"ბარსელონას" შემტევმა ტრიომ თავისი რიტმი იპოვა
Marca-ს აზრით, "ბარსელონას" შემტევმა ტრიომ თავისი რიტმი იპოვა.
მიუხედავად სეზონის უღიმღამო დასაწყისისა, მესიმ, სუარესმა და გრიზმანმა შეძლეს შეთამაშებულიყვნენ. "ალავესი" 2019 წელს მათი ბოლო მსხვერპლი იყო, რომელსაც სამივე შემტევმა გოლი გაუტანა. მესის, სუარესსა და გრიზმანს ლა ლიგაში უკვე 30 გოლი დაუგროვდათ, რაც ჩემპიონატში მოასპარეზე 16 გუნდის მაჩვენებელზე მეტია.
საშობაო შესვენების წინ "ბარსელონა" ლა ლიგას 39 ქულით ლიდერობს. ამაში დიდი წვლილი სწორედ შემტევ ტრიოს მიუძღვის. სეზონის დასაწყისის ფონზე რთული იყო იმის წინასწარმეტყველება, რომ ტრიო ასე ეფექტურად ათამაშდებოდა.
სეზონის სტარტზე ლიონელ მესი ტრავმირებული იყო და ბევრი მატჩის გამოტოვება მოუწია. არგენტინელმა დაბრუნების შემდეგ 13 გოლი გაიტანა და ბომბარდირთა სათავეშიც მოექცა. ლუის სუარესმა ფეხბურთის გულშემატკივრებს თავი "მალიორკას" წინააღმდეგ ქუსლით გატანილი გოლით დაამახსოვრა. "ალავესთან" მატჩში კი გოლი და სამი საგოლე გადაცემა მიითვალა.
გრიზმანს ლა ლიგაში უკვე 7 გოლი დაუგროვდა. მართალია, ეს საუკეთესო შედეგი არ არის, თუმცა ფაქტია, რომ ფრანგი როგორც მთლიან გუნდს, ისე მესისა და სუარესს შეეგუა.
ამ სიახლეზე კომენტარები გათიშულია.
კომენტარები [ 8 ]