კარიმ ადეიემი: აქ ტიტულების მოსაგებად ვარ

კარიმ ადეიემი “ბარსელონას” ფეხბურთელი 2031 წლის ივნისამდე იქნება. ტრანსფერის დადასტურების შემდეგ გერმანელი ფორვარდი კატალონიური კლუბის ახალ მოთამაშედ ოფიციალურად წარადგინეს. პრეზენტაციას კლუბის პრეზიდენტი ჟოან ლაპორტა, სპორტულ საკითხებში პირველი ვიცე-პრეზიდენტი რაფაელ იუსტე, სპორტული დირექტორი ანდერსონ ლუის დე სოუზა “დეკუ” და სპორტული კომისიის წევრები დაესწრნენ.

ბედნიერი და ამბიციური

მედიასთან პირველი საუბრისას შემტევმა აღნიშნა, რომ მსოფლიოს საუკეთესო კლუბში გადმოსვლით ძალიან ბედნიერია. მან თავისი ამბიციებიც მკაფიოდ დააფიქსირა:

“აქ ტიტულების მოსაგებად ვარ. ვფიქრობ, ‘ბარსელონა’ მსოფლიოში საუკეთესო კლუბია თავისი ისტორიით, იმ დიდებული ფეხბურთელებით, რომლებსაც აქ უთამაშიათ და იმ განსაკუთრებული კავშირით, რაც მას კატალონიასთან აქვს. პირველივე დღიდან ვიგრძენი, რომ ეს სრულიად განსხვავებული კლუბია.”

ადეიემიმ გაამხილა, რომ “ბარსელონასთან” კონტრაქტის გაფორმების მთავარი მიზეზი მისი თანამემამულე, ჰანსი ფლიკი იყო:

“მე მას ვესაუბრე და სრულად ვენდობი. მან მითხრა, თუ რა სჭირდება ამ კლუბისთვის და მზად ვარ გავაკეთო ყველაფერი, რაც გუნდს ჩვენი მიზნების მისაღწევად დასჭირდება. ფლიკს შეუძლია ჩემი იმედი ჰქონდეს, მისთვის, გუნდისა და გულშემატკივრებისთვის ყველაფერს გავიღებ.”

კომფორტულად შეტევის ნებისმიერ პოზიციაზე

კითხვაზე, შეტევის რომელ პოზიციაზე ურჩევნია თამაში, ადეიემიმ განმარტა, რომ მას ფორვარდის სამივე პოზიციაზე უთამაშია და მზადაა ითამაშოს იქ, სადაც გუნდს ყველაზე მეტად დაეხმარება.

“მზად ვარ ყველაფერი გავიღო”, – დასძინა მან.

გერმანელმა ასევე გაამხილა, რომ ფლიკის თქმით, გუნდი ოჯახს ჰგავს და ყველა ერთად მუშაობს. მან აღნიშნა, რომ მოუთმენლად ელის ვარჯიშების დაწყებას, ახალი თანაგუნდელებისგან სწავლას და “სპოტიფაი კამპ ნოუზე” თამაშს და იმედოვნებს, რომ “ბარსელონას” გულშემატკივრებს ზეიმისთვის ბევრ მიზეზს მისცემს.