“ბარსელონა” ლა ლიგის ფავორიტია – fivethirtyeight

ცნობილმა ანალიტიკურმა პორტალმა, FiveThirtyEight-მა სპორტული ტურნირების პროგნოზები განაახლა. როგორც გაირკვა, ამერიკული კომპანიის მიერ შექმნილი ალგორითმი ესპანეთის ჩემპიონატის ფავორიტად “ბარსელონას” მიიჩნევს.

“ბარსელონა”, 7 თამაშში 11 ქულით, ლა ლიგაში მხოლოდ მე-8 ადგილს იკავებს. თუმცა, ისიც უნდა ითქვას, რომ “ბლაუგრანას” ლიდერ სოსიედადთან შედარებით 2 თამაშით ნაკლები აქვს ჩატარებული. რონალდ კუმანის გუნდის მთავარ კონკურენტებად “ატლეტიკო” (7 თამაშში 17 ქულა) და “რეალი” (8 თამაშში 16 ქულა) მიიჩნევიან.

FiveThirtyEight “ბარსელონას” მიერ ლა ლიგის მოგების ალბათობას 37%-ით აფასებს. მადრიდული გუნდების შანსები 24-24%-ით შეფასდა. შემდეგ მოდის ლიდერი “სოსიედადი” 9%-ით.

პროგნოზის თანახმად, “ბარსელონა” ლა ლიგაში 80 ქულას აიღებს, “რეალი” და “ატლეტიკო” 76-76, ხოლო “სოსიედადი” 70.

იმავე პორტალის ვერსიით, “ბარსელონას” ჩემპიონთა ლიგის ფინალში გასვლის 21%-იანი, ხოლო ტურნირის მოგების 11%-იანი შანსი აქვს. კატალონილები ამ მხრივ “ბაიერნსა” და “მანჩესტერ სიტის” ჩამორჩებიან.