პირველად რადომირ ანტიჩის შემდეგ

წინასწარ ბოდიშს ვუხდი ბატონი რადომირის სულ იმის გამო, რომ მისი კიკე სეტიენთან შედარება მიწევს.

რადომირ ანტიჩი “ბარსელონას” გულშემატკივრების ახალ თაობაში ბევრს არ ეცოდინება. ახლახანს გარდაცვლილი სპეციალისტი “ბლაუგრანას” 2003 წელს, რამდენიმე თვის განმავლობაში წვრთნიდა და მიუხედავად იმისა, რომ მან დასახულ ამოცანას თავი შესანიშნავად გაართვა, მაინც გვიწევს ეს ძალიან კარგი სპეციალისტი კიკე სეტიენს შევადაროთ.

ცოტა ხნის წინ ცნობილი გახდა, რომ “ბარსელონამ” კიკე სეტიენი დაკავებული თანამდებობიდან გაათავისუფლა. ეს კი იმას ნიშნავს, რომ 61 წლის სპეციალისტმა “ბარსელონა” უტიტულოდ და “კლასიკოში” მოგების გარეშე დატოვა. არც ერთი და არც მეორე, ანტიჩის შემდეგ, არცერთ სპეციალისტს არ მოსვლია.

ფრანკ რაიკარდმაც, პეპ გვარდიოლამაც, ლუის ენრიკემაც და ერნესტო ვალვერდემაც “რეალის” განადგურება მოახერხეს, ერთი “კლასიკო” ტიტო ვილანოვამაც მოიგო. თვით ტატა მარტინომაც კი, “სამეფო კლუბი” ლა ლიგის ორივე “კლასიკოში” დაამარცხა. ყველა ამ მწვრთნელმა “ბარსელონას” მინიმუმ 1 ტიტული მოაგებინა. კიკე სეტიენმა კი თავი ვერც “კლასიკოში” გამოიჩინა და ვერც სხვა თამაშებში.

შედეგის იდენტურობის მიუხედავად, რატომ ითვლება რადომირ ანტიჩი “ბარსელონას” ისტორიაში წარმატებულ მწვრთნელად და კიკე სეტიენი ერთ-ერთი ყველაზე ცუდ სპეციალისტად? ანტიჩმაც, სეტიენის მსგავსად, გუნდი იანვარში ჩაიბარა, მაგრამ თუ სეტიენს ლიდერი “ბარსა” შეხვდა, ანტიჩს მე-15 ადგილზე, გასავარდნ ზონასთან 3 ქულაში მყოფი “ბლაუგრანა” უნდა გადაერჩინა. გადაარჩინა კიდეც – მე-6 ადგილზე და უეფას თასზე გაიყვანა, რაც ძალიან კარგი შედეგი იყო. გუნდმა ჩემპიონთა ლიგის მე-2 ჯგუფური ეტაპის დარჩენილი ნაწილიც მაღალ დონეზე ჩაატარა და 1/8-ფინალში “იუვენტუსთან” დამატებით ტაიმებში დამარცხდა. და ეს მაშინ, როდესაც გუნდიდან უკვე წასული იყო რივალდო, ჯერ მისული არ იყო რონალდინიო და სეტიენისგან განსხვავებით, ანტიჩს არც ისტორიაში საუკეთესო ფეხბურთელი ჰყავდა.

შემდეგ “ბარსელონას” სათავეში ჟოან ლაპორტა მოვიდა და კატალონიელთა ისტორიაში ახალი ფურცლის წერა დაიწყო.