მატჩისშემდგომი მიმოხილვა: პირველი სტუმრები ნაქირავებში
ნაქირავებში სტუმრები მოვიდნენ. ვერ დავხვდით კარგად, თუმცა, ვერც იმას ვიტყვი, რომ თავი შევირცხვინეთ. ისე გავუმასპინძლიდთ რა.. ზომიერად.
რაც მთავარია სამი ქულა ჩაიწერა აქტივში, თამაშის ხარისხი "სვარკაზე" ოდნავ უკეთესია. ჩავის რომ არ ეკადრება ისეთი. ყველაზე უკეთ თავად იცის რა არის კარგი ხარისხი და ყველაზე უკეთ თავად ხვდება რა შორს არის გუნდი ამ ყველაფრისგან. ცოტა არ იყოს, პირველი გოლის დროს ამხელა სიხარულიც ცუდად მენიშნა, "კადისთან" ისე გაიხარეს თითქოს ჩემპიონთა ლიგის ფინალში შეაგდეს გოლი. ეს ნიშნავს იმას, რომ ყოველი ქულა ძალიან ძვირად ფასობს და ყოველი მატჩის მოგება ძალიან რთული იქნება.
სახლიც აღარ გვაქვს. რა არის ეს, რას ჰგავს, ვის გაუგია ტრიბუნის მეორე მეზობელ ქალაქამდე გაწევა?!
ისევ მშრალი კარით
არ ვიცი ახალი კაპიტნის მიზანი რა იქნება, უნდა ალბათ წინა სეზონის მიღწევა გააუმჯობესოს. რთული იქნება, მაგრამ წინ რა უდგას?! "ბარსა" ისევ ისე თამაშობს, დაცვა ისევ ისე კარგად დგას. წინა სეზონის მსგავსად ერთი-ორი ჩავარდნაც გამოჩნდება ხოლმე, მეტოქე ერთი-ერთზე რჩება და ტერ შტეგენი იგერიებს, ან ძელს ხვდება, ან თავდამსხმელს დამბლა ეცემა, უკვე მერამდენედ ხდება ასე, არ ვიცი რატომ, ოლივერ კანს თუ დავუჯერებთ ეს მეკარის ფსიქოლოგიური ველია, დამაჯერებლობასა და სიმტკიცეს ასხივებს, თურმე პირდაპირ თვალებში ხვდებათ თავდამსხმელებს და უბნელდებათ, ჰოდა, დაუბნელდა ამ დალოცვილ "კადისელსაც", მხარში ესროლა ჩვენს კაპიტანს.
არაუხო გვაკლდა.
ფრენკი დე იონგმა შეავსო დაცვის ხაზი, მაინც ხშირად იწევს ხოლმე ამ ზონაში, ჩვეულად კარგად წამოიღო ბურთი, კუმანივით ვერ იდგა დაცვაში, მაგრამ ამოტანას ვინ დაუწუნებს?!
სანამ დაცვაში ასე თუ ისე საქმე დალაგებულია, მანამდე კიდევ ერთი მცველის საქმე ირკვევა, დანი ალვესის შემდეგ ასეთი კარგი მარჯვენა მცველი კლუბს არ უყიდია. ჟორდი ალბას შემდეგ ასეთი კარგი მარცხენა მცველიც არ უყიდია, მოკლედ, კანსელუ თუ გადმოვიდა კიდევ უფრო სრულყოფს დაცვის ხაზს.
ბოლო ასეთი კარგი უნივერსალი ვინც მახსენდება, განაპირა მცველი, ორივე ფეხით ძლიერი, ჯანლუკა ძამბროტა იყო, ადრიანოც სახსენებელია. იმედია კანსელუ უკეთესი იქნება.
ამ საქმის მოგვარების მერე კი შემტევზეც უნდა დაიწყოს ფიქრი, თორემ საშინელ დღეშია ჩვენი კლუბი.
ველით ილქაის ადაპტაციას
ნელ-ნელა ადაპტირდება, პროცესი მოძრავია, აშკარაა, გადასარევი საგოლე გადაცემა გააკეთა, ჯერ თითქოს ვერ ხვდება რა ჯანდაბას აკეთებს მოედანზე, სად უნდა ირბინოს და როდის, მაგრამ ეტყობა, რომ ნელ-ნელა აზრზე მოდის. ახლა, თუ ისე მოხდა, რომ კანსელუს ბერნარდუ სილვაც გადმოჰყვა, შეთამაშებას უფრო სწრაფად ეშველება.
