პედრისა და ჩავის პრესკონფერენცია ინტერთან მატჩის წინ

ჩვენთვის ხვალინდელი მატჩი ფინალის ტოლფასია და ვიმედოვნებ, ის კარგად ჩაივლის. მართალია, დიდი დანაკლისი გვაქვს, მაგრამ თამაშს საუკეთესოდ მომზადებულები უნდა შევხვდეთ. რთული შეხვედრა იქნება, რადგან "ინტერი" დაცვაში ჩადგება და კონტრშეტევებზე ითამაშებს, მაგრამ ჩვენი გუნდის ტალანტის მჯერა. გულშემატკივრის როლიც ძალიან მნიშვნელოვანი იქნება.

მირჩევნია, უფრო წინ ვითამაშო, ვიდრე უკან, თუმცა აქ იმისთვის ვარ, რომ გუნდს იმ პოზიციაზე გამოვადგე, რომელსაც მწვრთნელი მეტყვის. ფიზიკურად თავს კარგად ვგრძნობ.

როგორ ვეთამაშებით მსგავს დაცვით გუნდს? მწვრთნელი მოითხოვს, რომ ბურთმა ფლანგებს შორის სწრაფად იმოძრაოს, რათა სივრცეები მოვძებნოთ.

რამდენიმე ასპექტი უნდა გავაუმჯობესოთ, უკეთესები უნდა ვიყოთ. ჩვენ ქულების მოპოვებას გავაგრძელებთ.

ვისურვებდით, რომ ყველა თამაში მოგვეგო და პირველ ადგილზე ვიყოთ, მაგრამ არსებულ სიტუაციას უნდა შევეგუოთ. ვიმედოვნებ, ფანები მხარს დაგვიჭერენ. ეჭვიც არ მეპარება, რომ ამ ეტაპს ერთად გადავლახავთ.

გოლების ნაკლებობა? ეს საგანგაშო არაა. შეტევასა და ნახევარდაცვაში საკმარისი ხარისხი გაგვაჩნია და ერთად გოლების გატანას განვაგრძობთ. ჩვენ უმაღლესი კლასის თავდამსხმელი გვყავს და შევეცდებით, ის საუკეთესო პირობებში დავტოვოთ.

დროის მცირე მონაკვეთში ბევრი თამაშის ჩატარება გვიწევს, ჩვენ როტაციას უნდა მივმართოთ, ყველამ თავისი წვლილი უნდა შეიტანოს. ახლა ვცდილობთ, ჩვეული დინამიკა დავიბრუნოთ. 

ლევანდოვსკის გამოცდილება და გოლების გატანის უნარი არანორმალურია. ის ახალგაზრდებს ძალიან გვეხმარება.

კლუბის ეკონომიკური სიტუაცია? გუნდისა და ეკონომიკური მდგომარეობისთვის გვინდა, ჩემპიონთა ლიგის შემდეგ ეტაპზე გავიდეთ, თუმცა ამის გამო ზეწოლას არ განვიცდით.

ჩავი ნახევარმცველებს გვთხოვს, რომ საჯარიმოში უფრო ხშირად შევიდეთ და გოლები გავიტანოთ. გასულ შეხვედრაში მე ეს მოვახერხე და მწვრთნელსაც სწორედ ეს უნდა.

სწრაფი გოლის გატანა იდეალური იქნება, მაგრამ ეს რთულია - "ინტერი" ღრმა დაცვიდან თამაშობს.

ველით, რომ "ინტერი" პირველი მატჩის მსგავს სტილში ითამაშებს. მათ მჭიდრო დაცვა ჰყავთ, მაგრამ ჩვენ ალტერნატივები გვაქვს. ჩვენ მზად ვართ, ისე უნდა ვითამაშოთ, როგორც მილანში ბოლო ოცი წუთის განმავლობაში. ეს მატჩი ჩვენთვის ფინალის ტოლფასია.

