მატჩისშემდგომი მიმოხილვა: თეთრი კატა, შავი კატა

ვალვერდეს აჩრდილი დაძრწის ქალაქში! 

სამბურთიანი უპირატესობა ერთ ტაიმში გაიფლანგა, მაგრამ.. ეს ხომ “ლივერპული” არ ყოფილა?! ძალიან უთავმოყვარეო გუნდი უნდა იყო, რომ ასეთ დღეში ჩავარდე, თუმცა, კარგი დასკვნებისთვის გამოდგება. 

1. კოუტინიომ შესვლაზე უარი თქვა 

ასე დამთავრდა ამბავი ესე ყველაზე ძვირადღირებული ფეხბურთელისა. არ ვიცი როდის გადაუბრუნდა თავში რაღაც და როდის დაკარგა თვითრწმენა, მაგრამ ფაქტია, რომ დიდი ხანია თავისივე თავის აჩრდილია. მე არასდროს მინახავს ფეხბურთელს თვითრწმენა დაეკარგოს და მერე ისევ ათამაშებულიყოს. თუნდაც, იგივე გუნდში, იმავე პოზიციაზე დაეყენებინოთ. დააბრუნეს შევჩენკო “მილანში”, ტორესი “ატლეტიკოში”, შეიცვალა რამე? არა, წარსულში დატოვეს სიკაშკაშე. ასეა ახლაც. გადავყარეთ ყველაზე დიდი თანხა კლუბის არსებობის ისტორიაში და სანაცვლოდ საერთოდ ვერაფერი ვერ მივიღეთ.

ზამთარშივე უნდა მოგვარდეს ეს ამბავი. ფეხბურთელი, რომელსაც ვერ იყენებ, ავტომატურად ხდება ხელისშემშლელი ფაქტორი. არ არის საქმე ისე მარტივად, თავისთვის რომ იჯდეს და არაფერს აშავებდეს. თუ გამოუსადეგარია, ესე იგი, აშავებს. “ნიუკასლი” ბოლო ადგილზეა პრემიერ ლიგაში, ეს კი ძალიან კარგი და სასარგებლო ამბავია. ფასის და მოლოდინის გათვალისწინებით, შესაძლოა კოუტინიო ყველაზე დიდი იმედგაცრუება იყოს კლუბის ისტორიაში. 

2. იქნებ ლანგლეც? თქვენი არაბი თვალების ჭირიმე! ლანგლეც წაიღეთ! 

კარგი იქნებოდა ლანგლესაც უარი ეთქვა თამაშზე. არადა, სადებიუტო სეზონში არ იყო ცუდი. ასე არ არის? მართალია, გადამწყვეტ მატჩებში მაგრად გვაზარალებდა, მაგრამ სეზონის განმავლობაში კარგი მატჩებიც ჰქონდა. პანდემიის მერე აურია. რა მოხდა ამ პაუზის დროს არ ვიცი, ერთი ის ვიცით, რომ ბავშვი შეეძინა, ალბათ მთლიანად მის მოვლაზე და მასთან თამაშზე გადაერთო, ღამე არ მაძინებსო ესეც აღნიშნა, ის პატარაც მაგარი მავნე ბავშვი გამოდგა და ასე გამოუძინებელი და უვარჯიშებელი ლანგლე შეგვრჩა ხელში. ეს ხუმრობით, რა თქმა უნდა, ისე რა სჭირს არ ვიცი, მაგრამ ტვირთია, უნდა წავიდეს. რაც მალე, მით უკეთესი. შეუძლია უმტიტიც გაიყოლოს.

3. სამედიცინო შტაბი

ჩავი ჯერ კიდევ პირველი შეთავაზების მერე მოითხოვდა სამედიცინო შტაბი მე უნდა დავაკომპლექტოო, ახლა ალბათ გასაგებია რატომ ითხოვდა ამას. აქვს პრეტენზია, რომ დემბელეს უშველის, ახლა კი ფატიზეც მოუწევს ნერვიულობა. ცუდად მიდის ამ ბიჭის ჯანმრთელობის საქმე, არადა, რა ბიჭია?! დაგლიჯა! ოქროს ბიჭია, მაგრამ, ტრავმებს ყველაფრის გაფუჭება შეუძლია. ფატისა და დემბელეს გარეშე “ბარსა” იგივეა, რაც არწივი ფრთების გარეშე. ვერ აფრინდება, ირბენს ქათამივით. თავს თუ წააგდებინებს ვინმე და მოასვენებს, თორემ დაიტანჯება აფრენის მცდელობით და ჩვენც დაგვტანჯავს, ჰოდა, გუშინ წააგდებინეს თავი. 

