პსჟ – ბარსელონა | მატჩისწინა მიმოხილვა

ჩემპიონთა ლიგის მესამე ტურში ერთმანეთს გათამაშების ორი ლიდერი დაუპირისპირდება. მოქმედი ჩემპიონი “პსჟ “პარი სენ-ჟერმენი” დაუმარცხებელ “ბარსელონას” უმასპინძლებს. შეხვედრა განსაკუთრებით საინტერესოა ლუის ენრიკესა და უსმან დემბელეს კატალონიურ კლუბთან დაპირისპირების გამოც, ჩვენთვის კი განსაკუთრებულ ფაქტორად ხვიჩა კვარაცხელიაც ემატება.

ზოგადი სიტუაცია

“ბარსელონას” სეზონის ერთ-ერთი ყველაზე რთული გამოცდა ელის. ჰანსი ფლიკის გუნდი ჩემპიონთა ლიგის ბოლო ორი გათამაშების გამარჯვებულ პსჟ-ს სტუმრობს, რომელიც ევროპულ ფეხბურთში დომინირებას აგრძელებს.

შეხვედრას სატურნირო ცხრილის ლიდერები ხვდებიან. ორივე გუნდმა საწყისი ორი თამაში მოიგო, ორივეს 6 ქულა და ბურთების ერთნაირი სხვაობა (+7) აქვს. თუმცა გატანილი გოლების რაოდენობით პირველ ადგილზე პსჟ არის, რომელმაც მეტოქეთა კარი 10-ჯერ აიღო, “ბარსელონამ” კი 9 გოლი გაიტანა.

პარიზელებმა ჯერ ბრატისლავის “სლოვანი” გაანადგურეს (6-1), შემდეგ კი სტუმრად “მანჩესტერ სიტის” 4-2 მოუგეს. კატალონიელებმა ჩემპიონთა ლიგა “ფეიენორდთან” 5-1 მოგებით დაიწყეს, რასაც “გალათსარაისთან” სტუმრად 4-1 გამარჯვება მოჰყვა.

დღევანდელი შეხვედრა არამხოლოდ პირველი ადგილისთვის ბრძოლაა. “ბარსელონას” მიმდინარე სეზონში ყველა ტურნირზე ჩატარებული 11 მატჩი მოგებული აქვს, პსჟ კი გუნდია, რომელსაც ამ სერიის დასრულების შანსი ეძლევა.

სათამაშო ფორმა

“ბარსელონა” მართლაც ფანტასტიკურ ფორმაშია. კატალონიელებმა მიმდინარე სეზონში ჩატარებული 11 მატჩიდან ყველა მოიგეს, მეტოქეებს 48 გოლი გაუტანეს და საშუალოდ ერთ შეხვედრაში 4.36 გოლს იტანენ. ლა ლიგაში გუნდს 9 ტურის შემდეგ 27 ქულა და 39 გატანილი გოლი აქვს.

განსაკუთრებით შთამბეჭდავია ბოლო შეხვედრები. “ბარსამ” “გალათსარაის” სტუმრად 4-1 მოუგო, რასაც “ბეტისთან” 5-2 გამარჯვება მიაყოლა. სევილიელებთან მატჩში ლამინ იამალმა კიდევ ერთხელ აჩვენა თავისი კლასი და ულამაზესი გოლი გაიტანა.

საინტერესოა, რომ “ბარსელონა” 1968 წლის შემდეგ პირველი გუნდია, რომელმაც ლა ლიგის საწყისი 9 მატჩიდან ყველა მოიგო. 1968 წელს ეს “რეალ მადრიდმა” შეძლო.

კატალონიელების შემტევი ფეხბურთი განსაკუთრებით ეფექტურია, თუმცა დაცვაში პრობლემები შეინიშნება. ბოლო 7 შეხვედრაში ფლიკის გუნდმა კარი მშრალად მხოლოდ ერთხელ შეინახა.

