გარსია ბარსელონაში – კატალონიელთა ახალი იმედი კარში

“ბარსელონა” დატვირთულ სატრანსფერო ზაფხულს გეგმავს და კლუბი უკვე ახლოსაა პირველი შენაძენის გაოფიციალურებასთან – ჟოან გარსია მალე გახდება კატალონიური გრანდის მოთამაშე. 24 წლის მეკარემ უკვე მიაღწია შეთანხმებას ლა ლიგის ჩემპიონებთან და მისი “ესპანიოლიდან” ტრანსფერი, სავარაუდოდ, უახლოეს კვირებში დადასტურდება.

ჟოან გარსიას უწინასწარმეტყველებენ, რომ მსოფლიოს საუკეთესო მეკარე გახდება.

გარსია 2024/25 წლების სეზონში ბრწყინვალედ გამოვიდა “ესპანიოლის” შემადგენლობაში და ბევრის აზრით, ის სეზონის საუკეთესო მეკარე იყო ლა ლიგაში. ყოფილი მწვრთნელი, ხესუს სალვადორი კი კიდევ უფრო შორს მიდის და აცხადებს, რომ გარსიას აქვს პოტენციალი, გახდეს მთელ მსოფლიოში საუკეთესო ამ პოზიციაზე – როგორც წერს Marca.

დღეს ჩემთვის მსოფლიოში საუკეთესო მეკარე რაიკოვიჩია – ის, ვინც ახლა ჩემთან, “ალ-იტიჰადშია”, მაგრამ ვინც გახდება საუკეთესო – ის არის ჟოან გარსია. არ ვამბობ, რომ უკვე არის, მაგრამ რომ იქნება – ეს ნამდვილად ვიცი. მისი პოტენციალი შესანიშნავად ვიცი და ჯერჯერობით მხოლოდ ზედაპირზე შესამჩნევი შესაძლებლობები ვიხილეთ. მას წინ დაუვიწყარი საღამოები ელის. ის იქნება ისეთივე, როგორებიც იყვნენ ნოიერი, ვალდესი, ტერ შტეგენი, დიეგო ლოპესი… ჩვენ მასში პოტენციალი თავიდანვე დავინახეთ.”

ის მზადაა, მთავარი როლი ითამაშოს. “ესპანიოლში” ის ხშირად ექცეოდა ზეწოლის ქვეშ, ბევრ საგოლე მომენტს იგერიებდა. ახლა კი, თუ ბარსელონაში გადავა, სიტუაცია საპირისპირო იქნება – მას გაცილებით ნაკლები სამუშაო ექნება დაცვაში, მაგრამ როცა საქმეს დასჭირდება, მაქსიმალური სიზუსტე უნდა გამოიჩინოს. თავიდანვე სრული კონცენტრაცია უნდა ჰქონდეს და ეს მისთვის პრობლემა არ იქნება. გარსია ჭკვიანია, ყოველთვის ფოკუსირებულია, და შესანიშნავად მუშაობს დაცვის ხაზთან. ის მზად არის.”

გარსია, როგორც მოსალოდნელია, ბარსელონაში ძირითადი მეკარის სტატუსით მივა, რაც აჩვენებს, თუ რამდენად დიდი ნდობა აქვს კლუბს მის მიმართ. მისი ბოლო 12-15 თვის განმავლობაში ნაჩვენები შედეგების ფონზე, ეს ნდობა სავსებით გამართლებულია.