მატჩისშემდგომი მიმოხილვა: ფლიკის მანქანა ისევ მუშაობს
ისევ გასვლაზე, ისევ მოგება, დიდებულად, "ბარსელონურად". ფლიკის სტილში. რაც ჰანსი მოვიდა "ბარსა" გოლებს უშვებს, მაგრამ არაფრის გვეშინია, თითქოს წინასწარ ვიცით, რომ ასე არ მორჩება, თამაშს აუცილებლად მოვატრიალებთ. წინა სეზონი ერთი დიდი მოტრიალება იყო, მობრუნება - ძალისკენ, რწმენისკენ, თავდაჯერებისკენ. კარგია რომ ეს გზა გრძელდება, ასეთი მატჩები ზრდის გუნდს და ასეთი მატჩებით იგებ საჩემპიონო მარათონს.
"ბარსას" ამოცანაა ქულათა მაქსიმუმს მოუყაროს თავი იქამდე სანამ მუდმივ საცხოვრებელში გადავა, იქამდე სანამ "კამპ ნოუს" ეშველება. ჯერჯერობით ყველაფერი გეგმის მიხედვით მიდის, სტადიონის რეკონსტრუქციასაც რომ ფლიკის მსგავსი კაცი გაძღოლოდა, მისი მსგავსი მენტალობითა და პასუხისმგებლობით, უკვე ჩაბარებული იქნებოდა. მაგრამ მთავარი მაინც გუნდის მშენებლობაა და არა სტადიონის. მთავარი ის არის ფეხბურთელების გონებაში რასაც აშენებს და ვიცით რომ კარგად აშენებს.
სტადიონი კიდეც წამოგვეწევა, სად წავა აბა..
წაგებული ტაიმი
თითქოს არ იყო წასაგები. "ლევანტე" ციდან ვარსკვლავებს ნამდვილად ვერ სწყვეტდა, მაგრამ შანსი მიიღეს და გამოიყენეს. შანსს კიდევ ამ "ბარსელონასთან" ყველა მიიღებს, რადგან გუნდი ცენტრამდე ამოწეული დაცვით თამაშობს, ერთი ზუსტი და დროული პასი გაქვს გასაკეთებელი, მერე ფორვარდის სინდისზე იყოს. იმდენი პასი გავიდა სათვალავი ამერია. მცველებს ხაზი სწორად ნამდვილად ვერ ეჭირათ და რაღაცას აუცილებლად მოჰყვებოდა გოლი. მანამდე ბევრი ვიცინე - "ლევანტეს" ფორვარდმა ანგარიში გახსნა, ზეიმიც დაიწყო და კაციშვილი არ გაკიდებია, რადგან ხუთმეტრიანი თამაშგარედან გაიტანა გოლი, ეს თუ ავადმყოფი არ არის.. ამის აღნიშვნა როგორ იკადრა?!
კარგი გოლი შეაგდეს, კუბარსისა და არაუხოს დუეტი ისევ ვერ გამოიყურება კარგად და ეჭვი მაქვს მთელი სეზონი გაგრძელდება ეს უკმაყოფილება. გოლი ისევ მათ სინდისზეა. ადრეც დაგვიწერია - ჯობია პენალტის რისკი გაიზარდოს, (როგორც ბალდეს შემთხვევაში მოხდა) და ხელები გაშლილი გქონდეს, ვიდრე უკან წაიღო და მეტოქეს საქმე გაუმარტივო. არ ვიცი რამდენია პროცენტული მაჩვენებელი, რისკი იმისა, რომ მეტოქის დარტყმული ხელში მოგხვდება და პენატლს დანიშნავენ, მაგრამ შემიძლია ვთქვა, რომ მცველი, რომელსაც ხელები უკან მიაქვს, კარგი შემტევი 100%-ით გააბითურებს, იმიტომ, რომ კოორდინაციისა და წონასწორობის უნარი ამ დროს დარღვეულია. გააკეთა რომერომ მოძრაობა და კუბარსი კინაღამ გადაყირავდა. არადა, ბოლო მცველია, როგორ შეიძლება ბოლო კაცს ასე მარტივად ატყუებდე, რომეროა, რომარიო ხომ არა?!
ტაიმის ბოლოს თითქოს საკონტროლო გასროლა მივიღეთ - "ლევანტეს" კონტრშეტევას ბალდემ ჩამოუსწრო, მაგრამ ბურთი ხელზე მოხვდა და პენალტი დაინიშნა. იყო პენალტი? ჩემი აზრით არა. მაგრამ ვის ანაღვლებს ჩემი აზრი? - 0:2.