შესანიშნავ ფორმაშია პსჟ-ც. პარიზელებმა ყველა ტურნირზე ბოლო 6 მატჩი მოიგეს, 19 გოლი გაიტანეს და მხოლოდ 5 გაუშვეს. არადა, საფრანგეთის ჩემპიონატის პირველ სამ შეხვედრაში ლუის ენრიკეს გუნდმა გამარჯვება ვერ მოახერხა.

ბოლო ორ მატჩში პსჟ-მ “მანჩესტერ სიტის” სტუმრად 4-2 მოუგო, შემდეგ კი “სტრასბურგთან” 3-1 გაიმარჯვა. ინგლისში გამართული შეხვედრის პირველ 32 წუთში პარიზელებმა სამი გოლი გაიტანეს და მათი შემტევი პოტენციალი კიდევ ერთხელ წარმოაჩინეს.

თუმცა პრობლემები არც საფრანგეთის ჩემპიონს აკლია. პსჟ-მ მიმდინარე სეზონის 10 მატჩიდან კარი მშრალად მხოლოდ ერთხელ შეინახა, ბოლო ოთხ შეხვედრაში კი გოლი ყველა მეტოქისგან გაუშვა.

ამგვარად, ერთმანეთს ორი გამორჩეულად შემტევი გუნდი ხვდება, რომელთა სიძლიერეც პირველ რიგში ბურთის ფლობას, მაღალ პრესინგსა და შეტევაში მრავალფეროვნებას ეფუძნება.

დანაკლისი

“ბარსელონას” დაცვის ხაზში სერიოზული პრობლემები აქვს. “ბეტისთან” შეხვედრაში ტრავმები მიიღეს ჟიულ კუნდემ და ერიკ გარსიამ. ფრანგ მცველს კოჭის ტრავმა აქვს და მისი მონაწილეობა კვირას გასამართ “ელ კლასიკოშიც” საეჭვოა. ერიკ გარსიამ კი ბარძაყის კუნთი დაიზიანა და დაახლოებით 3-4 კვირა გაუცდება.

ტრავმირებულია ანდრეას კრისტენსენიც, რომელიც ასევე ბარძაყის პრობლემის გამო ვერ თამაშობს. დიდი ხნითაა გამოთიშული რუნი ბარდჯი, რომელსაც მუხლის ჯვარედინი მყესის დაზიანება აქვს.

კითხვის ნიშანი არსებობს ჟერარ მარტინის მდგომარეობასთან დაკავშირებითაც. ახალგაზრდა მცველმა “ბეტისთან” აქილევსის მყესის მიდამოში დარტყმა მიიღო და შესვენებაზე შეცვალეს. თუმცა მან პარიზში გუნდთან ერთად იმგზავრა და არსებობს შანსი, თამაში ძირითად შემადგენლობაში დაიწყოს.

კარგი ამბავი რაფინიასა და ფრენკი დე იონგის დაბრუნებაა. ბრაზილიელმა შემტევმა ტრავმის შემდეგ “ბეტისთან” ითამაშა და ფლიკმა დაადასტურა, რომ პსჟ-სთან ძირითად შემადგენლობაში თამაშისთვის მზადაა. დე იონგიც გუნდთან ერთადაა.

დანაკლისი აქვს პსჟ-საც. “სტრასბურგთან” მატჩში ბარძაყი დაიზიანა ნუნუ მენდეშმა. პორტუგალიელი მარცხენა მცველი რამდენიმე კვირას გამოტოვებს, რაც ლუის ენრიკესთვის მნიშვნელოვანი პრობლემაა.

საეჭვოა სენი მაიულუსა და ახალგაზრდა მეკარე ალესანდრო ლონგონის მონაწილეობაც. მაიულუმ გუნდთან ერთად ვარჯიში განაახლა, თუმცა მისი სათამაშოდ მზადყოფნა ბოლომდე გარკვეული არ არის. ფიზიკური პრობლემა ჰქონდა მაგნეს აკლიუშსაც.

