ზაფხულში ბარსელონას მთავარი სატრანსფერო მიზანი ლუის დიასი იქნება – ალტერნატიული ვარიანტებიც განიხილება

“ბარსელონამ” “ლივერპულის” ვინგერი ლუის დიასი ზაფხულის სატრანსფერო ფანჯრის მთავარ პრიორიტეტად აირჩია მარცხენა ფლანგისთვის, თუმცა თუ “წითლების” პოზიცია გამართლდება, კატალონიელებს ალტერნატიულ ვარიანტებზე ფიქრი მოუწევთ.

ბოლო პერიოდში რამდენიმე სხვა ფეხბურთელთანაც გაჩნდა კავშირი – ზოგი მათგანი უფრო რეალისტურად მიიჩნევა, ზოგიც კი მხოლოდ დაკვირვების ობიექტი იყო. სწორედ ასეთი შემთხვევაა “დორტმუნდის” ვინგერი ჯეიმი გიტენსი. “CFBayern”-ის ცნობით, გერმანული კლუბი მის სანაცვლოდ 65 მილიონ ევროს ითხოვს, ყველაზე აქტიურ ინტერესს მის მიმართ კი “ჩელსი” იჩენს. მიუნხენის “ბაიერნისთვის” ეს თანხა ზედმეტად მაღალია, მიუხედავად იმისა, რომ ამ ზაფხულს ახალ ვინგერს ეძებს.

კინგსლი კომანი და ლეროი სანე “ბაიერნს” ტოვებენ

როგორც კრისტიან ფალკი იტყობინება, კინგსლი კომანის წასვლის ვარიანტს მიუნხენური გრანდი აქტიურად განიხილავს. მიუხედავად იმისა, რომ ფეხბურთელს “ბარსელონასთან” აკავშირებენ, ფალკის თქმით, კატალონიელებს მისი შეძენა ფინანსურად არ შეუძლიათ. კომანის მიმართ ინტერესს “ნიუკასლ იუნაიტედიც” იჩენს, თუმცა მისი პირველი არჩევანი საუდის არაბეთში გადასვლაა და “ბაიერნი” ელოდება შეთავაზებას “ალ-ჰილალისგან”.

ამასობაში, ლეროი სანეს კონტრაქტი იწურება და მას მოლაპარაკებები აქვს ლონდონის “არსენალთან” და “ტოტენჰემთან”. თუ იგი “ბაიერნს” დატოვებს, მისი სურვილი ინგლისის დედაქალაქში გადასვლაა, მიუხედავად იმ ჭორებისა, რომ შესაძლოა ჰანსი ფლიკის გაწვრთნილ გუნდს კვლავ შეუერთდეს.

ჟოან ლაპორტას სისუსტე – რაფაელ ლეაუ

“ბარსელონას” პრეზიდენტს ჟოან ლაპორტას განსაკუთრებული სიმპათიები აქვს “მილანის” ვარსკვლავ რაფაელ ლეაუს მიმართ, მისი სახელი კლუბში არაერთხელ გაჟღერებულა, თუმცა ფეხბურთელის ფასი ტრანსფერს საკმაოდ ართულებს – “მილანი” მის სანაცვლოდ დაახლოებით 100 მილიონ ევროს ითხოვს. კატალონიური კლუბის სპორტული დირექტორი დეკუ, როგორც ჩანს, სხვა მიმართულებით ფიქრობს. ლეაუს მიმართ ინტერესს “ბაიერნიც” იჩენდა, თუმცა ეს კავშირი ამ ეტაპზე აქტიური აღარ არის – მიუნხენელები ამ თანხის გადახდას არ აპირებენ, როგორც არ აპირებს ამ თანხის გადახდას “ბარსაც”.

ლუის დიასი “ბარსელონაზე” ოცნებობს

ლუის დიასს არ სურს საუდის არაბეთში თამაში – მისი სურვილია უმაღლეს დონეზე დარჩენა და ამ მიზნის მიღწევა სურს “ბარსელონაში” თამაშით. როგორც როჯერ ტორელო იუწყება პლატფორმა X-ზე გამოქვეყნებულ საკუთარ პოსტში, დიასი ყველაფერს აკეთებს იმისთვის, რომ ოცნება აისრულოს და “სპოტიფაი კამპ ნოუზე” თამაშის შესაძლებლობა მიიღოს.

მარკუს რაშფორდი – შემდეგი ალტერნატივა

თუ დიასის ტრანსფერი ვერ შედგება, მარკუს რაშფორდი “ბარსელონას” მთავარი ალტერნატივაა. ეს პოზიცია ჯერ კიდევ ძალაშია, ინგლისელი ფეხბურთელიც, გავრცელებული ინფორმაციით, კატალონიაში გადასვლას განიხილავს. ამ შემთხვევაში კლუბს “მანჩესტერ იუნაიტედის” დარწმუნება მოუწევს, რომ დროებითი იჯარის შესაძლებლობა და შემდგომი გამოსყიდვის უფლება მიიღოს.