მატჩისშემდგომი მიმოხილვა: ჟოან, რას ელოდები?!

“კლასიკო” ისეთი მატჩია, მთელი სეზონი, რომ ჩააფლავო და “რეალთან” მოიგო, ბევრ რამეს გაპატიებენ. რონალდ კუმანი თან სეზონს აფლავებს, თან “რეალთან” აგებს უკვე მესამედ. სათქმელიც არაფერია, ერთადერთი მიზეზი რატომაც პოსტზეა არის ის, რომ მის შემცვლელზე შეთანხმება ვერ ხერხდება, თორემ, კუმანის იმედი ლაპორტას დიდი ხანია უკვე აღარ აქვს. რეალურად, არც არასდროს ჰქონია. 

თუმცა, ხანდახან ცვლილება საჭიროა, მხოლოდ ცვლილებისთვის. მხოლოდ დაძაბულობისა და ზედმეტი წნეხისგან გასათავისუფლებლად. ცვლილება ყოველთვის ერთი დიდი ამოსუნთქვაა, ახალი იმედი ჩნდება და განწყობაც იცვლება. ფეხბურთელებიც სულ სხვა შემართებით იწყებენ თამაშს, ახალი მწვრთნელისათვის თავის მოსაწონებლად. თან, ამჟამინდელ ხელმძღვანელობას როგორმე ტვინი ეყოფა, რომ ვინმე სეტიენივით კაცი არ მოიყვანონ. მოკლედ, როგორი რთული ვითარებაც არ უნდა იყოს, ცვლილების დროა. არ არის საჭირო, მაინცდამაინც ჩემპიონთა ლიგის ჯგუფში ჩარჩენას ველოდოთ. 

ისევ იგივე

სტადიონი გაივსო, იყო საფრთხე, რომ ცარიელი ადგილები დარჩებოდა, მაგრამ ბოლომდე გაივსო, მათ შორის ბევრი ნაცნობი სახეც ვიხილეთ, კარლეს პუიოლი და ლუის ენრიკე, რონალდინიო და დეკუ, იქნებოდნენ კიდე ლეგენდები, დანი ალვესისთვის არ მომიკრავს თვალი, ალბათ განაწყენებულია და ამ მატჩის მერე კიდევ უფრო მეტად განაწყენდებოდა, რადგან “ბარსას” არ ჰყავს ფეხბურთელი, რომელიც მასზე უკეთ ითამაშებდა მარჯვენა ფლანგზე, თუნდაც ამ ასაკში. 

რონალდ კუმანმა ბოლო დროს გამოყენებული ტაქტიკა არ შეცვალა. 4-3-3 შეტევის დროს, 5-3-2 დაცვის დროს. დესტი ისევ ერთდროულად ასრულებდა მცველისა და გარემარბის ფუნქციებს, რაც ცოტა კომიკურად ჟღერს, ვერც მცველად ივარგა და ვერც შემტევად. ერთადერთი ცვლილება ვიხილეთ, კუმანმა გადაწყვიტა, რომ ძალიან კარგ ფორმაში შესულ ვინისიუშს მინგესა უფრო გაუმკლავდებოდა, ვიდრე სერჟი რობერტო. არ ვიცი, შესაძლოა ასეც ყოფილიყო, მინგესა, რობერტო, დესტი.. რა აზრი აქვს?! ყველა იმდენ შეცდომას უშვებს, რომ მშვიდად ვერცერთ შემთხვევაში ვერ იქნები. გუშინ, ვინისიუში დემბელეს შეადარეს, ეს შედარებები რამდენიმე წლის წინ დაიწყო, მაგრამ ახლა ცოტა უადგილო მგონია, რეალის გარემარბი ვითარდება, ფაქტია, რომ იმაზე ბევრად კარგია, ვიდრე წლების წინ იყო, სამომავლოდ, შესაძლოა იმაზე კარგი გახდეს, ვიდრე ახლა არის, რობინიოს დონეს თუ მიაღწია კარგი იქნება. აი, დემბელე ისევ იქ არის სადაც იყო, ანუ, ლაზარეთში. 

მთავარი საფრთხე ვინისგან მოდიოდა, თავიდანვე ნათელი იყო, რომ ასე იქნებოდა. ყველამ იცის, რომ “ბარსას” უსუსტესი წერტილი მარჯვენა ფლანგია. ის რომ “რეალმა” უფრო ადრე ვერ მოამთავრა საქმე, ბრაზილიელის უზუსტობის და ბენზემას არც თუ ისე კარგი თამაშის ბრალი იყო, ჩვენზე მეტი მომენტი შექმნეს, უფრო გააზრებული კომბინაციებით და მხოლოდ დამაგვირგვინებელ ფაზაში ურევდნენ. მიუხედევად ამისა, მაინც მიაღწიეს საწადელს, რაც ძალიან ცუდად მეტყველებს კუმანის “ბარსელონაზე”. 

ვიდეოანალიზისას გოლებს დეტალურად განვიხილავთ, ორივე გოლი კარგად განსახილველია და სათქმელიც ბევრი იქნება. 

