მუნდიალი დასრულდა, ახლა ტრანსფერების დროა

მსოფლიო ჩემპიონატის დასრულება და ჟოან ლაპორტას ბარსელონაში დაბრუნება კატალონიური კლუბის სპორტულ დაგეგმარებაში გარდამტეხი მომენტი იქნება. სანაკრებო ტურნირის გამო რამდენიმე მნიშვნელოვანი ოპერაცია შეჩერებული იყო, მაგრამ ახლა სპორტულ დირექციას მთელი ძალისხმევის სატრანსფერო ბაზრისკენ მიმართვა შეუძლია. მაგიდაზე უამრავი გადასაჭრელი საკითხია. მომდევნო კვირების დატვირთულ დღის წესრიგში მთავარი სახელები ხულიან ალვარესი, ფერან ტორესი, კარიმ ადეიემი, ჟოაუ კანსელუ, რუნ ბარდჯი და დაცვის ხაზია.

ჟოან ლაპორტამ აშშ-ში ვიზიტი კომერციული და ინსტიტუციური ურთიერთობების გასაღრმავებლად გამოიყენა. პარალელურად, ის მხარს უჭერდა “ბარსელონას” იმ ფეხბურთელებს, რომლებმაც მსოფლიო ჩემპიონატის ნახევარფინალსა და ფინალში ითამაშეს. ერთკვირიანი დატვირთული მუშაობის შემდეგ, პრეზიდენტი უახლოეს საათებში კატალონიაში დაბრუნდება და მთლიანად სპორტულ დაგეგმარებასა და სატრანსფერო ბაზარზე გადაერთვება, რომელიც უკვე გადამწყვეტ ფაზაში შედის.

მთავარ მიზნად კვლავ ხულიან ალვარესი რჩება. არგენტინელი თავდამსხმელი “ბარსელონასთვის” შეტევის გასაძლიერებლად აბსოლუტური პრიორიტეტია და კლუბში მიიჩნევენ, რომ ტრანსფერის დასახურად მომდევნო ორი კვირა გადამწყვეტი იქნება. თუ 31 ივლისამდე მადრიდის “ატლეტიკოსთან” შეთანხმება ვერ მოხერხდა, სპორტული დირექცია B გეგმას აამოქმედებს. აქამდე თავად ფეხბურთელიც მსოფლიო ჩემპიონატზე იყო კონცენტრირებული, ახლა კი საკუთარ მომავალზე იფიქრებს.

ზვიგენი (ფერან ტორესი)

კიდევ ერთი მნიშვნელოვანი სახელი ფერან ტორესია. ვალენსიელი შემტევი, რომელიც ფინალში გატანილი გამარჯვების მომტანი გოლით ესპანეთისთვის მსოფლიო ჩემპიონატის მთავარი გმირი გახდა, ზეიმის დასრულების შემდეგ კლუბთან უნდა დაჯდეს და თავისი მომავალი გაარკვიოს. მის განახლებას ერთი სირთულე ახლავს: თუ ის კონტრაქტს გაახანგრძლივებს, “ბარსელონას” მოუწევს “მანჩესტერ სიტისთვის” 8 მილიონი ევროს გადახდა (ეს პუნქტი მისი ტრანსფერის დროს გაფორმებულ შეთანხმებაში დევს). ამას ემატება პსჟ-ს დიდი ინტერესი, რომელიც თავდამსხმელის სიტუაციას ყურადღებით აკვირდება. ფერანს კონტრაქტი 2027 წელს უმთავრდება და მისი შენარჩუნება სპორტული დირექციისთვის ერთ-ერთი პრიორიტეტია. ხულიან ალვარესის მსგავსად, მსოფლიო ჩემპიონატის დასრულების შემდეგ, მანაც უნდა გადაწყვიტოს თავისი მომავალი.

კარიმ ადეიემიც თავისი ტრანსფერის საბოლოოდ დახურვას ელოდება. თავდამსხმელი ბარსელონაში ოთხშაბათს ჩაფრინდა და მეორე დღეს სამედიცინო შემოწმებაც გაიარა, თუმცა ჰანსი ფლიკის ხელმძღვანელობით ვარჯიში ჯერ ვერ შეძლო, რადგან გარკვეული ადმინისტრაციული და ფინანსური ფორმალობებია მოსაგვარებელი. ლაპორტას დაბრუნების შემდეგ ოპერაცია ოფიციალურად სამშაბათს ან ოთხშაბათს უნდა დაიხუროს.

კიდევ ერთი ღია საკითხი ჟოაუ კანსელუს უკავშირდება. პორტუგალიელი ფლანგელი მსოფლიო ჩემპიონატის შემდეგ დასვენების დღეებით ტკბება, თუმცა “ბარსელონასა” და “ალ-ჰილალს” შორის მოლაპარაკებებს ყურადღებით ადევნებს თვალს. კატალონიური კლუბის მიზანი პორტუგალიელის შენარჩუნებაა, მაგრამ საუდის არაბეთის კლუბთან საუბარი ფინანსური მოთხოვნების გამო რთულად მიმდინარეობს, თუმცა მაინც სწორი მიმართულებით ვითარდება.

დაცვის ხაზი და წამსვლელები

დაცვის გაძლიერება ერთ-ერთი მთავარი ღია პრიორიტეტია. დღემდე “ბარსელონა” ძირითადად შეტევის გაძლიერებაზე იყო ფოკუსირებული – გორდონისა და ადეიემის დამატებით, რასაც ხულიან ალვარესის ტრანსფერის მცდელობაც ემატება.

ახალ ფეხბურთელებთან ერთად, უახლოეს დღეებში ყურადღების ცენტრში წამსვლელებიც მოექცევიან. ერთ-ერთი ოპერაცია, რომელიც ამ კვირაშივე უნდა დაიხუროს, “აიაქსში” მარკ-ანდრე ტერ შტეგენის გადასვლაა. გარდა ამისა, რუნი ბარდჯიც ელოდება კლუბთან შეხვედრას საკუთარი მომავლის გასარკვევად. ყველაფერი იმაზე მეტყველებს, რომ ის ამ ზაფხულს გუნდს დატოვებს, თუმცა ჯერ გასარკვევია – იჯარით თუ სრულფასოვანი ტრანსფერით.

მომდევნო კვირები გადამწყვეტი იქნება ჰანსი ფლიკის 2026-27 წლების სეზონის პროექტის ფორმირებისთვის – როგორც შენაძენების, ისე გუნდიდან წამსვლელების კუთხით.