ოფიციალურად: ბრიან ფარინიასი ბარსას ახალი 4 ნომერია

ნახევარმცველი ბრიან ფარინიასი ოფიციალურად “ბარსელონას” პირველი გუნდის წევრი გახდა. “ლა მასიას” აღზრდილმა ტალანტმა ეს ნაბიჯი ჰანსი ფლიკის გუნდთან ერთად გავლილი შთამბეჭდავი წინასასეზონო მზადების შემდეგ გადადგა, სადაც მისი დებიუტი ინგლისში, “ბირმინგემ სიტისთან” გამართულ ამხანაგურ მატჩში შედგა.

ახალი ოთხიანი “ბარსელონაში”

ბენიკარლოში დაბადებული ფეხბურთელი 4-ნომრიან მაისურს მოირგებს, რომელიც რონალდ არაუხოსგან გადმოიბარა. მანამდე ამ ისტორიული ნომრით გამოდიოდნენ:

• ივან რაკიტიჩი (2014-2020)
• სესკ ფაბრეგასი (2011-2014)
• რაფა მარკესი (2003-2010)
• პატრიკ ანდერსონი (2001-2003)
• სერჟი ბარჟუანი (1995-1996)

როგორც 4 ნომრის, ასევე ყველა სხვა ნომრის ისტორია შეგიძლიათ ნახოთ ჩვენს ნომრების ისტორიის გვერდზე.

კარიერული გზა 2018 წლიდან დღემდე

ბრიან ფარინიასი “ბარსელონას” 2018 წელს “ვილიარეალიდან” შეუერთდა. ის კლუბში 14-წლამდელთა გუნდის მოთამაშედ მოვიდა და აკადემიის ყველა ეტაპი გაიარა. თავიდანვე მრავალმხრივ ნახევარმცველად ჩამოყალიბდა, 19-წლამდელთა გუნდში ბოლო სეზონში კი იმ გუნდის ერთ-ერთი ლიდერი იყო, რომელმაც ტრებლი შეასრულა – მოიგო ჩემპიონატი, თასი და უეფას ახალგაზრდული ლიგა.

მისი დებიუტი “ბარსა ატლეტიკში” 2023/24 წლების სეზონში შედგა – 2024 წლის 16 მარტს, “ტერუელთან” გასვლით შეხვედრაში (4-2). იმ სეზონში სარეზერვო გუნდში 2 შეხვედრა ჩაატარა, მომდევნო წელს კი 7 მატჩში მიიღო მონაწილეობა.

2025/26 წლების სეზონში, ჟულიანო ბელეტის ხელმძღვანელობით, ფარინიასი “ბარსა ატლეტიკის” უმნიშვნელოვანეს ფიგურად იქცა: ჩაატარა 35 შეხვედრა, გაიტანა 5 გოლი და 6 საგოლე გადაცემა შეასრულა. სარეზერვო გუნდში სტაბილურმა პროგრესმა და წინასასეზონო შეკრებაზე ჰანსი ფლიკის მოწონებამ მას პირველი გუნდის კარი საბოლოოდ გაუღო.