პსჟ-ს უპირატესობა, რისი ფუფუნებაც ბარსელონას არ აქვს

სანაკრებო პაუზის შემდეგ საკლუბო ფეხბურთის განახლებისას, “პარი სენ-ჟერმენმა” უსმან დემბელესა და ნუნუ მენდეშს დამატებითი დასვენების დღეები მისცა. ყოფილი ბარსელონელი მინდორს “მანჩესტერ სიტისთან” მატჩში დაუბრუნდა და შეხვედრის წინ ლუის ენრიკეს მეთოდები ღიად შეაქო:

“როდესაც დასვენება მჭირდება, ლუის ენრიკე ამას თავად მაგრძნობინებს ხოლმე. მე მებრძოლი ვარ და ყველა მატჩში თამაში მსურს, თუმცა ყველა შეხვედრის ჩატარება შეუძლებელია. ფიზიკური დატვირთვის გადანაწილება ის თემაა, რომელსაც ის ბრწყინვალედ მართავს”.

“მანჩესტერ სიტის” დამარცხების შემდეგ დემბელემ იხუმრა კიდეც: “სამშაბათს და ოთხშაბათს თამაში მიყვარს, განსაკუთრებით არდადეგებიდან დაბრუნების შემდეგ. ეს დიდი სიამოვნებაა. თუ შესაძლებელია, მარტამდე შვებულებას ავიღებდი”. ლუის ენრიკემ იმავე ტონით უპასუხა: “თუ შვებულება უნდა, შვებულება ექნება”.

ეს დიალოგი ნათლად ხსნის პარიზული კლუბის ფიზიკური დატვირთვის პოლიტიკას, რომელმაც ბოლო სეზონებში პსჟ-ს წარმატებას საფუძველი ჩაუყარა. ლუის ენრიკემ მიაღწია იმას, რომ მისი წამყვანი ფეხბურთელები სეზონის გადამწყვეტ ფაზას გადაღლილობის გარეშე, იდეალურ კონდიციებში ხვდებიან.

2000-წუთიანი ზღვარი: 8 ბარსელონელი 3 პარიზელის წინააღმდეგ

გასულ სეზონში “ბარსელონას” რვა ფეხბურთელმა გადალახა 2000-წუთიანი ნიშნული ლა ლიგაში:

• ერიკ გარსია – 2 721 წუთი;
• პაუ კუბარსი – 2 703 წუთი;
• ჟოან გარსია – 2 700 წუთი;
• ლამინ იამალი – 2 262 წუთი;
• ჟიულ კუნდე – 2 261 წუთი;
• ჟერარ მარტინი – 2 119 წუთი;
• პედრი – 2 104 წუთი;
• დანი ოლმო – 2 067 წუთი.

საპირისპიროდ, პსჟ-ს რიგებში ლიგა 1-ში ამ ზღვარს მხოლოდ სამმა მოთამაშემ მიაღწია: ვორენ ზაირ-ემერიმ (2 447), ილია ზაბარნიმ (2 387) და ვიტინიამ (2 119). გასათვალისწინებელია ისიც, რომ საფრანგეთის ჩემპიონატში 18-გუნდიანი ფორმატის გამო ოთხი ტურით ნაკლები იმართება.

ვარსკვლავების დაზოგვა: კვარაცხელია, დემბელე და მარკინიოსი

ლუის ენრიკეს აქვს ფუფუნება, რომ შიდა ჩემპიონატში წამყვანი ფიგურები რეგულარულად დაასვენოს.

ჩემპიონთა ლიგის გასული სეზონის საუკეთესო მოთამაშემ (MVP), ხვიჩა კვარაცხელიამ, ლიგა 1-ში სულ 1 479 წუთი ითამაშა. ქართველი შემტევი სასტარტოში მხოლოდ 18-ჯერ გამოჩნდა, 10-ჯერ შეცვლაზე შევიდა და საფრანგეთის ჩემპიონატში 90 წუთი მხოლოდ სამ შეხვედრაში ჩაატარა, მაშინ როდესაც ჩემპიონთა ლიგაზე ექვსი სრული მატჩი ჰქონდა.

თვალშისაცემია უსმან დემბელეს შემთხვევაც: 11 მატჩი ძირითადში, 11 შეცვლაზე, 10 ტრავმის გამო გამოტოვებული. მან ლიგა 1 სულ 1 063 წუთით დახურა (მხოლოდ 74 წუთით მეტი, ვიდრე მარკ კასადომ “ბარსელონაში”) და ჩემპიონატში მხოლოდ ერთი სრული მატჩი ჩაატარა, ჩემპიონთა ლიგაზე კი – ხუთი. ტრიოს მესამე წევრმა, დეზირე დუემ, სასტარტოში 16 მატჩი დაიწყო და ჯამში 1 348 წუთი ითამაშა.

განსაკუთრებული ყურადღებით ეკიდება ლუის ენრიკე გუნდის კაპიტანს, მარკინიოსს. ბრაზილიელმა ლიგა 1-ში სასტარტოში მხოლოდ 11-ჯერ ითამაშა და ჯამში 1 052 წუთი დააგროვა (რონალდ არაუხოზე 19 წუთით ნაკლები). თებერვლის შუა რიცხვებიდან აპრილის შუამდე მას საფრანგეთის ჩემპიონატში ერთი წუთიც არ უთამაშია, თუმცა ამავე პერიოდში ჩემპიონთა ლიგის ყველა შეხვედრა შეუცვლელად ჩაატარა.

სწორედ ეს სიღრმე და შიდა ჩემპიონატში რესურსების ეკონომია აძლევს პსჟ-ს იმ ენერგეტიკულ უპირატესობას, რომლის გათანაბრებაც მუდმივი საკადრო დეფიციტისა და დაძაბული ლა ლიგის ფონზე “ბარსელონასთვის” თითქმის გადაუჭრელ პრობლემად რჩება.