ოფიციალურად: ბარსელონა მონაწილეობას სამთა ტურნირში მიიღებს

“ბარსელონას” მამაკაცთა საფეხბურთო გუნდი 2026/2027 წლების სეზონის დაწყებისთვის მზადებას აგრძელებს და შაბათს, 8 აგვისტოს, იტალიის ქალაქ უდინეში, “ბლუენერჯი სტედიუმზე” Friuli Venezia Giulia Cup-ის საერთაშორისო ტურნირის სადებიუტო გათამაშებაში მიიღებს მონაწილეობას.

კატალონიელები მასპინძელ “უდინეზესა” და “ნოტინგემ ფორესტთან” ერთად სამთა ტურნირში იასპარეზებენ. ეს ტურნირი ევროპის 3 ტოპ ლიგის კლუბებს აერთიანებს და სამივე გუნდს შიდა ჩემპიონატების დაწყებამდე მომზადების კიდევ ერთ შესაძლებლობას აძლევს.

ტურნირი “უდინეზეს” ორგანიზებით ტარდება და ფრიული-ვენეცია-ჯულიას რეგიონის ხელმძღვანელობით შექმნილი საერთაშორისო სარეკლამო ინიციატივის ნაწილია, რომელიც სპორტის საშუალებით ამ ტერიტორიის საერთაშორისო ცნობადობის ამაღლებას ისახავს მიზნად.

“ბარსელონასთვის” ეს ტურნირი უდინეში დაბრუნება იქნება. კლუბი ქალაქს ბოლოს თითქმის 21 წლის წინ, 2005 წლის 7 დეკემბერს სტუმრობდა, როდესაც უეფას ჩემპიონთა ლიგის ჯგუფურ ეტაპზე “უდინეზეს” დაუპირისპირდა.

სამთა ტურნირის ფორმატი

შეჯიბრება სამგუნდიანი ფორმატით ჩატარდება, სადაც სამი მატჩი გაიმართება. თითოეული შეხვედრის ხანგრძლივობა 45 წუთი იქნება. მატჩების განრიგი შემდეგნაირია:

• “უდინეზე” – “ნოტინგემ ფორესტი” (თბილისის დროით 22:00 საათი)
• “ბარსელონა” – “ნოტინგემ ფორესტი”
• “უდინეზე” – “ბარსელონა”

თუ რომელიმე მატჩი 45 წუთის შემდეგ ფრედ დასრულდება, გამარჯვებულის ვინაობას პენალტების სერია გაარკვევს. ძირითად დროში გამარჯვებისთვის გუნდები 3 ქულას მიიღებენ, პენალტების სერიაში მოგებისთვის – 2 ქულას, ხოლო პენალტებში მარცხისთვის – 1 ქულას.

გამორჩეული მასპინძელი სტადიონი

უდინეს “ბლუენერჯი სტედიუმი” უეფას სუპერ თასის მასპინძლობის შემდეგ, კიდევ ერთ საერთაშორისო ღონისძიებას მიიღებს. სტადიონი, რომელიც თავდაპირველად “სტადიო ფრიულის” სახელით იყო ცნობილი, 1976 წელს გაიხსნა, თუმცა დაახლოებით ერთი ათწლეულის წინ დიდი რეკონსტრუქცია ჩაუტარდა და ახლა 25,144 მაყურებელს იტევს.