ჩვენ საშინაო დავალება ვერ შევასრულეთ და ახლა შანსი გვაქვს, რომ გამოვასწოროთ. არაკომფორტულ სიტუაციაში ვართ, მაგრამ ამის დასაძლევად ყველაფერს გავაკეთებთ.

უკეთ უნდა შევუტიოთ. ვფიქრობ, პირველ შეხვედრაში ალონსოსა და რაფინიას როლები კარგად ვერ გავიგეთ. უფრო აგრესიულები უნდა ვიყოთ.

გუნდის ფსიქოლოგიური მდგომარეობის მართვა? პოზიტიურად ვართ. რა თქმა უნდა, ზეწოლა და სირთულეები არსებობს, მაგრამ მათ სიმამაცითა და მტკიცე ხასიათით ვხვდებით. სხვა არჩევანი არ გვაქვს. შევეცდები, ფეხბურთელებს დავანახო, რომ ხვალინდელი თამაში ფინალს უდრის.

ჩემი მწვრთნელობის პერიოდში გულშემატკივრებმა ბევრი დასამახსოვრებელი მომენტი გვაჩუქეს. ხვალ "კამპ ნოუ" აქტიური უნდა იყოს. მოსაგებად ყველაფერს გავაკეთებთ და ამაში ფანებიც უნდა დაგვემარონ.

თუ რაიმე სასწაული არ მოხდა, კუნდე "ინტერთან" არ ითამაშებს, თუმცა შესაძლოა, ის "ელ კლასიკოსთვის" მზად იყოს. 

1-0 მოგება? არა, მე 2-0-ს ვისურვებდი, ეს უკეთესია.

"სელტასთან" ინტენსივობა შევამცირეთ და მეტოქემ უპირატესობა მოიპოვა. ხვალ მაღალი პრესინგი უნდა ვითამაშოთ და ინტენსივობა არ დავკარგოთ.

მშვიდად უნდა განვეწყოთ, პირველივე წუთზე გატანა არ გვჭირდება. ფეხბურთელებს ყოველთვის ვეუბნები, რომ ზეწოლა ჩემზეა. თუ ისე შევუტევთ, როგორც პირველი მატჩის მეორე ტაიმში, იმედიანად ვიქნები.

ჩემთვის კარგად თამაში ბურთის ფლობასა და შეტევას ნიშნავს, მაგრამ სხვა მიდგომებიც მესმის.

ჯგუფში ჩარჩენა დიდი იმედგაცრუება იქნება, მაგრამ მოდი, პოზიტიურად ვიფიქროთ. ჩვენ არაკომფორტულ სიტუაციაში ვართ, მაგრამ ხვალ ამის გამოსწორება უნდა ვცადოთ.

მსაჯები? ჩვენი აღშფოთება სამართლიანი იყო, მაგრამ ახლა ფეხბურთზე ვფიქრობთ. იმავე დონეზე არ ვართ, რომელზეც რამდენიმე კვირის წინ ვიყავით და თუ მოვუმატებთ, ალბათ, მსაჯებზე საუბარიც აღარ მოგვიწევს.

როგორ ითამაშებს ლევანდოვსკი? ეს ლევანდოვსკის დღე არაა, ეს გუნდის დღეა. ის მნიშვნელოვანი ფიგურა უნდა იყოს არა მხოლოდ ხვალ, არამედ ყოველ თამაშში. ისე უნდა ვითამაშოთ, რომ მან თავი კომფორტულად იგრძნოს.

ფანები ალბასა და ფერანს უსტვენდნენ? ვცდილობთ, რომ ფანები დავიხმაროთ, პოზიტიურად განვაწყოთ, სხვა რამეზე არ ვფიქრობ. ვფიქრობ, საქმე კარგად წავა. მინდა, რომ ქომაგები გუნდით ამაყობდნენ.

დე იონგი თავს კარგად გრძნობს. ვნახოთ, შეძლებს თუ არა ხვალ ძირითადში თამაშს.