ჩავი ერნანდესი სელტასთან მატჩის წინ
ჩავი ერნანდესმა "სელტასთან" მატჩის წინ პრესკონფერენცია გამართა.
ეს "მალიორკასთან" ანდა "ინტერთან" მატჩებისგან განსხვავებული იქნება. მეტოქეს თავს ჩვენი თამაში უნდა მოვახვიოთ. ეს მარტივი არ იქნება, რადგან "სელტა" კარგად თამაშობს, მათ ბურთის შენარჩუნება უყვართ.
როტაციები? საუკეთესო ითამაშებს. "სელტას" შემდეგ "ინტერთან" მატჩი გველის, თითოეული შეხვედრა მნიშვნელოვანია.
როდესაც ბურთი გვექნება, დარტყმა და გოლების გატანა უნდა ვცადოთ. ჩვენ უფრო გამბედავები უნდა ვიყოთ და მჯერა, რომ გასულ მატჩთან შედარებით, სიტუაციას გამოვასწორებთ.
საინტერესოა, რომ "ინტერთან" დაპირისპირებაზე იგივე ვიდეო რეფერი მუშაობდა, რომელმაც "ბაიერნის" წინააღმდეგ დემბელეზე პენალტი არ დანიშნა.
მსაჯობა არასწორი იყო, მაგრამ ჩვენ მხოლოდ ხვალინდელ მატჩზე ვართ კონცენტრირებულნი. "ინტერსა" და "რეალთან" თამაშებზე ჯერ არ ვფიქრობთ.
გაბრაზებულები, მაგრამ იმედიანად განწყობილნი ვართ. კარგია, რომ ყველაფერი ჯერ ჩვენზეა დამოკიდებული.
"ატლეტიკოსთან" შეთანხმება გრიზმანის ტრანსფერზე? ეს ჯერ არ გაოფიციალურებულა. თუ შეთანხმება შედგა, ეს ნიშნავს, რომ ყველა მხარე დაკმაყოფილებულია. ფეხბურთელსაც სწორედ ამას ვუსურვებ.
დე იონგს დაცვაში თამაში შეუძლია და იგი ამ პოზიციაზე სეზონის სტარტზე უკვე გამოვცადეთ. ჩვენ ფართო არჩევანი გვაქვს. იღბლიანები ვართ, რომ ბევრ პოზიციაზე ბევრი მოთამაშე გვყავს. ფრენკი ცენტრალური მცველის პოზიციაზე ერთ-ერთი ვარიანტია.
ის 100%-ით გამოჯანმრთელდა და ხვალ თამაშს შეძლებს. დე იონგი გუნდს ბევრს აძლევს, მისი ფიზიკური და დაცვითი თვისებები ძალიან გვეხმარება.
პირველივე დღიდან ვამბობ, რომ დემბელე პროფესიონალია. მან რამდენიმე მატჩში გარდატეხა შეიტანა და ეს მუდმივად უნდა აკეთოს. უსმანს საკმარისი უნარები გააჩნია, რომ მეტი გოლი გაიტანოს, მან საკუთარი თავის უნდა ირწმუნოს.
ჩვენ ვისაუბრეთ და გადავწყვიტეთ, რომ უეფაში საჩივარი არ შეგვეტანა.
პიკე მენტალურად ერთ-ერთი ყველაზე ძლიერი ფეხბურთელია, ვისაც შევხვედრივარ. მისი მსგავსი ლიდერების ყოლით ბედნიერი ვარ. ბევრჯერ ვთქვი, რომ ისინი მნიშვნელოვანი მოთამაშეები იქნებიან და როდესაც გუნდს დასჭირდება, დაგვეხმარებიან.
მსაჯების გადაწყვეტილებებს არ ვაპროტესტებ ხოლმე, მაგრამ "ინტერთან" თამაში სიგიჟე იყო.
არაუხო გამოჯანმრთელებას ცდილობს, ის მებრძოლია. გუშინ მან ვარჯიშს უყურა და გაგვამხნევა. თუ ვინმეს შეუძლია, რომ ვადაზე ადრე დაბრუნდეს, ეს პირველ რიგში არაუხოა.
ბუსკეტსი უმნიშვნელოვანესი ფეხბურთელია, ის გუნდს აბალანსებს.
არის თუ არა გუნდი ლევანდოვსკიზე ზედმეტად დამოკიდებული? ამ ასპექტში უნდა მოვუმატოთ, ჯარიმების შესრულება და შორიდან დარტყმა უნდა დავხვეწოთ. ყველა ფეხბურთელმა უფრო მეტის გატანა უნდა შეძლოს.
ჩადის ვიცნობთ, ის დიდებული ცაცია ცენტრალური მცველია, რომელიც ბურთთან ერთად კარგად თამაშობს. ჩვენ მას, როგორც ყველა სხვას, ვაკვირდებით და მან უკვე ბევრი რამ აჩვენა და შეუძლია, გუნდისთვის მნიშვნელოვანი ფიგურა გახდეს.
დემბელეს და რაფინიას პოზიციები თამაშზეა დამოკიდებული. დემბელე ზოგჯერ მარცხენა ფლანგზე უკეთ თამაშობს და გოლიც გააქვს. რაფინიამ კი, შესაძლოა, თავი მარჯვნივ უფრო კომფორტულად იგრძნოს. ჩვენ გვყავს გარემარბები, რომლებსაც ბევრის მოცემა შეუძლიათ.
ვნანობ თუ არა ჟუტგლას გაშვებას? მის გამო ბედნიერი ვარ, ფერანს კარგად ვიცნობ. ის "ბარსაში" რომ იყოს, ლევანდოვსკისთან კონკურენცია გაუჭირდებოდა.
ბალდე? მისი თამაში გუნდის საჭიროებაზეა დამოკიდებული. რამდენიმე ფაქტორია, რომელთაც გადაწყვეტილების მიღებისას ვითვალისწინებ.
ფერანი 100%-ით კარგადაა. გუნდში კონკურენციაა და ჩვენ არჩევანი უნდა გავაკეთოთ, მაგრამ ის აუცილებლად ითამაშებს და გუნდისთვის მნიშვნელოვანი ფიგურა იქნება. ტორესი კარგად ვარჯიშობს და თანაგუნდელებისთვის მაგალითს წარმოადგენს.
ტეგები
მსგავსი სიახლეები
გაწევრიანდი "ბარსელონას" გულშემატკივრების Facebook ჯგუფში
ინფორმაცია
ამ სიახლეზე კომენტარები გათიშულია.
ამ სიახლეზე კომენტარები გათიშულია.
კომენტარები [ 15 ]