ბრწყინვალე ქამბექი მადრიდში — ბარსელონამ ატლეტიკო დაამარცხა

ლა ლიგის 28-ე ტურში, ბარსელონა გასვლაზე ატლეტიკოს დაუპირისპირდა და ბრწყინვალე ქამბექი შემოგვთავაზა – კატალონიური გრანდი 2025 წელს, ევროპის ტოპ 5 ჩემპიონატის მასშტაბით, კვლავ ერთადერთი დაუმარცხებელი გუნდია.

პირველი ტაიმის მიწურულს ბარსას კონტრშეტევა გაეპარა და ჯულიანო სიმეონეს პასით ხულიან ალვარესმა (45′) “როხიბლანკო” დააწინაურა, მეორე ნახევარში კი “ბლაუგრანას” მდგომარეობა კიდევ უფრო დამძიმდა, ვინაიდან, 70-ე წუთზე, კონორ გალაგერის ასისტით ალექსანდრ სორლოტმა სხვაობა ორამდე გაზარდა.

მიუხედავად ამისა, ჰანსი ფლიკის შეგირდებმა 1 გოლი მალევე, 2 წუთში გაქვითეს – ინიგო მარტინესის ჩაწოდების შემდეგ, რობერტ ლევანდოვსკიმ ბურთი მკერდზე მიიღო და შესანიშნავი დარტყმით შეაგდო. 78-ე წუთზე, რაფინიას ასისტით ფერან ტორესმა წონასწორობა აღადგინა, 92-ე წუთზე კი ლამინ იამალმა ბარსელონა საერთოდ წინ გაიყვანა. მატჩის მიწურულს ტორესმა (90+8′) დუბლი შეასრულა და ტაბლოზე საბოლოო ანგარიშიც დააფიქსირა: 4-2!

ატლეტიკო 2-4 ბარსელონა | გოლები:1-0 ალვარესი 45′, 2-0 სორლოტი 70′, 1-2 ლევანდოვსკი 72′, 2-2 ტორესი 78′, 2-3 იამალი 90+2′, 2-4 ტორესი 90+8′

მეტროპოლიტანოზე მოგების შემდეგ ბარსელონამ 60 ქულა დააგროვა და პირველ ადგილზე იმყოფება. ასევე 60 ქულაა რეალ მადრიდის აქტივშიც, მაგრამ ბარსა “ლოს ბლანკოსს” ბურთების სხვაობით სჯობნის და თანაც, 1 მატჩით ნაკლები აქვს ჩატარებული.

ჰანსი ფლიკის გუნდს მომდევნო მატჩი 30 მარტს, ჟირონას წინააღმდეგ ელის. მონჟუიკზე გასამართი შეხვედრა სტარტს 18:15 საათზე აიღებს.