რონალდ არაუხო დაბრუნდა!

“ბარსელონას” “ბარბასტროსთან” მატჩში (0-4), დაახლოებით 181 დღის გამოტოვების შემდეგ, გუნდის ერთ-ერთი ლიდერი რონალდ არაუხო დაუბრუნდა.

არაუხომ მძიმე ტრავმა 7 ივლისს ურუგვაის ნაკრების შემადგენლობაში ბრაზილიასთან გამართულ კოპა ამერიკის მეოთხედფინალურ დაპირისპირებაში მიიღო. 25 წლის უკანახაზელი მას შემდეგ დღემდე უთამაშებელი იყო. რონალდი “ბარბასტროსთან” შეხვედრამდე “ბლაუგრანას” მაისურით ბოლოს დაახლოებით 230 დღის წინ, 19 მაისს, “რაიოსთან” დაპირისპირებაში ვიხილეთ, როდესაც “ბარსას” ჯერ კიდევ ჩავი ერნანდესი წვრთნიდა.

ოპერაციისა და მკურნალობის ხანგრძლივი პროცესის შემდეგ არაუხო სრულად დეკემბრის დასაწყისში გამოჯანმრთელდა, მაგრამ მისი დაბრუნება “ბარბასტროსთან” მატჩამდე გადაიდო, რომელშიც ჰანსი ფლიკმა ძირითად შემადგენლობაში გაამწესა.

რონადლ არაუხომ, რომელმაც გუნდს უკაპიტნა, ინიგო მარტინესთან ერთად დაცვის ცენტრში შესანიშნავად ითამაშა და თავი შეტევაშიც გამოიჩინა. ერიკ გარსიას პირველი გოლი სწორედ ურუგვაელმა გაატანინა.

55 დღის უქმობის შემდეგ დაბრუნდა ანსუ ფატიც. მიმდინარე სეზონის დასაწყისში მიღებული ტრავმის მორჩენის შემდეგ ახლადგამოჯანმრთელებულმა ფატიმ მალევე მორიგი დაზიანება მიიღო, მაგრამ ანსუმ ეს ყველაფერი უკვე უკან მოიტოვა და ის 2025 წელს შემართებითა და ახალი გამოწვევებით იწყებს.