ატლეტიკოს მორიგი უარი: ხულიან ალვარესი არ იყიდება!

მადრიდის “ატლეტიკოს” აღმასრულებელმა დირექტორმა, მიგელ ანხელ ხილ მარინმა კლუბის ოფიციალურ მედიასთან ინტერვიუში ხულიან ალვარესის მომავალსა და “ბარსელონას” ინტერესზე ვრცლად ისაუბრა. როგორც ცნობილია, არგენტინის ნაკრებთან ერთად მსოფლიო ჩემპიონატზე მყოფმა თავდამსხმელმა განაცხადა, რომ “ოცნების ასახდენად” კლუბის დატოვება სურდა, რაშიც კატალონიურ კლუბში გადასვლა იგულისხმებოდა.

მიუხედავად ამისა, “ატლეტიკოს” პოზიცია პირველივე წუთიდან ურყევია. ფეხბურთელს კლუბთან კონტრაქტი 2030 წლამდე აკავშირებს, მისი გამოსასყიდი თანხა კი 490 მილიონ ევროს შეადგენს.

პასუხი ლაპორტასა და უარი მილიონებზე

ჟოან ლაპორტამ ცოტა ხნის წინ აღნიშნა, რომ ალვარესის თაობაზე გაკეთებულ შეთავაზებას კონკრეტული ვადა ჰქონდა. ხილ მარინმა მას მკაცრი პასუხი გასცა და ხაზი გაუსვა, რომ მადრიდელები გარიგებას არცერთ შემთხვევაში არ დათანხმდებიან.

“ჩემი პოზიცია ნათელია, კლუბის პოზიცია ნათელია, ეს განვუცხადეთ ფეხბურთელსაც, აგენტსაც და “ბარსელონას” პრეზიდენტსაც. ეჭვი არ მეპარება, რომ “ატლეტიკო” ხულიანისთვის საუკეთესო ადგილია, ხულიანი კი – სრულყოფილი თავდამსხმელი “ატლეტიკოსთვის”. ჩვენ გვსურს, რომ მასთან თანამშრომლობა გავაგრძელოთ.”

მან პირდაპირ უპასუხა ლაპორტას სიტყვებს:

“უბრალოდ მოვისმინე პრეზიდენტის განცხადებები, რომ მათი შეთავაზება დროში უსასრულო არ იყო. ჩვენი პასუხი კი ის არის, რომ ჩვენი უარი ნამდვილად უსასრულოა, არ გვსურს მისი გაყიდვა. არ ვიღებთ 100 მილიონიან შეთავაზებას და არ მივიღებთ არც 150 და არც 200 მილიონს”.

“საინფორმაციო ცირკი” და ფიფაში ჩივილის მუქარა

ხილ მარინმა კატალონიური კლუბი საქმისადმი არაკეთილსინდისიერ მიდგომაში დაადანაშაულა. ზაფხულის დასაწყისში ის “ბარსელონას” ფიფაში ჩივილითაც დაემუქრა, რადგან კატალონიელები ფეხბურთელს კონტრაქტის დაცულ პერიოდში (25 წლამდე ფეხბურთელებისთვის პირველი სამი წელი) დაუკავშირდნენ.

“საკმარისად კარგად ვიცნობ მეტოქე კლუბის გარემოცვას, რათა ვიცოდე, რომ მედიისა და გულშემატკივრების წინაშე ისინი თავიანთი პერსონალური ცირკის დადგმას ცდილობენ, ამიტომ ეს არ მაბრაზებს. “ბარსელონას” პრეზიდენტთან კარგი პირადი ურთიერთობა მაქვს და პირდაპირ ვთხოვე, რომ გაჩერებულიყო, განვუმარტე, რომ ხულიანი არ იყიდება. მიუხედავად ამისა, ისინი ამ პოზიციას ინარჩუნებენ, რადგან ეს საინფორმაციო და სოციალურ თამაშს კვებავს. მათ მშვენივრად იციან, რომ ხულიან ალვარესი მომავალ სეზონში “ბარსელონაში” არ ითამაშებს. დასაგმობია ის, რომ ამ ნარატივს ინარჩუნებენ თავიანთი გულშემატკივრების და, რაც უფრო უარესია, თავად ფეხბურთელის წინაშე”.

აგენტის ფაქტორი და ფეხბურთელის მომავალი

“ატლეტიკოს” დირექტორი შექმნილ სიტუაციაში თავად ფეხბურთელს ამართლებს და მთავარ პასუხისმგებლობას მის აგენტს, ფერნანდო იდალგოს აკისრებს.

“მიმაჩნია, რომ სეზონის დასრულების შემდეგ მას ცუდი რჩევები მისცეს, მაგრამ დარწმუნებული ვარ, მისი თამაში და ქცევა კვლავ უნაკლო იქნება, რაც შეესაბამება მის, როგორც დიდი მოთამაშის, კარგი ადამიანისა და ბრწყინვალე პროფესიონალის პროფილს. ჩვენ ვიცნობთ ხულიანს ამ ორი სეზონის განმავლობაში და ეჭვი არ გვეპარება მის ადამიანურ და პროფესიონალურ თვისებებში.”

დასასრულს, მარინმა დასძინა, რომ არგენტინელს გულშემატკივრებთან ურთიერთობის აღდგენა მოუწევს და ამისთვის კონკრეტული რეცეპტიც არსებობს:

“ატლეტიკოს” გულშემატკივარმა ძალიან კარგად იცის, რა სურს: თავდადებული და შედეგიანი ფეხბურთელები. ნებისმიერი ქომაგის და პირადად ჩემი ოცნებაა, ვნახოთ როგორ გააქვს ხულიანს გოლები და იგებს ტიტულებს ჩვენი მაისურით და დარწმუნებული ვარ, ასეც იქნება”.