"ბარსელონა" "ჩელსის" გაუთანაბრდა

დღეს, ახალგაზრდული ჩემპიონთა ლიგის ფინალში, "ბარსელონას" 19-წლამდელთა გუნდმა ლონდონის "ჩელსის" ამავე ასაკის გუნდი 3:0 გაანადგურა და ტიტულს დაეუფლა.

"ბარსელონამ" ტურნირი, რომელიც 2013/14 წლების სეზონიდან თამაშდება, უკვე მეორედ მოიგო.

პირველი გათამაშება სწორედ "ბარსას" გამარჯვებით დასრულდა. დღევანდელი მატჩის მსგავსად, კატალონიელებმა ფინალში 4 წლის წინათაც 3:0 იმარჯვეს, დატოვეს რა უშანსოდ "ბენფიკა".

შემდეგ იყო "ჩელსის" ზედიზედ 2 მოგება. ლონდონელებმა ფინალში ჯერ "შახტარი", შემდეგ კი "პარი სენ-ჟერმენი" დაამარცხეს.

წინა სეზონში, ფინალში "ზალცბურგმა" და "ბენფიკამ" ითამაშეს. პორტუგალიელებმა ამჯერადაც წააგეს.

წელს კი, "ბარსელონამ" მთელი ტურნირი წაუგებლად განვლო. კატალონიელებმა, ჯგუფში, "სპორტინგს", "ოლიმპიაკოსსა" და "იუვენტუსს" მარტივად აჯობეს - გარსია პიმიენტას გუნდმა 5 თამაში მოიგო და 1 ფრედ დაასრულა. 1/8-ფინალში "ბარსამ" პსჟ-ს 1:0 სძლია, 1/4-ფინალში "ატლეტიკოს" 2:0, 1/2-ფინალში "მანჩესტერ სიტის" 5:4 და ფინალში "ჩელსის" 3:0.

""ლურჯების"" განადგურებით, "ბარსელონამ" ამავე გუნდის მიღწევა გაიმეორა და 5 წელში 2-2 მოგებით ტურნირის რეკორდსმენები სწორედ "ბარსა" და "ჩელსი" არიან.