"ბარსელონა" ჩემპიონატში გალიდერდა
ესპანეთის ჩემპიონატის 21-ე ტურში, "მალაგასთან" მოგება "ბარსელონასთვის" იოლი არ ყოფილა, მაგრამ ტური კატალონიელებისთვის, საერთო ჯამში, მაინც წარმატებული გამოდგა. ამის მიზეზი კი კონკურენტების მიერ ქულების დაკარგვაა.
მადრიდულმა გუნდებმა თავიანთი თამაშები კვირას გამართეს. "ატლეტიკო" "სევილიას" მასპინძლობდა და "ვისენტე კალდერონზე" გამართული შეხვედრა უგოლოდ დასრულდა. ეს ნიშნავს, რომ "ბარსელონა" "როხიბლანკოს" დაეწია, ხოლო დამატებითი პარამეტრებით წინ კატალონიელები არიან. ცნობისთვის, მომდევნო ტურში, "კამპ ნოუზე", ერთმანეთს სწორედ "ბარსელონა" და "ატლეტიკო" დაუპირისპირდებიან, რომლებიც გათამაშებას 48-48 ქულით ლიდერობენ.
ქულები დაკარგა "რეალმაც", რომელიც "ბეტისს" ეწვია. ზინედინ ზიდანის გუნდი, ანდალუსიაში გამართულ მატჩს მე-7 წუთიდან აგებდა. მადრიდელებს ქულა ქარიმ ბენზემამ მოუტანა, რომელმაც ანგარიში 71-ე წუთზე გაათანაბრა. "რეალი", "ბარსელონასა" და "ატლეტიკოს", 4 ქულით ჩამორჩება.
შეგახსენებთ, რომ "ბარსელონას" "ატლეტიკოსა" და "რეალზე" ერთით ნაკლები თამაში აქვს ჩატარებული. ამ მატჩს კატალონიელები 17 თებერვალს, "ხიხონთან" სტუმრად გამართავენ.
ამ სიახლეზე კომენტარები გათიშულია.
კომენტარები [ 63 ]