მატჩისშემდგომი მიმოხილვა: მფრინავი ურუგვაელი!

როგორც ითქვა, რონალდ კუმანს ულტიმატუმი წაუყენეს, მომდევნო მატჩები აუცილებლად უნდა მოიგო, თორემ ხელს დაგიქნევთ და დაგემშვიდობებითო. ისედაც, ძლივს არის შემორჩენილი, ლაპორტას არ მოუყვანია და არასდროს მალავდა, რომ დიდად არ ხიბლავდა მისი კანდიდატურა. დაემუქრასავით და კუმანსაც ფეხი დაუცდა, პირველივე გამოცდა ჩააფლავა. “ბაიერნის” მერე ისეთი შთაბეჭდილება იქმნება, რომ გუნდი ნოკაუტშია და ფეხზე წამოდგომას ვერ ახერხებს. საქმე მხოლოდ ანგარიშში არ არის და არც ულტიმატუმი ეხებოდა მხოლოდ ანგარიშს, ლაპორტას ლამაზი ფეხბურთიც სურდა “კამპ ნოუზე”, რაც შეიძლება მეტი ქომაგი უნდა მივიდეს სტადიონზე, რადგან მათ გარეშე ბიუჯეტიც ვერ შეივსება, ჰოდა, ბატონი რონალდი ამაშიც ჩაფლავდა, გარდა იმისა, რომ მატჩი ვერ მოიგო, ხარისხიც კატასტროფულად დაბალი იყო. 

ისევ და ისევ შეიქმნა ლიდერის პრობლემა, აქამდე დეპაი ართმევდა თავს ამ გამოწვევას, ახლა კი არაუხომ ითავა ყველაფერი, მცველიც ის იყო, თავდამსხმელიც და გარემარბიც, ბოლოს ფლანგიდან ისე ჩაირბინა დემირს, რომ მთელი მატჩის განმავლობაში არ ჩაურბენია და ძალიან სახიფათოდაც ჩააწოდა, მაგრამ პიკემ ბურთზე თამაში ვერ მოახერხა, არადა, ძალიან საინტერესი იქნებოდა, გამარჯვების გოლს ერთი ცენტრალური მცველი გაიტანდა, მეორეს პასით. თუმცა, პირველ გოლს ბევრი არაფერი დაკლებია ასეთ სურათამდე, იქაც არაუხო-პიკეს დუეტი იყო მთავარი მოქმედი ძალა და ურუგვაელმა ბრწყინვალედ დაასრულა შეტევა. 

იქამდეც მომენტებს მხოლოდ ის ქმნიდა, განსაკუთრებით გამოსარჩევია პირველ ტაიმში ძალიან კარგი დარტყმა, რომელიც როგორღაც მეკარემ მოიგერია, უფრო უკეთ ვერაფრით დაარტყამდა, კარგი ნახტომი იყო, კარგი დარტყმაც გამოვიდა, მაგრამ აიღო, ასეც ხდება ხოლმე. გახსოვთ ალბათ, გვარდიოლას გეგმა ბ, პიკე შეტევაში, მის შემდეგ სხვადასხვა მწვრთნელები მიმართავდნენ ამ ტაქტიკას და კუმანიც ჩაეწერა მათ რიცხვში, მაგრამ “გრანადასთან” თუ გახდებოდა საჭირო ეს ყველაფერი, ამას ვერ ვიფიქრებდი. 

გარდა კუმანისა, მიწასთან არიან გასასწორებლები “ბარსას” შემტევები, როცა პიკე და არაუხო შენზე მეტს ქმნიან მეტოქის საჯარიმოში, ესე იგი, რაღაცას ვერ აკეთებ სწორად. დეპაი საკუთარ თავს არ ჰგავდა, ყოველ შემთხვევაში, აქამდე რასაც გვიჩვენებდა იმის ლანდი იყო დარჩენილი. კოუტინიო კი წარსულის ფეხბურთელია, ვერა და ვერ გაიყიდა, ძალიან მენანება, მაგრამ ასეა, მისი დიდი ფეხბურთი წარსულში დარჩა, იმედია მოუმატებს, მაგრამ, როგორც არ უნდა მოუმატოს, ძველ ფორმას ვერ დაიბრუნებს, გამორიცხულია. 

დემირისგან კი იმედგაცრუება ნაკლები იყო, რადგან არც მოლოდინი ყოფილა დიდი, რაც შეეძლო გააკეთა, აღმოჩნდა, რომ ბევრი არაფერი შეძლებია. ლუკ დე იონგზე კი იმავეს თქმა შეიძლება, რაც უკვე აღვნიშნეთ წინა დღეებში, თითქოს ორი დე იონგი უნდა გვყავდეს გუნდში, მაგრამ ორი ბრეითუეიტი გვყავს! თუმცა, დე იონგს ბევრი მუშაობა მოუწევს, რომ ბრეითუეიტს გაუტოლდეს, დანიელი “ბარსას” დონისგან კატასტროფულად შორს არის, მაგრამ სარგებელი მოუტანია გარკვეულ მატჩებში, ლუკ დე იონგი კი ჯერჯერობით ეკრანზე გამოჩნდება ხოლმე ხანდახან, ეგ არის და ეგ. 

ძალიან ცუდი ამბავი ის არის, რომ ვერც მისმა მოგვარემ დატოვა კარგი შთაბეჭდილება, არადა, რაც უფრო მძიმე მდგომარეობაშია “ბარსა”, მით უფრო მეტი უნდა მოვითხოვოთ მისგან, არ წაუვიდა თამაში, არცერთ ჰოლანდიელს, თითქოს უნდა სურდეთ კუმანის დარჩენა, მაგრამ ვინც მატჩს უყურა საპირისპირო აზრი დარჩებოდა. 

ახლა სწრაფად მოქმედებაა საჭირო, თუ კუმანის გაშვება სურთ, ჯობია სწრაფად გააკეთონ ეს, იქამდე სანამ ცენტრალური მატჩები მოახლოვდება, აუცილებელია ახალ მწვრთნელს საწყისი ტურები მარტივი ჰქონდეს, რათა მისი ხედვისა და ტაქტიკის დანერგვა შეძლოს, თუ არ უპირებენ გაშვებას, ჯობია, რომ წნეხიც არ შეუქმნან, რადგან, როგორც აღმოჩნდა, ეს წნეხი ფეხბურთელებზეც გადამდებია. მოკლედ, ლაპორტა უნდა ჩამოყალიბდეს. 

კარგია, რომ რაღაც იმედის ნაპერწკალი ამ მატჩშიც შევნიშნეთ, არაუხომ უმაგრესი მატჩი ჩაატარა. წინა სეზონში გაცემულ ავანსებს აბსოლუტურად ამართლებს. მთავარია ჯანმრთელად იყოს და ფორმას კიდევ აკრიფავს. სხვა რა უნდა ითქვას?! ვიდეოანალიზისას კონკრეტულ მომენტებს განვიხილავთ, მანამდე კი ფატისა და აგუეროს დაბრუნებას დაველოდებით, კოუტინიოს დაბრუნებამ ჯერჯერობით ვერაფერი შეგვმატა, სასწაულებს არც აგუეროსგან უნდა ველოდოთ, მაგრამ ლუკ დე იონგს ცალფეხა აგუეროც ჯიბეში ჩაისვამს. ამაშია საქმე. 

რონალდ, გულს გაუფრთხილდი.