როგორ გავამწაროთ ლევანტე
"ბარსას" პირველ ტაიმში ბურთის კონტროლი და აგრესია აკლდა. ამ დროს როგორც წესი, ფრენკი დე იონგი გამოჰყავთ ხოლმე მოედანზე, მაგრამ ფრენკი საერთოდ არ ყოფილა განაცხადში, (თორემ, ძირითადშიც იქნებოდა) ამიტომ, გავი და ოლმო გამოვიდნენ, რაფინია ცენტრში დიდად არ ჩანდა, ფლანგზე გადაწიეს და რაშფორდი გავიდა. ცუდი იყო ინგლისელი? არა, კარგი მომენტებიც შექმნა, მაგრამ საერთო ჯამში, ჯერ ვერ გაიგო "ბარსა" რას თამაშობს, ისე, რაღაც შეიძლება გამოვიდეს მისგან.
გავიდა კასადოც, რომელიც ასევე არ ყოფილა ცუდი, განსაკუთრებით მაშინ, როცა ცენტრამდე ამოწეული მცველების დაზღვევა უწევდა, მაგრამ რაღაც სხვა იყო საჭირო, უფრო სწრაფი, უფრო აგრესიული, უფრო შეტევისკენ მომართული - გავიმ შეცვალა და თამაშიც გამოაცოცხლა. ოლმო კი თავისთავად მეტოქის კარზეა დაგეშილი.
"ბარსამ" სამ წუთში მოატრიალა, 49-ე წუთზე მატჩის საუკეთესო ფეხბურთელმა, აღიარებულმა ჯადოქარმა ისეთი გოლი შეაგდო როგორიც აქამდე არ ჰქონდა შეგდებული, შორი მანძილიდან უზადოდ, უზუსტესად, ჩააჭედა "ლევანტეს" კარში. ამ გოლმა მასპინძლები გაანადგურა, თითქოს მიახვედრა, რომ პედრი ძალიან დიდია, "ლევანტე" ძალიან პატარა, ერთი კაციც კი ეყოფა მათ გაცამტვერებას. გავიდა ორი წუთი და ფერან ტორესმა პირველ ტაიმში დაშვებული შეცდომა გამოასწორა - ახლო მანძილიდან ზუსტად დაარტყა - 2:2. კარგად იწყებს ტორესი, გოლები გააქვს, რაც მთავარია.
აი მერე დიდხანს ველოდით გამარჯვების გოლს. ველოდით დამატებით დრომდე, რადგან, სწორედ ამ დროს იჯერებს ხოლმე მეტოქე, რომ გადარჩენა შესაძლებელია, აი, ცოტაც და ქულას აიღებენ, ცოტაც და მატჩი დასრულდება.. არა, ვერა, ფლიკი სწორედ ამ დროს მოდის და ბოლო იმედი მიაქვს. ლამინე იამალი კი ჰანსი ფლიკის საუკეთესო ქილერია, უმოწყალო და შეუბრალებელი. თავად არ შეუგდია, მაგრამ ხომ შეაგდებინა?! ისე დაატრიალა.. ამას ყოველთვის გოლი მოჰყვება.
მანამდე კი ერთი საკამათო მომენტიც იყო, შეცვლაზე შემოსული ლევანდოვსკი წააქციეს. პირიქით მისცეს ჯარიმა. არადა, დააგდეს საჯარიმოში. ლევი ცუდად არ შემოსულა, საერთოდ სხვა თავდაჯერება მოაქვს გუნდისთვის. ცოცხალი ლეგენდაა მოედანზე, უკვე მითოსური ფიგურა. მეოთხე წელს ატარებს კლუბში, გაფრინდა ეს დრო თვალსა და ხელს შუა.
ვინ არის შემდეგი?
ვინ არის და "რაიო", ეგეც გასვლაზე. ერთი კვირაა იქამდე.
მუშებმა ტემპს უნდა მოუმატონ, მაგრამ ბარსელონაში ხალხი ჩივის თურმე, ნუ ხმაურობთ და ღამით დაგვაძინეთო, ზედმეტი შუქიც აწუხებთ, მერია აკრძალვებით მოდის და ეგრე მუშაობა მართლა რთულია. მოესწრება "ვალენსიამდე" "კამპ ნოუ"? არა მგონია, მაგრამ ამბობენ მოესწრება და 25'000-,დე კაცს დაუშვებენო. რა ვიცი აბა..
ბლოგში გამოთქმული მოსაზრებები Barcamania.ge-ს ადმინისტრაციისას ყოველთვის არ ემთხვევა და ზოგ შემთხვევაში, ის საკითხისადმი ავტორის სუბიექტურ დამოკიდებულებას გამოხატავს.
ამ სიახლეზე კომენტარები გათიშულია.
კომენტარები [ 7 ]