"ინტერი" ლაუტარო მარტინესის "ბარსელონასგან" "დაცვას" გეგმავს

მილანის "ინტერი" გუნდის არგენტინელი თავდამსხმელით, ლაუტარო მარტინესით "ბარსელონას" დაინტერესების გამო შეშფოთებულია და აპირებს 22 წლის ფეხბურთელს ახალი კონტრაქტი შესთავაზოს. ამ ინფორმაციას Transfermarkt-ს ჟურნალისტი ნიკოლო შირა ავრცელებს.

როგორც ცნობილია, ლაუტარო მარტინესის გამოსასყიდი თანხა 111 მილიონი ევროა. ასევე ვრცელდება ინფორმაცია, რომ ახალგაზრდა არგენტინელი, მომდევნო ზაფხულისთვის, "ბარსელონას" მთავარი სამიზნე იქნება. მილანში შიშობენ, რომ კატალონიელები გამოსასყიდ თანხას გადაიხდიან და "ნერაძურის" ერთ-ერთ ლიდერს "ბარსელონაში" გადაიყვანენ.

ნიკოლო შირას ცნობით, "ბარსელონას" გეგმის ჩასაშლელად, "ინტერი" აპირებს მარტინესს შესთავაზოს ახალი კონტრაქტი, რომელშიც გამოსასყიდი თანხა გაზრდილი იქნება. კლუბი ცდილობს ფეხბურთელი ხელფასის მომატებით დაითანხმოს - იტალიელები მარტინესს წელიწადში 3.5 მილიონს სთავაზობენ, აგენტი კი 5 მილიონს ითხოვს.

მარტინესი, რომელსაც "ბარსა" ლუის სუარესის შემცვლელად განიხილავს, შესანიშნავ სეზონს ატარებს. გამართულ 18 შეხვედრაში მან უკვე 11 გოლი გაიტანა. შედარებისთვის, გასულ სეზონში, ლაუტაროს აქტივში 35 მატჩში გატანილი 9 გოლი იყო.