ოფიციალურად: კლემან ლანგლე ბარსელონას საბოლოოდ ტოვებს

“ბარსელონამ” და ფრანგმა ცენტრალურმა მცველმა კლემან ლანგლემ საბოლოოდ მიაღწიეს შეთანხმებას კონტრაქტის ნაადრევად გაწყვეტაზე. შედეგად, ფეხბურთელი თავისუფალი აგენტის სტატუსით შეუერთდება მადრიდის “ატლეტიკოს”, სადაც მიმდინარე სეზონი იჯარით გაატარა.

29 წლის ლანგლე “ბარსელონას” 2018 წელს, “სევილიადან” 36 მილიონ ევროდ შეუერთდა და კლუბთან ერთად მოიგო ყველა შესაძლო შიდა ტიტული. თუმცა, ბოლო წლები ძირითადად იჯარით გაატარა – ჯერ ლონდონის “ტოტენჰემში”, შემდეგ “ასტონ ვილაში” და ბოლოს “ატლეტიკოში”.

ფეხბურთელმა საკუთარი სურვილით დათმო სოლიდური თანხა და კონტრაქტის გაწყვეტაზე დათანხმდა, რათა კარიერა მადრიდში გაეგრძელებინა. ცნობილმა ინსაიდერმა ფაბრიციო რომანომ დაადასტურა, რომ ლანგლე “ატლეტიკოსთან” სამწლიან კონტრაქტს გააფორმებს.

საფეხბურთო წრეებში ვარაუდობენ, რომ ხელშეკრულება სწრაფად გაფორმდება და ლანგლე შეძლებს კლუბის შემადგენლობაში ითამაშოს მსოფლიოს საკლუბო ჩემპიონატზე.

ლანგლეს გზა “ბარსელონაში”

ფრანგმა მცველმა კატალონიურ გრანდში 160 შეხვედრაში მიიღო მონაწილეობა, გაიტანა 7 გოლი და შეასრულა 3 საგოლე გადაცემა. კარიერის საწყის ეტაპზე ხშირად წყვილში გამოდიოდა ჟერარ პიკესთან ერთად, თუმცა მეორე სეზონის შემდეგ ძირითად შემადგენლობაში ადგილი დაკარგა.

ლანგლეს სეზონი “ატლეტიკოში”

2024/25 წლების სეზონი ლენგლესთვის პოზიტიური აღმოჩნდა – 34 მატჩში 3 გოლი და 2 საგოლე გადაცემა. თუმცა მარტში და აპრილში სუსტი პერიოდი ჰქონდა – რამდენიმე პენალტი საკუთარი შეცდომის ხარჯზე აიკიდა მნიშვნელოვანი მატჩების დროს.
ორივე კლუბმა ოფიციალურად დაადასტურა ტრანსფერი.