პირველად აპრილის შემდეგ - "ბარსელონამ" სტუმრად გაიმარჯვა
"კოლიზეუმ ალფონსო პერესზე" "ბარსელონა" "ხეტაფეს" დაუპირისპირდა და სეზონში, სტუმრად, პირველი ოფიციალური გამარჯვება მოიპოვა. ბოლოს, "ბარსამ" გასვლაზე მეტოქე აპრილში დაამარცხა - ეს "ალავესი" იყო. დღეს, კატალონიელებმა მეტოქე 2-0 დაამარცხეს.
მასპინძლებმა თამაში კარგად დაიწყეს, მაგრამ 41-ე წუთზე ლუის სუარესმა ანგარიშის გახსნა მოახერხა, მეორე ტაიმის დასაწყისში კი ჟუნიორ ფირპომ უპირატესობა გაზარდა. დარჩენილ დროში მოედანზე დაძაბულობა გაიზარდა და მატჩის მიწურულს "ბარსას" ცენტრალურმა მცველმა, კლემან ლანგლემ, მეორე ყვითელი ბარათი და გაძევება დაიმსახურა.
7 თამაშის შემდეგ, "ბარსელონას" 13 ქულა აქვს და დროებით მეორე ადგილზეა. პირველ პოზიციას 6 მატჩით და 14 ქულით მადრიდის "რეალი" იკავებს, ტური კი ხვალ დასრულდება.
"ბარსელონა" მე-8 ტურის მატჩს 6 ოქტომბერს გამართავს. ერნესტო ვალვერდეს გუნდის მეტოქე, "კამპ ნოუზე", "სევილია" იქნება. იქამდე, "ბარსა" ჩემპიონთა ლიგის ეგიდით, 2 ოქტომბერს, მილანის "ინტერს" მიიღებს.
ამ სიახლეზე კომენტარები გათიშულია.
კომენტარები [ 7 ]