გავის პრობლემა

ეს ამბავიც სასაცილოა თუ სატირალი ვერ გაიგებ, რონალდ კუმანი სანაკრებო პაუზამდე გავის მცირე დროს ანდობდა, პაუზის შემდეგ კი ძირითადის წევრად აქცია, ყველა აღნიშნავდა, რომ გავი ესპანეთის ნაკრებში ბევრად კარგი იყო, ვიდრე კლუბში, ყველა აღნიშნავდა და დეტალურად განიხილავდნენ თუ რატომ ხდებოდა ასე, იწერებოდა, რომ ენრიკეს ფილოსოფიაში და ტაქტიკაში გავი იდეალურად ჯდებოდა, ბურთთან ძალიან ხშირად იყო და თამაშის კონტროლის საშუალება ეძლეოდა. ერთადერთი კაცი, რომელიც განსხვავებას ვერ მიხვდა რონალდ კუმანი იყო, მან უბრალოდ ჩათვალა, რომ საქმე არა სათამაშო ტაქტიკაში და ხედვაში, არამედ, თავად გავიში იყო, მგონი იფიქრა, რომ ასეთ მოკლე დროში ძალიან განვითარდა და გაამწესა ძირითადში. არ მინდა დავიჯერო, რომ მისგან ისეთ დონეზე თამაშს ელოდა, როგორც ნაკრებში ითამაშა, თუ ასეა, იმაზე დიდი პრობლემები გვქონია, ვიდრე გარედან ჩანს, რადგან, ეს გადაწყვეტილება და ფუჭი მოლოდინი იმის მანიშნებელია, რომ რონალდ კუმანი უბრალოდ ვერაფერს ვერ ხვდება. 

ალბათ, გულში მწარედ ეცინებოდა ლუის ენრიკეს. რამხელა პოტენციალს ხედავს ამ ბიჭში, რა სწორად იყენებს ნაკრებში და რას უყურა ტრიბუნიდან?! 17 წლის გავი მაშინ არის კარგი, როცა ბურთი გაქვს და თამაშს აკონტროლებ და არა მაშინ, როცა ძაღლივით გიწევს ბურთის დევნა და სწრაფადვე ცდილობ შეტევას, ყოველგვარი კონტროლის და გააზრებული ფეხბურთის გარეშე. რა თქმა უნდა, დაჩაგრეს. ფიზიკურად ყველასთან დაიჩაგრა. რატომ ჯარიმდება ხშირად? იმიტომ, რომ ფიზიკურად სუსტია, ჯარიმას იღებს მაშინ, როცა აღარ შეუძლია. 

ასე თუ გაგრძელდა, მისი პოტენციალი თვალსა და ხელსშუა გაქრება. ამიტომ არის ცვლილება საჭირო, თანაც, ძალიან სწრაფად. 

შემტევები

რავიცი.. მეტი მსურდა. ფატიმ უფრო მეტი მომენტი შექმნა, ვიდრე დეპაიმ. თუმცა, ყველაზე აშკარა საგოლე მომენტი ერთად შექმნეს, დეპაიმ ითამაშა ძალიან კარგად, ფატის მცირე შეხებაც ძალიან კარგი გამოდგა და.. დესტმა დაარტყა თავის სამშობლოში! წინა მატჩში დავსვით კითხვა, – რა აზრი აქვს შემტევად დააყენო ფეხბურთელი, რომელიც კარში ვერ ურტყამს?! სწრაფია? ჩაწოდება შეუძლია? მაგას ხომ დაცვიდანაც გააკეთებს?! ის რაც ბოლო წუთზე გააკეთა, მაგის გაკეთებას დაცვიდანაც ახერხებს. 

კარგია, რომ აგუერომ შეაგდო. კიდევ უფრო მეტი დრო მიეცემა, მაგრამ, ისევ იმ პრობლემასთან მივალთ, რომელზეც უკვე გვისაუბრია. გუნდს მარჯვენა გარემარბი არ ჰყავს და სანამ დემბელე არ დაბრუნდება, არც ეყოლება. ამიტომ, დეპაი-ფატი-აგუეროს თამაში ერთად არ გამოდის. 

ვისგანაც მეტს ველოდით

პირველ რიგში, ფრენკი დე იონგზე უნდა ითქვას. კი თქვეს ტრავმით ითამაშაო, მაგრამ, რაღაც თავის გასამართლებელ მიზეზს უფრო ჰგავდა. თან, შეცდომები ჰქონდა გადაწყვეტილებებში და არა ბრძოლაში, არა მგონია, გონება ჰქონოდა ტრავმირებული. ასევე, იმედგაცრუებული დავრჩი ჟორდი ალბასგან, ხან დეპაის, ხან ფატის, უფრო აქტიურად უნდა მიხმარებოდა, თუმცა, შესაძლოა ზედმეტს ვთხოვდე, აღარ არის პატარა ბიჭი და რამდენჯერმე ისე ჩაუქროლა როდრიგომ რომ ამაში კიდევ ერთხელ დავრწმუნდი. ისე კაცი, რომელიც მის შემცვლელად გვსურდა, სულ სხვა გუნდში აღმოჩნდა და გოლიც გაგვიტანა, ამ კაცს ორ პოზიციაზე შეუძლია თამაში და საუკეთესო ტრანსფერი იქნებოდა, რადგან, ხან ალბას შეცვლიდა და ხან გარსიას, რომელიც დიდი იმედგაცრუება გამოდგა. 

მოგებას არ ველოდი, მაგრამ.. თითქოს ყაიმი უნდა ყოფილიყო. შეიძლებოდა ამის მიღწევა. 

ჰოდა, “კამპ ნოუზე”, რომ “რეალთან” მოგებას არ ელოდები, ეს უკვე ძალიან დიდი პრობლემაა.