როდის ვბრუნდებით კამპ ნოუზე?

ჰოდა, ახლა რაშია საქმე. ხელმძღვანელებს აღარ შეუტანიათ “მონჟუიკზე” თამაშის განაცხადი, შესაბამისად, იქ თამაშის უფლებაც არ ექნებათ, არ არსებობს გეგმა B. ეს ნიშნავს, რომ “კამო ნოუზე” დასაბრუნებლად ყველა მზად არის, მაგრამ მოდი მაინც გადავხედოთ დეტალებს. 

სამუშაოები 2023 წელს დაიწყო, მიზნად სტადიონის ინფრასტრუქტურის განახლება და ტევადობის გაზრდა დაისახეს. 105’000 ადამიანზე გათვლილი სტადიონი ევროპაში ყველაზე დიდი იქნება. დაიგეგმა 2024 წლის ნოემბერში გახსნა, ამ დროისთვის 60’000 ადგილი უნდა ყოფილიყო მზად, მაგრამ ვერ მოესწრო. თავდაპირველი თარიღი ლიმაკის პრეზიდენტმა, ებრუ ოზდემირმა განსაზღვრა, ამის შესახებ El Periodico-სთან ინტერვიუში ისაუბრა. ლიმაკი სამშენებლო კომპანიაა, რომელმაც “კამპ ნოუ” 2023 წელს ჩაიბარა. 

შემდეგ იყო “ბარსას” ვიცე-პრეზიდენტის ელენა ფორტის ინტერვიუ EFE ნიუსთან – “ყველაფერი გეგმის მიხედვით მიდის, სტადიონი მომავალი წლის დასაწყისისთვის მზად იქნება“, – ასე თქვა, მაგრამ ისევ გადაიდო გახსნა. 

ერთადერთი ჟოან ლაპორტა იკავებდა თავს თარიღის დასახელებისგან – “არ მინდა წინასწარ ამაზე საუბარი, პროცესი ბევრ რამეს ცვლის, ბევრი გაუთვალისწინებელი რამ იქნება მოსაგვარებელი, შეიძლება ადრე გაიხსნას, შეიძლება გვიან”. 

შემდეგ ისევ ითქვა თებერვალზე, ისევ ითქვა, რომ ყველაფერი გეგმის მიხედვით მიდის, მერე კი სიტყვა უკან წაიღეს და თქვეს, რომ სეზონის ბოლომდე “კამპ ნოუზე” ვერ დავბრუნდებითო. 

RAC1-თან ინტერვიუში ელენა ფორტმა 2025 წლის იანვარში თქვა – “არ ვიცი ზუსტად როდის, მაგრამ სეზონის დასრულებამდე დავბრუნდებით”, – ოპა, ისევ ააცილა. 

მანამდე კი “ბარსა” აგრძელებდა თამაშს “მონჟუიკზე”, რომელიც 40’000 ადამიანით ნაკლებს იტევს, ვიდრე “კამპ ნოუ”, და ბილეთებიდან მიღებული შემოსავალი მთლიანად სტადიონის ქირაში მიდიოდა. საბოლოოდ, ორი წლის განმავლობაში “ბარსამ” ქირაში 180 მილიონი ევრო გადაიხადა. ( 90 მილიონი ევრო ერთ სეზონში). 

ბოლოს ითქვა რომ თუ “ბარსა” მართლაც 10 აგვისტოს დაბრუნდა სახლში, სტადიონზე მხოლოდ 25’000 ადამიანი შეძლებს მისვლას. 

“სამუშაოები დროულად და კარგად უნდა შესრულდეს იმისათვის, რომ პირველი ორი იარუსი შეამოწმონ და გახსნის ლიცენზია მიიღოს, – თქვა ლაია ბონემ, ქალაქ ბარსელონას ვიცე-მერმა, – სტადიონი ჯერ მზად არ არის და კიდევ გაივლის შემოწმებას”. 

ამას მოჰყვა ფორტის ინტერვიუ La Vanguardia-სთან, – “სტადიონის განახლება სრულად 2026 წლის ზაფხულში დასრულდება. სახურავის გამოკლებით, გადახურვის სამუშაოები მცირე დროს კიდევ გაგრძელდება, მაგრამ სხვა ყველაფერი მზად იქნება”. 

 

არსებობს თუ არა შეთანხმება? 

თავის დროზე ჟოან ლაპორტამ თქვა – “ლიმაკთან კონტრაქტი გავაფორმეთ და ისინი გარანტიას იძლევიან, რომ სტადიონს 2024 წლის ნოემბერში ჩაგვაბარებენ, და თუ ასე არ მოხდა ყოველ გადაცილებულ დღეზე ერთ მილიონ ევროს მივიღებთ”, – თუ ნამდვილად არსებობდა ეს შეთანხმება მაშინ “ბარსას” 200 მილიონზე მეტი უკვე უნდა ჰქონდეს გამომუშავებული. მერე კი აღმოჩნდა, რომ მსგავსი პუნქტი კონტრაქტში ჩადებული არ ყოფილა. 

დავიწყებთ თუ ვერა? 

კლუბმა თქვა რომ ალტერნატიული გზა არ განიხილება, მაგრამ ფორტმა მაინც აგვრია ინტერვიუში – “შეიძლება, რომ გამპერის თასი იოჰან კრუიფის არენაზე ჩატარდეს? (“ბარსას” სავარჯიშო მოედანი”) კი, 100%-ით ვერაფერს ვიტყვით, ყოველთვის შეიძლება რაღაც გაუთვალისწინებელი მოხდეს. სტადიონმა უნდა გაიაროს შემოწმება მერიის, უეფასა და ლა ლიგის მხრიდან, ივლისის პირველი ნახევარი ვადების დადგენაში გადამწყვეტი იქნება”. 

“ბარსამ” ლა ლიგასგან პირველი სამი მატჩის გასვლაზე თამაში მოითხოვა, რათა მანამდე სახლის მოწესრიგება მოესწროს. ჩემპიონთა ლიგის შეხვედრები კი 16 სექტემბერს აიღებს სტარტს. ამ დროისთვის ყველაფერი რიგზე უნდა იყოს. “ბარსას” ქომაგებს აშფოთებთ, რომ გამპერის მატჩისთვის ბილეთების გაყიდვა ჯერ არ დაწყებულა, არადა, ტრადიციულად ნაადრევად იწყება ხოლმე. მერიამ კი პირდაპირ თქვა რომ “მონჟუიკზე” დაბრუნება შეუძლებელია, რადგან იქ უკვე დაგეგმილია რამდენიმე დიდი კონცერტი. 

და რამდენს იტევს კრუიფის სახელობის სტადიონი სადაც ქალები და “ბარსა” ბ თამაშობს? 6’000 ადამიანს. სასაცილოა აქ თამაში. ამასობაში კი გავრცელდა გამპერის თასზე მოსაწვევი გუნდის კანდიდატურაც, თურმე, ეს გუნდი არის “კომო”, რომელსაც ფაბრეგასი წვრთნის და სერჟი რობერტოც წაიყვანა. თუმცა, კლუბს ამ კითხვაზე არ უპასუხია. 

რა ხდება კი მაგრამ?