ერნესტო ვალვერდე პსვ-სთან მატჩის წინ
"ბარსელონას" დამრიგებელმა, ერნესტო ვალვერდემ, ჩემპიონთა ლიგის მე-4 ტურში პსვ-სთან გასამართი მატჩის წინ, ჟურნალისტების კითხვებს პრესკონფერენციაზე უპასუხა.
"პრობლემები მთელი სეზონის განმავლობაში გვაქვს. ჩემპიონთა ლიგის წინა ორი თამაში მესის გარეშე ჩავატარეთ. პსვ-სთან მატჩში ჩვენი მიზანი მოგებაა და შევეცდებით ამას არსებული რესურსით მივაღწიოთ.
ტრავმები? ამას ლოგიკური ახსნა აქვს. თითქმის ყველა შემთხვევაში პრობლემა ეროვნულ გუნდში მოთამაშე ფეხბურთელს აქვს. არტურისთვის ეს სიახლეა. გვინდა, რომ ჩვენმა ფეხბურთელებმა ნაკრებში ითამაშონ, მაგრამ ამის გამო ჩვენ ვზარალდებით.
"ლა მასია"? გარედან ყველაფერი კარგად ჩანს. თუმცა, მე ჯერ ჩემს პირველ გუნდს ვაქცევ ყურადღებას და შემდეგ მეორეს.
ვფიქრობ, რაკიტიჩი და კოუტინიო თამაშს შეძლებენ.
ვიცით, რა სხვაობაა ჯგუფში პირველ და მეორე ადგილზე გასვლას შორის. პირველ ადგილზე გასასვლელად ამ თამაშის მოგებაა საჭირო და სწორედ ამის გაკეთებას შევეცდებით.
შიდა ჩემპიონატში საკმაოდ ბევრ გოლს ვუშვებთ, მაგრამ ჩემპიონთა ლიგაზე, ამ მხრივ, კარგად გამოვიყურებით. ბევრ მომენტს ვქმნით და ცოტა გოლს ვუშვებთ. ლა ლიგაში კი არის თამაშები, რომლებითაც აღფრთოვანებულები არ ვართ.
რაკიტიჩის ახალ კონტრაქტზე სათქმელი არაფერი მაქვს. ვნახოთ, რა მოხდება. სეზონი გრძელია.
მერჩივნა, ლუის სუარესი ჯანმრთელი ყოფილიყო, მაგრამ ეს მას ეხმარება. ის ისვენებს და შემდეგ უკეთ თამაშობს.
პსვ-ს პატივს ვცემთ. ამ გუნდმა, ჰოლანდიის ჩემპიონატში, 13 წაუგებელი თამაში ჩაატარა. მეტოქეს აქვს მკაფიო იდეა, კარგად ორგანიზებული გუნდი და ჰყავს სწრაფი ფეხბურთელები.
რაფინიას ტრავმის გამო ვწუხვარ.
მოდით, ზამთრის სატრანსფერო ფანჯარაზე ჯერ ნუ ვისაუბრებთ.
პირველ გუნდში გვყავს კარლეს ალენია, ასევე რიკი პუჩი, კოლიადო, მონჩუ და ორიოლ ბუსკეტსი ჩვენთან ხშირად ვარჯიშობენ და ისინიც ჩვენს განკარგულებაში არიან.
დემბელეს მიერ გატანილი გოლი მისთვის და ყველასთვის მნიშვნელოვანი იყო. ნამდვილად გვქონდა იმედი, რომ ის დაგვეხმარებოდა. გოლი თავდაჯერებას ყოველთვის გმატებს და ის ყოველთვის ეცდება მაქსიმუმი გაიღოს, როდესაც თამაშის შანსი მიეცემა.
სემედუმ, ჩვენთან მოსვლის შემდეგ, სერიოზული პროგრესი განიცადა, განსაკუთრებით შეტევაში თამაშის მხრივ. ის ძალიან სწრაფია და კარგად გვეხმარება, მაგრამ იმედი გვაქვს, რომ კიდევ მოუმატებს."
ამ სიახლეზე კომენტარები გათიშულია.
კომენტარები [ 10 ]