არ ვიცი ჩავის რჩეული უშველის თუ ვერა საქმეს, მაგრამ რაღაც რომ შესაცვლელია ფაქტია. გარსია, გავი.. რა უბედურებაა?! 

თეთრი კატა

ეს იყო ალბათ საუკეთესო პირველი ტაიმი, რომელიც “ბარსამ” ამ სეზონში ჩაატარა. ალბას და ფატის ურთიერთგაგება ფლანგზე, კარგი სანახავი იყო, რადგან, კლუბში საერთოდ ვეღარ ვხედავთ, რომ ორი ფეხბურთელი ერთმანეთს უგებდეს, თითქოს ყველა თავისთვის თამაშობს. მარცხენა ფლანგი კი ძალიან ეფექტუტი იყო, სხვათა შორის, პირველივე ტაიმში გამოჩნდა, რომ მხოლოდ ერთი ფლანგით ვუტევდით, გავის დაყენებას ფლანგზე არანაერი მნიშვნელობა არ აქვს. რთულია ასე, ცალი ფრთით შეტევა. 

გოლი ძალიან მომეწონა. მიუხედავად იმისა, რომ მცველის ფეხი წაეხმარა. ასეთი გოლები მხოლოდ იმათ გააქვთ ვისაც გოლის გატანა ძალიან უყვარს. ფატის ზუსტად ის აქვს ახლა, რაც კოუტინიომ დაკარგა. 

ძალიან კარგი იყო ბუსკეტსის გოლი, ჩავის სტილში დაარტყა და შეაგდო. სეზონის წინ აღვნიშნეთ, რომ ერთ გოლს მაინც შეაგდებდა, ჰოდა, შეაგდო. თანაც ლამაზად. საერთოდ, კარგი მატჩი ჰქონდა. ცოტა უხერხულია ამ მატჩის მერე, ვინმეს კარგი შეფასება დაუწერო, მაგრამ თუ ვინმეს აკადრებ ამ ყველაფერს, ალბათ ბუსკეტსია. 

მემფისმაც შეაგდო თავის გოლი. თავით. ჩემი ფსოქნი მასზე გავაკეთე, როგორც საუკეთესო ბომბარდირზე, ფატი რომ ჯანმრთელი იყოს ეჭვი მაქვს ჩამოართმევდა ამ ტიტულს, მაგრამ აქედან ისე ჩანს, რომ დეპაი იქნება საუკეთესო მეგოლე, თუმცა, დიდი დროა მაქამდე. 

შავი კატა

ეს იყო ყველაზე უარესი მეორე ტაიმი სეზონში. უნდა დამეწერა ასეთ ტაიმებს მხოლოდ ბავშვები აგებენ-მეთქი და “ბარსა” მართლაც ბავშვების გუდნია, მაგრამ საპირისპიროც ხომ გვინახავს? ვალვერდეს დროს კაცებს გაუფლანგავთ სამბურთიანი სხვაობა. კიდევ კარგი რომ ცვლილება უკვე მოხდა, კიდევ კარგი, რომ ახლა არაფრის ლოდინი აღარ გვიწევს. ჩავის კი ძალიან ბევრი სამუშაო ექნება, სადებიუტო მატჩში ვინ ეყოლება და ვინ არა კაცმა არ იცის. “ბარსა ბ”-ს შეხვედრას დაესწრო, იქნებ კიდევ ვინმე გამომადგესო, თორემ, თვალსა და ხელსშუა იცლება გუნდი. 

თავად თუ შევა მოედანზე თორემ აღარც დაგვრჩა არავინ. 

ამას ჰქვია, რომ ბეწვზე მოგვისწრო პაუზამ. ნატკენი ხალხიც მოშუშდება, ჩავიც დალაგდება და მერე ძალიან მძიმე საქმეს შეეჭიდება. რა გამოვა ვნახავთ, მე მაინც მგონია, რომ რაღაც გამოვა. ოღონდ, ლიგის მიღმა ნუ დაგვტოვებ ამ თვითგამორკვევის პროცესში, შენი ჭირიმე..