სამაგიეროდ, პარიზელების სხვა ლიდერები ჯანმრთელები არიან. “სტრასბურგთან” შეხვედრაში ლუის ენრიკემ რამდენიმე წამყვანი მოთამაშე დაასვენა და დღეს თითქმის ოპტიმალური შემადგენლობის გამოყვანა შეუძლია.

ურთიერთშეხვედრები

“ბარსელონასა” და პსჟ-ს ერთმანეთის წინააღმდეგ 16 ოფიციალური მატჩი აქვთ ჩატარებული. საინტერესოა, რომ სრული თანაფარდობაა – ორივე გუნდმა 6-ჯერ მოიგო, 4 შეხვედრა კი ფრედ დასრულდა.

ჩემპიონთა ლიგაზე გუნდები 15-ჯერ დაუპირისპირდნენ ერთმანეთს. უპირატესობა პარიზელებს აქვთ: 6 მოგება, 4 ფრე და 5 წაგება. პსჟ-ს 29 გოლი აქვს გატანილი, “ბარსელონას” კი 28.

პარიზში გამართულ მატჩებშიც ფრანგული გუნდის უპირატესობაა. “პარკ დე პრენსზე” ჩატარებული 7 შეხვედრიდან მასპინძლებმა 3 მოიგეს, კატალონიელებმა – 2, ხოლო 2 ფრედ დასრულდა. გატანილი გოლების შეფარდებაა 15-12 პსჟ-ს სასარგებლოდ.

“ბარსელონას” ბოლო შეხვედრებში არცთუ სასიამოვნო ტენდენცია აქვს. პსჟ-მ ბოლო 5 ურთიერთშეხვედრიდან 3 მოიგო, კატალონიელებმა – მხოლოდ 1, ხოლო ერთი ფრედ დასრულდა. პარიზელებმა ბოლო ორი დაპირისპირებაც მოიგეს.

ყველაზე ბოლოს გუნდები ერთმანეთს 2025 წლის 1 ოქტომბერს, ჩემპიონთა ლიგის საერთო ეტაპზე შეხვდნენ. “ბარსელონა” ფერან ტორესის გოლით დაწინაურდა, თუმცა სენი მაიულუმ წონასწორობა აღადგინა, 90-ე წუთზე კი გონსალუ რამუშმა პსჟ-ს გამარჯვება მოუტანა (2-1).

მანამდე, 2024 წლის აპრილში, ჩემპიონთა ლიგის მეოთხედფინალის პირველი თამაში “ბარსელონამ” პარიზში 3-2 მოიგო, რაშიც დიდი წვლილი რაფინიას დუბლმა შეიტანა. განმეორებით შეხვედრაში კი კატალონიელები საკუთარ მოედანზე 1-4 დამარცხდნენ და ტურნირს გამოეთიშნენ.

დასამახსოვრებელია 2017 წლის დაპირისპირებაც. მაშინ პსჟ-მ “ბარსელონა” პარიზში 4-0 გაანადგურა, თუმცა საპასუხო მატჩში კატალონიელებმა 6-1 მოიგეს და ისტორიაში ერთ-ერთი ყველაზე შთამბეჭდავი ქამბექი შემოგვთავაზეს. საინტერესოა, რომ იმ დროს “ბარსას” სწორედ პსჟ-ს ამჟამინდელი მწვრთნელი ლუის ენრიკე ხელმძღვანელობდა.

ხვიჩა და ძველი ნაცნობები

დღევანდელ შეხვედრას ქართველი გულშემატკივრებისთვის დამატებითი ინტერესი აქვს – პსჟ-ს შემადგენლობაში ხვიჩა კვარაცხელია თამაშობს. საქართველოს ნაკრების ლიდერი პარიზელების შეტევის ერთ-ერთი მნიშვნელოვანი მოთამაშეა და სავარაუდოდ დღესაც ძირითად შემადგენლობაში იქნება. “ბარსელონას” მარჯვენა ფლანგზე არსებული საკადრო პრობლემების გათვალისწინებით, მისმა თამაშმა შესაძლოა განსაკუთრებული მნიშვნელობა შეიძინოს.

