 მილიონ ევროდ გამოსყიდვის უფლება ექნებათ. ბონუსების სახით კიდევ ნახევარი მილიონია გათვალისწინებული.

თუ სეზონის ბოლოს "ნიცამ" ვაგე გამოისყიდა, მომდევნო ერთი წლის განმავლობაში, "ბარსას" მისი 15 მილიონ ევროდ დაბრუნების უფლება ექნება. ამ ვადის გასვლის შემდეგ კი, კატალონიელები უპირატესი შესყდვის უფლებით ისარგებლებენ.

მუსა ვაგე "ბარსელონაში" 2018 წლის ზაფხულში გადმოვიდა, პირველ გუნდში კი გასულ წელს დაწინაურდა. მან "ბარსა ბ"-ში 20, პირველ გუნდში კი 6 შეხვედრა ჩაატარა.

ვაგეს წასვლის შემდეგ, "ბარსელონას" პირველ გუნდში მხოლოდ 18 მოთამაშე დარჩა.

სენეგალელი ფეხბურთელის "ნიცაში" გადასვლა ზამთრის სატრანსფერო ფანჯრის დახურვამდე ერთი საათით ადრე გაოფიციალურდა და "ბარსელონამ" ამ ფანჯარაზე აქტიურობა დაასრულა.