დამაიმედებელი სტატისტიკა ნაპოლისთან

დღეს "ბარსელონა" ჩემპიონთა ლიგის 1/8-ფინალის განმეორებით თამაშს გამართავს. "ბლაუგრანას" მეტოქე ხვიჩა კვარაცხელიას "ნაპოლი" იქნება.

იტალიაში გამართული პირველი დაპირისპირება 1-1 დასრულდა, რაც ამ გუნდების ურთიერთშეხვედრების ისტორიის გათვალისწინებით გასაკვირი სულაც არ ყოფილა.

"ბარსელონა" და "ნაპოლი" ერთმანეთს მესამედ გადაეყარნენ. წინა ორ შემთხვევაში პირველი თამაში 1-1 სრულდებოდა, საბოლოოდ კი მომდევნო ეტაპზე კატალონიელები გადიოდნენ.

გუნდების პირველი ოფიციალური შეხვედრა 2020 წელს, ჩემპიონთა ლიგის 1/8-ფინალში შედგა. იტალიაში 1-1 თამაშის შემდეგ "ბარსამ" შინ 3-1 მოიგო.

შემდეგ იყო 2022 წელი და ევროპა ლიგის ფლეი ოფის ეტაპი. პირველი დაპირისპირება კვლავ 1-1 დასრულდა, ამჯერად "კამპ ნოუზე", განმეორებით მატჩში კი "ბლაუგრანამ" 4-2 მოიგო.

სტატისტიკა გვიჩვენებს, რომ დღეს ჩავის გუნდისგან ორბურთიანი სხვაობით მოგებას უნდა ველოდეთ.