"ბარსელონას" იერი მინას 60 მილიონ ევროდ დაბრუნება შეუძლია

დღეს, "ბარსელონამ" და "ევერტონმა", იერი მინას ტრანსფერზე, შეთანხმებას მიაღწიეს. კატალონიურმა კლუბმა დაადასტურა, რომ მერსისაიდელებმა კოლუმბიელ ცენტრალურ მცველში 30.25 მილიონი ევრო გადაიხადეს, ბონუსების სახით კი 1.5 მილიონია გათვალისწინებული.

ასევე ოფიციალურად დადასტურდა, რომ "ბარსამ" 23 წლის ფეხბურთელის გამოსყიდვის უფლება დაიტოვა, მაგრამ არ გაჟღერებულა თანხა.

Marca-ს ცნობით, "ბარსელონას" უფლება აქვს, იერი მინა თითქმის ორმაგ ფასად, 60 მილიონ ევროდ გამოისყიდოს. ეს პუნქტი გარიგებაში იმ შემთხვევისთვისაა ჩადებული, თუ მინამ "ევერტონში" გაიბრწყინა და მისმა ფასმა მნიშვნელოვნად მოიმატა. გასათვალისწინებელია ისიც, თუ რამდენად სწრაფად იზრდება ფასები ფეხბურთში და არაა გამორიცხული, რომ რამდენიმე წელიწადში, იერი მინაში 60 მილიონი ევროს გადახდა გონივრული იყოს. გასულ იანვარში, მინას ტრანსფერი სულ რაღაც 11.8 მილიონი ევრო დაჯდა, რაც იმას ნიშნავს, რომ სულ რაღაც 7 თვეში, მისი ფასი 2.5-ჯერ გაიზარდა.