მიუხედავად ილქაის კარგი პასისა, უნდა ითქვას, რომ ნახევარდაცვისა და თავდასხმის ზონაში ასეთი უფანტაზიო თამაში მართლაც იშვიათია. "ბარსასგან" თორე "კადისი" თავიდან ბოლომდე ფანტაზიაა.
უკვე მოვიდა ის დრო, როცა პედრიმ გაცილებით მეტი უნდა შეძლოს. კარგია გოლის შეგდება, მით უმეტეს, ასეთი მნიშვნელოვანი გოლის, გაუხარდა, გაგვახარა, მოლოდინი კი უფრო დიდია, მისგან ლიდერს ვითხოვთ, თუნდაც, ჩუმ ლიდერს, თამაშის წარმმართველს, უნდა გამოამჟღავნოს დირიჟორის ნიშნები იმიტომ, რომ აქვს ამის ნიჭი და უნარი. ჯერჯერობით არ ჩანს ამ ბიჭში მთავარი დირიჟორი. გავი კიდე საერთოდ არ არის სადირიჟორე კაცი. სულ სხვა ბიჭია.
ამანათი პოლონეთიდან
ცხვირი ჰგაავს?
არა!
ეს ის ლევანდოვსკი არ არის, წინა სეზონის პირველ ნახევარში რომ ვნახეთ. მუნდიალის მერე სხვა კაცი დაბრუნდა და არც შესვენებამ უშველა რამე. მგონი დაბერდა ეს კაცი.
არ მინდა სხვა რამე ვთქვა, ისეთ შთაბეჭდილებასაც ტოვებს, რომ უკვე მოწყინდა "ბარსაში" ყოფნა. აღარც ლაპარაკობს ხოლმე, არადა, გადმოსვლისთანავე სულ მითითებებს იძლეოდა. ახლა მაგასაც აღარ აკეთებს. კაცი "კამპ ნოუზე" სათამაშოდ გადმოვიდა და სადღაც ოლიმპიურზე გაუშვეს. აი ნახავთ, ჩემპიონთა ლიგაზე გაცილებით მაგრად ითამაშებს, ეგ მაინც მოიყვანს ხასიათზე.
გოლამდე ცოტა დააკლდა 16 წლის ბიჭს. ნახევარი დეკადა გავა და ისევ თინეიჯერი იქნება. იმედია შეირგებს ამ დროს, თორე, ეგრე ნაადრევად გამოჩენილების მეტი რა გვინახავს, თანაც, ძალიან მაგარი ბიჭების. მარტო ბოიანი, ან, ჯოვანი დროს სანტოსი რად ღირს.
მერე ალკანტარები, ბოლოს ფატი..
ვნახოთ, ნდობა აქვს და სადებიუტო სეზონი, როგორც წესი, კარგი აქვთ ხოლმე ასეთ ბიჭებს. ასაკისთვის შეუფერებლად თავდაჯერებული და ჭკვიანია.
ფერან ტორესმა რობერტის კარგი პასის მერე მშვენიერი გოლი შეაგდო და ჩავის უთხრა დრო მომიმატე, ბავშვებს რო ათამაშებ მე სკამზე რა მინდაო?! ჩავიც ეტყოდა რამეს, რავიცი... დაპირდებოდა რამეს დეპუტატივით. ახლა არა და მერე, ამ ერთხელაც და მერე..
პროგრამა მინიმუმი სრულდება - სანამ გუნდი ფორმაში შევა, რაც შეიძლება მეტი ქულა უნდა დავაგროვოთ. მერე თავისთავად მოვა ეგ ყველაფერი.
ბლოგში გამოთქმული მოსაზრებები Barcamania.ge-ს ადმინისტრაციისას ყოველთვის არ ემთხვევა და ზოგ შემთხვევაში, ის საკითხისადმი ავტორის სუბიექტურ დამოკიდებულებას გამოხატავს.
ამ სიახლეზე კომენტარები გათიშულია.
კომენტარები [ 10 ]