საინტერესოა, რომ პსჟ-სთან ერთად “ბარსელონას” არაერთი ძველი ნაცნობი ელის.

პირველ რიგში, ლუის ენრიკე, რომელიც კატალონიურ კლუბს 2014-2017 წლებში წვრთნიდა და 2015 წელს ტრებლი მოაგებინა. ესპანელი სპეციალისტი “ბარსელონას” ისტორიაში ერთ-ერთი ყველაზე წარმატებული მწვრთნელია.

პარიზელთა მთავარი ვარსკვლავებიდან განსაკუთრებით აღსანიშნავია უსმან დემბელე, რომელიც “ბარსელონაში” 2017-2023 წლებში თამაშობდა. ფრანგი ფეხბურთელი 2025 წლის ოქროს ბურთის მფლობელია და დღეს მისი დაპირისპირება ლამინ იამალთან მატჩის ერთ-ერთი მთავარი ინტრიგაა.

“ბარსელონას” წინააღმდეგ ითამაშებს ფერან ტორესიც, რომელიც პსჟ-ს გასულ ზაფხულს შეუერთდა. საინტერესოა, რომ 2025 წლის ოქტომბერში გუნდების ბოლო შეხვედრაში სწორედ მან გაიტანა კატალონიელთა ერთადერთი გოლი. მიმდინარე სეზონი ფერანმა კარგად დაიწყო და ახალ გუნდში ჩატარებულ პირველ 9 მატჩში 7 გოლი გაიტანა.

ყოფილ გუნდს შეხვდება ლუკა დინიც, რომელიც “ბარსელონაში” 2016-2018 წლებში თამაშობდა. ფრანგი მცველი 2026 წლის ზაფხულში პსჟ-ში დაბრუნდა და ტრავმირებული ნუნუ მენდეშის შეცვლის მთავარი კანდიდატია.

პსჟ-შია “ბარსელონას” აღზრდილი დრო ფერნანდესიც. ახალგაზრდა ნახევარმცველი ფრანგულ კლუბს 2026 წელს შეუერთდა.

მსაჯი

შეხვედრას მაიკლ ოლივერი განსჯის.

ინგლისელი არბიტრი 41 წლისაა. დაიბადა 1985 წლის 20 თებერვალს, ეშინგტონში. პრემიერ ლიგაში მსაჯობა 2010 წლიდან დაიწყო, ხოლო 2012 წლიდან ფიფას კატეგორიის არბიტრია.

მას უმუშავია მსოფლიოსა და ევროპის ჩემპიონატებზე, ჩემპიონთა ლიგის მნიშვნელოვან შეხვედრებში და 2022 წლის უეფას სუპერ თასზეც.

ოლივერის კარიერა საერთაშორისო და საკლუბო სტატისტიკა 497 შეხვედრას მოიცავს. ამ მატჩებში მას 1742 ყვითელი და 66 პირდაპირი წითელი ბარათი აქვს ნაჩვენები, აგრეთვე დანიშნული აქვს 138 თერთმეტმეტრიანი.

საშუალო მაჩვენებლები ასეთია:

• ყვითელი ბარათი – 3.60 მატჩში;
• პირდაპირი წითელი ბარათი – 0.14 მატჩში;
• თერთმეტმეტრიანი – 0.30 მატჩში.

აღსანიშნავია, რომ ოლივერს ინგლისის ჩემპიონატსა და ევროტურნირებზე განსხვავებული სტატისტიკა აქვს. პრემიერ ლიგაში ჩატარებულ 433 მატჩში მან საშუალოდ 3.28 ყვითელი და 0.14 წითელი ბარათი აჩვენა, ხოლო ევროტურნირებზე ჩატარებულ 102 შეხვედრაში – შესაბამისად, 4.22 და 0.21.

