ერთი მოგება ლა ლიგის საუკეთესო სტარტის რეკორდამდე

მიმდინარე სეზონის დასაწყისში “ბარსელონასგან” იმაზე მეტის მოთხოვნა, რაც გუნდმა აჩვენა, ფაქტობრივად შეუძლებელი იყო. კატალონიელებმა ლა ლიგის საწყისი შვიდივე შეხვედრა მოიგეს და სანაკრებო პაუზას სატურნირო ცხრილის სათავეში, უდანაკარგოდ, 21 ქულით შეხვდნენ – უახლოეს მდევრებთან, მადრიდის “ატლეტიკოსთან” და “ბეტისთან” ხუთქულიანი უპირატესობით.

ტატა მარტინოს რვიდან რვა

ეს თითქმის უნაკლო დასაწყისი გახლდათ, თუმცა “ბარსას” მეტი სურს. სანაკრებო პაუზის შემდეგ ჩემპიონატის პირველსავე მატჩში გამარჯვება გუნდს კლუბის ისტორიაში ლა ლიგის საუკეთესო სტარტის რეკორდს გაუთანაბრებს – რვა მოგება საწყის რვა ტურში.

“ბარსელონას” ისტორიაში მსგავსი შედეგის დაფიქსირება მხოლოდ ერთხელ მოხერხდა: ტატა მარტინოს ხელმძღვანელობით 2013/14 წლების სეზონში, რომელიც არგენტინელი სპეციალისტისთვის კლუბში ერთადერთი აღმოჩნდა.

მაშინდელმა “ბარსამ” სეზონი ზედიზედ რვა გამარჯვებით გახსნა და გზად შთამბეჭდავი საგოლე მაჩვენებლებიც დააფიქსირა (თუმცა არა ისეთი გამანადგურებელი, როგორსაც ჰანსი ფლიკის გუნდი აჩვენებს). მათ სეზონი “ლევანტესთან” 7-0 განადგურებით დაიწყეს, რასაც გაცილებით დაძაბული მატჩები მოჰყვა: “მალაგასთან” გასვლაზე (1-0), “მესტალიაზე” (3-2) და შინ “სევილიასთან” (3-2). ამის შემდეგ გუნდმა დამაჯერებელი სვლა “რაიო ვალეკანოსა” (4-0) და “რეალ სოსიედადთან” (4-1) განაგრძო.

შემდეგ იყო გამარჯვებები “ალმერიასთან” (2-0) და “ვალიადოლიდთან” (4-1), რამაც რვიდან რვა მოგება შეადგინა, სანამ “ბარსა” პამპლონაში “ოსასუნასთან” უგოლო ფრით პირველ ქულებს დაკარგავდა. ათზე მეტი წლის შემდეგ, ჰანსი ფლიკის “ბარსელონას” ამ ისტორიული მიღწევის გამეორების შესანიშნავი შანსი ეძლევა.

ხეტაფე ყოველთვის რთული გამოცდაა

მეტოქე კი “ხეტაფეა” – გუნდი, რომლის წინააღმდეგ თამაშიც იოლი არასდროს არის. ხოსე ბორდალასის გუნდები ყოველთვის ურთულეს გამოცდას სთავაზობენ მოწინააღმდეგეს. თუმცა “ბარსა” საქმეს შესანიშნავ ფორმაში უბრუნდება და თან კიდევ ერთი შთამბეჭდავი სერიის დასაცავად იბრძოლებს: ლა ლიგაში საკუთარ მოედანზე ზედიზედ მოგებული 22 მატჩის შემდეგ, კატალონიელები ამ რიცხვის 23-მდე გაზრდას შეეცდებიან.