ესპანეთი მსოფლიოს ჩემპიონია

ესპანეთი მსოფლიოს საუკეთესო ნაკრებია. თამაშით ეს აქამდეც ჩანდა, ახლა კი უკვე სტატუსითაც.

არა მხოლოდ 2026 წლის – “ფურია როხა” 21-ე საუკუნის მსოფლიოს საუკეთესო ნაკრებიცაა. 26 წელიწადში მოგებული 2 მსოფლიოსა და 3 ევროპის ჩემპიონატი. მსგავსი შედეგით სხვა ვერავინ დაიკვეხნის.

ესპანეთის ჩემპიონობას ყვითელი და წითელის გარდა ყოველთვის გასდევს მუქი ლურჯი და ბროწეულისფერი ფერები. გამონაკლისი არც მსოფლიოს 2026 წლის მუნდიალი იყო. უკვე ტრადიციად შეგვიძლია ჩავთვალოთ – ძირითადი დრო და პირველი დამატებითი ტაიმი 0-0, მეორე დამატებით ტაიმში გატანილი ერთადერთი გოლი და რა თქმა უნდა, “ბარსელონას” ფეხბურთელის შესრულებით.

ესპანეთისთვის ახალი ანდრეს ინიესტა ფერან ტორესი გახდა, რომელმაც 106 წუთზე უკვე კაცნაკლულ არგენტინას ზუსტად დაურტყა და ლუის დე ლა ფუენტეს უძლეველი ბიჭების დიდი უპირატესობა ოქროდ აქცია.

ფინალურ მატჩში ტორესი ტრადიციულად შეცვლაზე შევიდა. 62-ე წუთზე მან ტურნირზე გუნდის საუკეთესო ბომბარდირი მიკელ ოიარსაბალი შეცვალა. კუბარსიმ და იამალმა სრულად ითამაშეს; ოლმომ – პირველი 75 წუთი. მოედანზე 62-ე წუთზე გამოჩნდა პედრი. მუნდიალზე პირველი წუთები მიიღო ერიკ გარსიამაც, რომელიც თამაშში 99-ე წუთზე ჩაერთო. სათადარიგოთა შორის კი გავი და ჟოან გარსია დარჩნენ.

ახლა კი ორიოდ სიტყვა მთავარ “ბარსელონელზეც” ვთქვათ. ლეო მესის მსოფლიოს 2026 წლის ჩემპიონატზე არაფერი შეხვდა – არც ჩემპიონობა, არც ბომბარდირობა და ბევრისთვის მოულოდნელად არც ტურნირის საუკეთესო ფეხბურთელობა. არადა, თუკი არსებობს მიზეზი, რის გამოც არგენტინა ფინალში ზედიზედ მეორედ გავიდა, ეს სწორედ ლეოა. 8 თამაშში გატანილი 8 გოლი და 4 საგოლე გადაცემა – ამ ტურნირის ისტორიაში ერთ-ერთი საუკეთესო თამაში ფორმალურად დაუფასებელი დარჩა. მხოლოდ ფორმალურად, რადგან თუკი ვინმეს დაფასება არ აკლია, ეს მესია და სავსებით დამსახურებულად.

ყველა დროის უდიდესი ფეხბურთელის (და შესაძლოა სპორტსმენის) სანაკრებო მონაგარი ასეთია: ოლიმპიური ჩემპიონი, მსოფლიო ჩემპიონი, კოპა ამერიკის ორგზის გამარჯვებული, ფინალისიმას გამარჯვებული, მსოფლიო ჩემპიონატის ორგზის ვერცხლის პრიზიორი, კოპა ამერიკის სამგზის ვერცხლის პრიზიორი.