პრემიერ ლიგაში ოლივერის მიერ განსჯილი მატჩების 43.9%-ში მასპინძლებმა მოიგეს, 31.4%-ში – სტუმრებმა, ხოლო 24.7% ფრედ დასრულდა. ევროტურნირებზე ჩატარებულ შეხვედრებში კი მასპინძელთა მოგებების წილი 38.2%-ია, სტუმრების – 43.1%, ხოლო ფრეების – 18.6%.

მაიკლ ოლივერს “ბარსელონას” მონაწილეობით ჩატარებული 5 შეხვედრა აქვს განსჯილი. მათგან კატალონიელებმა ერთი მოიგეს, ორი ფრედ დაასრულეს და ორი წააგეს.

პსჟ-ს შემთხვევაში ინგლისელის სტატისტიკა უფრო დადებითია. ოლივერის მიერ განსჯილი 6 შეხვედრიდან პარიზელებმა 4 მოიგეს, ერთი ფრედ დაასრულეს და ერთი წააგეს.

საინტერესოა, რომ სწორედ მაიკლ ოლივერი იყო ამ გუნდების ბოლო დაპირისპირების მსაჯიც. 2025 წლის 1 ოქტომბერს “ბარსელონა” საკუთარ მოედანზე პსჟ-სთან 1-2 დამარცხდა. ოლივერმა იმ შეხვედრაში 6 ყვითელი ბარათი აჩვენა.

დღევანდელ შეხვედრაში VAR-ის მთავარი მსაჯი იტალიელი მარკო დი ბელო იქნება.

მწვრთნელები მატჩის წინ

ჰანსი ფლიკი

გერმანელმა სპეციალისტმა ლუის ენრიკე და მისი გუნდი შეაქო, თუმცა აღნიშნა, რომ “ბარსელონა” დღევანდელი გამოცდისთვის მზადაა.

“ლუის ენრიკემ ზედიზედ ორჯერ მოიგო ჩემპიონთა ლიგა. მისი გუნდი ფანტასტიკურ ფეხბურთს თამაშობს. ის შესანიშნავი მწვრთნელია, მსოფლიოში ერთ-ერთი საუკეთესო.”

“ეს ჩვენთვის კარგი გამოცდა იქნება. მინდა, ჩემმა გუნდმა თავდაჯერებულად, გაბედულად და ერთიანად ითამაშოს, როგორც ბოლო შეხვედრებში. გვექნება შესაძლებლობა, ჩვენი დონე ვაჩვენოთ. მზად ვართ.”

ფლიკს დაცვის ხაზში არსებული პრობლემების შესახებაც ჰკითხეს. მისი თქმით, საჭიროების შემთხვევაში ცენტრალურ მცველად ფრენკი დე იონგსა და როდრის შეუძლიათ თამაში. ალტერნატივაა “ბარსა ატლეტიკის” ახალგაზრდა მცველი ალექს კამპოსიც, რომელიც პირველ გუნდში პირველად გამოიძახეს.

გერმანელმა დაადასტურა, რომ რაფინიას მატჩის ძირითად შემადგენლობაში დაწყება შეუძლია.

საინტერესოა, რომ დღეს მოგების შემთხვევაში ეს გამარჯვება ფლიკისთვის “ბარსელონას” მთავარი მწვრთნელის რანგში მე-100 იქნება.

ჰანსი ფლიკის პრესკონფერენცია სრულად.

ლუის ენრიკე

პსჟ-ს მწვრთნელმა განსაკუთრებული ყურადღება ორი გუნდის სათამაშო სტილის მსგავსებას დაუთმო.

“ჩვენი მიზანი ხვალ გამარჯვებაა. ეს ორი დიდი კლუბია, რომლებსაც ფანტასტიკური სათამაშო სტილი აქვთ. ასეთ მატჩს მაქსიმალურად უნდა გამოვიყენოთ.”

“მე “ბარსელონაში” მითამაშია და ეს გუნდი გამიწვრთნია. კატალონიასთან ძალიან ახლო ურთიერთობა მაქვს და “ბარსელონა” ჩემთვის ძვირფასია. თუმცა ახლა პსჟ-ს მწვრთნელი ვარ და გამარჯვება მინდა. ჩემთვის დიდი მოტივაციაა იმ კლუბთან თამაში, რომელსაც ჩემს კარიერაში ყველაზე მნიშვნელოვანი ადგილი უკავია.”

ესპანელ სპეციალისტს ლამინ იამალის შეჩერების გზაზეც ჰკითხეს.

“ლამინ იამალის წინააღმდეგ თავდაცვის საუკეთესო საშუალებაა, ბურთი ჩვენ გვქონდეს. იდეალურ შემთხვევაში ასეც იქნება, მაგრამ ვიცით, რომ “ბარსელონასთან” თამაში ძალიან რთულია. ამ გამოწვევას გუნდურად უნდა გავუმკლავდეთ.”

ლუის ენრიკემ ასევე აღნიშნა, რომ ამ შეხვედრას ნაადრევ ფინალად არ მიიჩნევს, რადგან ჩემპიონთა ლიგის მოგების რამდენიმე რეალური კანდიდატი არსებობს.

ლუის ენრიკეს პრესკონფერენცია სრულად.

სავარაუდო შემადგენლობები

რამდენიმე გამოცემა თითქმის ერთნაირ შემადგენლობებს ვარაუდობს. მთავარი განსხვავებები “ბარსელონას” დაცვის ფლანგებს, ნახევარდაცვაში ფერმინ ლოპესისა და დანი ოლმოს არჩევანს და პსჟ-ს ნახევარდაცვის ერთ პოზიციას ეხება.

Mundo Deportivo

პსჟ (4-3-3): საფონოვი – ჰაკიმი, მარკინიოსი, პაჩო, დინი – ჟოაუ ნევეში, ვიტინია, ფაბიან რუისი – დუე, დემბელე, კვარაცხელია.

ბარსელონა (4-3-3): ჟოან გარსია – ესპარტი, კუბარსი, ჟერარ მარტინი, კანსელუ – პედრი, როდრი, ფერმინი – იამალი, რაფინია, გორდონი.

AS

ბარსელონა (4-3-3): ჟოან გარსია – კანსელუ, კუბარსი, ჟერარ მარტინი, ესპარტი – როდრი, პედრი, ფერმინი/ოლმო – იამალი, რაფინია, გორდონი.

Sports Mole

პსჟ (4-3-3): საფონოვი – ჰაკიმი, მარკინიოსი, პაჩო, დინი – ფაბიან რუისი, ვიტინია, ჟოაუ ნევეში – დუე, დემბელე, კვარაცხელია.

ბარსელონა (4-2-3-1): ჟოან გარსია – ესპარტი, კუბარსი, ჟერარ მარტინი, კანსელუ – პედრი, როდრი – იამალი, ფერმინი, გორდონი – რაფინია.

Goal

პსჟ (4-3-3): საფონოვი – ჰაკიმი, მარკინიოსი, პაჩო, დინი – ზაირ-ემერი, ვიტინია, ფაბიან რუისი – დუე, დემბელე, კვარაცხელია.

ბარსელონა (4-3-3): ჟოან გარსია – კანსელუ, კუბარსი, ჟერარ მარტინი, ესპარტი – როდრი, პედრი, ოლმო – იამალი, რაფინია, გორდონი.

პროგნოზი

• WhoScored: 2-3
• Sports Mole: 3-2
• Sportskeeda: 2-2
• Goal.com: 3-4
• Mundo Deportivo: 3-2
• TNT Sports: 3-1

ყველა უხვგოლიან შეხვედრას ვარაუდობს. ეს გასაკვირი არ არის: ორივე გუნდს ძლიერი შეტევა და დაცვაში გარკვეული პრობლემები აქვს. ამასთან, “ბარსელონას” მიმდინარე სეზონში ყველა მატჩი მინიმუმ ორბურთიანი სხვაობით აქვს მოგებული, პსჟ კი ჩემპიონთა ლიგაზე ზედიზედ მესამე ტიტულის მოპოვებას ცდილობს.